काभा च्यालेन्ज कप : नेपालको यात्रामा काजकिस्तान बाधक

त्रिपुरेश्वरस्थित राखेप कभर्डहलमा शुक्रबार नेपालले ५ सेट खेल्दै काजकिस्तानलाई खेल सुम्पन पुग्यो । यसअघि सेन्ट्रल जोनको रूपमा आयोजना भएको यस प्रतियोगिताको नेपाल दुईपल्टको च्याम्पियन हो ।

नेपालले घरेलु भूमिमा काभा च्यालेन्ज कप जित्दै ह्याट्रिकको लक्ष्य बनाएको थियो । तर एसियाको छैटौं वरीयताप्राप्त टोलीसामु नेपालले आफ्नो पकडमै रहेको खेल गुमाएको थियो ।

पहिलो सेटमा कडा प्रतिस्पर्धा गर्दै ३०–२८ ले विपक्षीलाई सुम्पेको नेपालले त्यसपछि लगातार दुई सेट (२५–१६, २५–१५) जितेर खेल नियन्त्रणमा लिएको थियो । तर, चौथो सेटमा काजकस्तिानले रणनीति परिवर्तन गर्‍यो भने नेपालको प्रदर्शन फितलो रह्यो । सुरुदेखि नै पछाडि पर्दा काजक खेलाडी हाबी भए । उनीहरूले सेट २५–१८ ले आफ्नो पक्षमा पार्दै खेल २–२ को बराबरी ल्याए । अन्तिम सेटमा नेपालले थप दबाबमा पर्‍यो । निर्णायक सेट १५–७ ले सुम्पेपछि नेपाल सेमिफाइनलमै रोकियो ।

नेपालका बेल्जियन प्रशिक्षक जान डे ब्रान्टले भने पहिलो सेटमै खेल हारिसकेको स्मरण गराउँदै त्यो सेट जित्न सकेको भए सोझो सेटमा खेल जितिने तर्क गरे ।

उनले काजकिस्तान टोली भारतजस्तै सशक्त टोली भएकाले शारीरिक रूपमा उनीहरूले एडभान्जेज पाएको बताए ।

नेपालका लागि सरस्वती चौधरीले सर्वाधिक १७ अंक बटुल्दा उषा भण्डारीले १४, निरुता ठगुन्नाले १३ र साफिया पुनले ११ अंक बटुलेका थिए ।

फाइनल पुग्न नसकेको निराश देखिए पनि कप्तान अरुणा शाहीले प्रतियोगिताबाट स्तर उकासिएको बताइन् । उनले भनिन्, ‘प्रतिस्पर्धात्मक खेल खेलेका हौं । फाइनल पुग्न सकेनौं तर, हाम्रो स्तरमा धेरै सुधार आएको छ । पहिलाभन्दा व्यवस्थित र तीव्र गतिमा खेल्ने सक्ने भएका छौं । त्यो नै हाम्रो लागि उपलब्धि हो । फाइनल पुग्नु नै ठूलो होइन ।’ उनले भारत, काजकिस्तानजस्ता सशक्त टोलीको उपस्थितिले प्रतियोगिता विगतको भन्दा फरक रहेको सुनाइन् ।

अब काजकिस्तानले उपाधिका लागि आइतबार भारतको सामना गर्नेछ । भारतले उज्वेकिस्तानलाई ३–० को सोझो सेटमा हराएको थियो । नेपालले तेस्रो स्थानका लागि आइतबारै उज्वेकिस्तानसँग खेल्नेछ ।