कान्तिपुर वेबसाईट
AdvertisementAdvertisement
२३.१२°C काठमाडौं
काठमाडौंमा वायुको गुणस्तर: ८०

साफ च्याम्पियनसिप ड्र : समूह कठिन, प्रशिक्षकको उत्साह बेग्लै

यसपालिको साफ च्याम्पियनसिप फुटबलमा विश्वकप खेलेको टिम कुवेत र लेवनानको प्रवेश
हिमेश

काठमाडौँ — अबको साफ च्याम्पियनसिप फुटबल २०२३ विशेष हुनेछ । यो फरक हुनेछ, विशेष पनि । किनभने दक्षिण एसियाली फुटबलको सबैभन्दा ठूलो प्रतियोगितामा यसपालि यस क्षेत्रबाहिरका दुई टिमले खेल्दै छन् । यी आमन्त्रित टिम हुन् कुवेत र लेवनान ।

साफ च्याम्पियनसिप ड्र : समूह कठिन, प्रशिक्षकको उत्साह बेग्लै

भारतको बैंग्लोरमा हुने साफ च्याम्पियनसिपको बुधबार नै ‘ड्र’ निकाल्ने काम भयो । नेपाल त्यो समूहमा परेको छ, जसमा विश्वकप खेलेको इतिहास बोकेको कुवेत छ भने डिफेन्डिङ च्याम्पियन भारत पनि त्यहीं छ । पाकिस्तान पनि छ । यो समूह ‘ए’ भयो ।

अर्को समूह ‘बी’ मा लेवनानसँगै बंगलादेश, भुटान र माल्दिभ्स छन् । तय छ यसपल्टको प्रतियोगिता यसअघिका संस्करणको तुलनामा माथिल्लो स्तरको हुनेछ । सेमिफाइनल पुग्ने समीकरण अलग हुनेछ । नेपाल माल्दिभ्समा भएको पछिल्लो संस्करणको उप–विजेता पनि हो । नेपालले दुई वर्षअगाडिको प्रतियोगितामा पहिलोपल्ट फाइनल यात्रा तय गरेको थियो । अबको प्रतियोगितामा नेपालको सम्भावना कस्तो हुने छ त ?

‘ड्र’ निस्केपछि यो प्रश्न अझ बढी सान्दर्भिक बनेको छ । नेपाली राष्ट्रिय फुटबल टोलीका मुख्य प्रशिक्षक भिन्सेन्जो अल्बर्टो भने उत्साही छन् । कान्तिपुरसँगको कुराकानीमा उनले भने, ‘पक्कै पनि समूह कठिन छ, हाम्रा लागि यो सजिलो हुने छैन । तर, म खुसी छु । निकै उत्साहित छु । हामीले आफूभन्दा माथिका टिमसँग खेल्नेछौं र यसक्रममा धेरै सिक्न पाउँछौं । त्यसैले पनि म अबको साफ च्याम्पियनसिपलाई निकै सकारात्मक छ् ु।’

मुख्य प्रशिक्षक भएयता उनको नेतृत्वमा नेपालले पहिलो ठूलो र आधिकारिक प्रतियोगिता खेल्दै छ । प्रतियोगिता असार ६ देखि १८ सम्म हुनेछ । नेपालको पहिलो खेल कुवेतविरुद्ध नै छ । यो नै प्रतियोगिताको उद्घाटन खेल हुनेछ । नेपालले असार ९ मा भारतको सामना गर्नेछ । त्यसपछि असार १२ मा नेपालले लिग चरणको आफ्नो अन्तिम खेलमा पाकिस्तानविरुद्ध प्रतिस्पर्धा गर्नेछ । प्रशिक्षक अल्बर्टो सबै प्रतिद्वन्द्वीप्रति सम्मान गर्छन् ।

उनी भन्छन्, ‘कुवेत निकै बलियो प्रतिद्वन्द्वी हुनेछ । टिमका प्रशिक्षक रुई बेन्टो निकै नाम चलेका पूर्वखेलाडी र निकै सम्मानित प्रशिक्षक हुन् । भारतविरुद्ध खेल्दा हामीले त्यहाँका घरेलु समर्थकको पनि सामना गर्नुपर्नेछ । पाकिस्तान भर्खरै अन्तर्राष्ट्रिय फुटबलमा फर्केको छ, तर उसका केही खेलाडी निकै राम्रा छन् । हामीले प्रत्येक खेललाई उत्तिकै महत्त्व दिन्छौं ।’

मूल प्रश्न नेपाल के सेमिफाइनल पुग्न सक्षम हुनेछ त ? यसमा अल्बर्टोको आफ्नै तर्क छ । ‘फुटबलमा सबै प्रकारका सम्भावना खुला हुन्छ । मैदानमा उत्रिँदा को कस्तो भनेर धेरै अर्थ नराख्न सक्छ । म फेरि ठूला नाम हुँदैमा त्यो टिमले राम्रो खेल्ने छ भन्ने विश्वास राख्ने पनि गर्दिनँ । त्यस अर्थमा नेपालको सम्भावना उत्तिकै छ,’ प्रशिक्षक अल्बर्टोले थपे ।

नेपालले साफ च्याम्पियनसिप खेल्नु अगाडि एउटा मैत्रीपूर्ण अन्तर्राष्ट्रिय खेल भने खेल्नेछ । जेठ १५ मा हुने यस खेलमा नेपालले फिलिपिन्सको सामना गर्नेछ । त्यस खेलपछि मात्र साफमा खेल्ने टिमले निश्चित आकार लिनेछ ।

‘लिगका कारण अहिले हामीले राम्रो तयारी गर्न पाइरहेका छैनौं,’ प्रशिक्षक मान्छन्, ‘हामीसँग समय कम हुनेछ ।’ यति ठूलो प्रतियोगिताअगाडि लिगको उत्तिकै व्यस्तता किन भन्ने पनि प्रश्न छँदै छ । आखिरमा लिगको मुख्य उद्देश्य भनेको राष्ट्रिय टिमलाई बलियो बनाउनु नै हो । तर, यसपल्टको सहिद स्मारक ‘ए’ डिभिजन लिगले यस्तो काम गरिरहेको छैन । सम्भवतः उनले बैंग्लोरका लागि उड्नु अगाडि मात्र नेपालको अन्तिम टिम घोषणा गर्नेछन् ।

प्रतियोगितालाई लिएर प्रशिक्षक अल्बर्टोले तीन रणनीतिक प्रशिक्षणसत्र भने सञ्चालन गरिसकेका छन् । ‘मुख्य कुरा टिमको प्रदर्शन हो र हामी उच्च प्रदर्शन गर्न तयार छौं र त्यसै अनुसार तयारी गर्नेछौं,’ उनले सुनाए । यसअघिका प्रशिक्षक अब्दुल्लाह अल्मुताइरी जस्तो उनी सामाजिक सञ्जालमा सक्रिय छैनन् । न त धेरै घुलमिल गर्ने खालका नै छन् । उनको व्यक्तित्व नै फरक छ । तर, उनले पनि एउटा विशेष अनुरोध गर्न भने बिर्सेनन् ।

उनले भने, ‘नेपाली राष्ट्रिय टिमले साफ च्याम्पियनसिप खेल्दै छ र यस्तो बेला हामीलाई सबैको समर्थन चाहिन्छ । अहिले धेरैले फुटबल संघको आलोचना गरिरहेका छन् । तर, फुटबलका विकासका लागि संघमात्र होइन मिडिया र समर्थकको पनि उत्तिकै योगदान हुन्छ । अबको साफ च्याम्पियनसिप नेपालका लागि मेरो पहिलो ठूलो प्रतियोगितामात्र हुने छैन, हाम्रा धेरै खेलाडीका लागि यो पहिलो ठूलो अवसर हुनेछ । त्यसैले उनीहरूप्रति सकारात्मक समर्थन र सहयोगका लागि मिडियाबाट अपेक्षा गर्छु । नेपाली फुटबल समर्थकबाट पनि यस्तै अपेक्षा रहेको छ ।’

प्रकाशित : जेष्ठ ४, २०८० ०७:०५
प्रतिक्रिया
पठाउनुहोस्
जनताको राय

बहालवाला मुख्यसचिवमाथि नै भ्रष्टाचार मुद्दा दायर भएको छ । यसबारे तपाईं के भन्नुहुन्छ ?

x