‘गोलमेसिन’ एमबाप्पे

एमबाप्पे भर्खर २४ वर्षका भए । उनका सामु प्रचुर सम्भावना कायम छन् । यत्तिको उमेरमै उनले विश्वकपको दुई संस्करणका फाइनल खेलिसकेका छन् । रुसमा भएको विश्वकपमा त उनी विजेता नै रहे, कतारमा भने अर्जेन्टिनासँग पछि परे । मेसी र रोनाल्डोको युग सकिएपछि सबैको ध्यान उनमै हुनेछ । 
हिमेश

काठमाडौँ — यसपल्ट फ्रान्सेली लिग–वान पेरिस सेन्ट जर्मेन (पीएसजी) ले जित्नैमा कुनै शंकै छैन । फ्रान्सको आफ्नै केयलिन एमबाप्पे मात्र होइन, लियोनल मेसी र नेयमर जत्तिको खेलाडी भएको क्लबले लिग नजिते कसले जित्ने ? सबैले भन्ने पनि यस्तै हो ।



तर अहिले तत्काल पीएसजीमा सबथोक राम्रो भइरहेको भने छैन । लिगका आफ्नो पछिल्लो खेलमा पीएसजी लोरिन्टसँग ३–१ ले पराजित भयो । त्यो पनि आफ्नै घरमा ।

पीएसजीका तर्फबाट सम्भव त्यो एक गोल पनि अरू कोही होइन, एमबाप्पेले गरेका थिए । लिग तालिकामा पीएसजी ७५ अंकमा शीर्ष स्थानमा छ, ३३ खेल खेलेर । दोस्रो स्थानमा रहेको मार्सेले पनि समान ३३ खेल खेलेको छ र उसको अंक रहेको छ, ७० । भनेपछि लिगमा पाँच चरणका खेल मात्र बाँकी छँदा पीएसजी र मार्सेबीचको अन्तर भनेको पाँच अंक मात्रै हो । फेरि मार्से पीएसजीको त्यस्तो शत्रु क्लब हो, जसलाई पीएसजीका हरेक असफलतामा खुसी लाग्ने गर्छ ।

पीएसजीलाई उपाधि जित्नबाट रोक्न मार्सेले सबथोक गर्नेछ, आफूले सक्दो । सन् २०२० मा पीएसजी युरोपेली च्याम्पियन्स लिगको फाइनल पुगेको थियो । युरोपेली क्लब फुटबलका सबैभन्दा ठूलो प्रतियोगितामा पीएसजीको यो नै अहिलेसम्मको सबैभन्दा राम्रो प्रदर्शन हो । फाइनलमा पीएसजी बायर्न म्युनिकको हातबाट १–० ले पराजित भयो । पीएसजी के पराजित भयो, मार्सेका समर्थकले सडक सडकमा आर्लेर मस्त खुसियाली मनाए ।

यस्तो किनभने पीएसजी त्यस फाइनलमा पराजित हुनुको अर्थ हो, मार्से त्यस्तो एक्लो फ्रान्सेली टिम रहनेछ, जसले च्याम्पियन्स लिग जितेको छ । सन् १९९३ मा मार्सेले एसी मिलानलाई हराएर यो उपाधि जितेको थियो । एक से एक खेलाडी किनेर पनि, आफूले सक्दोभन्दा बढी खर्च गरेर पनि पीएसजीले अहिलेसम्म च्याम्पियन्स लिग जित्न सकेको छैन । कतार स्पोर्ट्स इन्भेस्टमेन्टले क्लब किनेयता यसलाई युरोपको च्याम्पियन बनाउन के मात्र गरेन, तर कहिले पनि सफलता हात परेन ।

सन् २०११ मा कतारीहरूले पीएसजी किनेका थिए र त्यसयता मन खुलेर खर्च गरिरहेका छन् । यस पटकको सिजनमा पनि पीएसजी खालि अन्तिम १६ मै रोकियो । फेरि एकपल्ट उसलाई बायर्नले माथ खुवायो । यस्तै पृष्ठभूमिमा पीएसजीले फेरि एकपल्ट फ्रान्सको माथिल्लो डिभिजन जित्छ भने त्यसमा खासै मज्जा नै के रह्यो र ? जित्न सकेन भनेचाहिँ त्यो प्रलय समान हुनेछ । यी सबै पृष्ठभूमिबीच फेरि एकपल्ट एमबाप्पे चर्चामा छन् ।

उनले अर्को सिजनका लागि के गर्नेछन्, सबैमा त्यसमा चासो छ । लगातारको च्याम्पियन्स लिगको असफलतापछि पीएसजीले पनि आफ्नो नीति परिवर्तन गर्न लागेको छ । त्यो भनेको कतार स्पोर्ट्स इन्भेस्टमेन्ट नै भयो । त्यो नीतिअनुसार आउने सिजनका लागि पीएसजीले एमबाप्पेलाई केन्द्रमा राखेर युवा टिम बनाउँदै छ, जसमा सम्भवतः मेसी र नेयमर हुने छैनन् । कम्तीमा मेसी त हुने छैनन् नै । पीएसजीको अबको नीति हो, फ्रान्सेली युवा खेलाडीको उत्पादन गर्ने र त्यसकै मदतले बलियो टिम बनाउने ।

यसअघि जस्तो नाम चलेका खेलाडी किनेर मात्र टिम बलियो नबनाउने । यसका लागि पीएसजीले एमबाप्पेलाई फकाइरहेको छ । सबैलाई थाहा छ, नेयमर विश्व फुटबलका अबका सबैभन्दा ठूला स्टार हुन् । मेसी र क्रिस्टियानो रोनाल्डोपछि अबका सबैभन्दा ठूलो नाम यी नै त हुन् । एमबाप्पे अहिले भर्खर २४ वर्षका भए । उनका सामु प्रचुर सम्भावना कायम छन् । यत्तिको उमेरमै उनले विश्वकपको दुई संस्करणका फाइनल खेलिसकेका छन् ।

त्यसमध्ये रुसमा भएको विश्वकपमा त उनी विजेता नै रहे, कतारमा मात्र अर्जेन्टिनापछि दोस्रो स्थानमा चित्त बुझाउनुपर्‍यो । मेसी र रोनाल्डोको युग सकिएपछि सबैको ध्यान उनमै हुनेछ । सुरुमा उनी मोनाकोको खेलाडी थिए, सन् २०१७–१८ मा पहिलो पल्ट पीएसजी गए । त्यति बेला उनी ऋणमा त्यता गएका थिए । त्यसको एक वर्षपछि उनले पीएसजीसँग स्थायी अनुबन्ध नै गरे । त्यसयता उनले पीएसजीका लागि १ सय २९ गोल गरिसकेका छन् ।

उनी पीएसजीका लागि सर्वाधिक गोल गर्ने खेलाडी पनि बनिसके । उनलाई फ्रान्समा रहेको विविधताबीच एकताको प्रतीकका रूपमा पनि लिने गरिन्छ । उनी आधुनिक फ्रान्सका अनुहार हुन् । फेरि उनी मेसीको फुटबलका प्रशंसक पनि होइनन् उनका लागि अर्जेन्टिनी सहकर्मी विश्वकै उत्कृष्ट खेलाडी होइनन् । उनलाई मेसीभन्दा रोनाल्डो नै मन पर्छ । सानोमा उनी आफ्नो कोठाको भित्ता भरी रोनाल्डोकै तस्बिर राख्थे ।

अनि उनी जिनेदिन जिदानलाई पनि उत्तिकै मन पराउँछन् । जिदानपछि फ्रान्सले पाएको सबैभन्दा राम्रा खेलाडी एमबाप्पे नै हुन् । तर उनले अहिलेसम्म फ्रान्सबाहिर क्लब फुटबल खेलेका छैनन् । फ्रान्समै रहने हो भने उनको हैसियत मेसी र रोनाल्डो जत्तिको नहुने भन्नेहरू पनि छन् । युरोपका तीन लिग त इंग्लिस प्रिमियर लिग, इटालीको सिरी ‘ए’ र स्पेनको ला लिगा नै भए । त्यसपछि बल्ल जर्मनीको बुंडेसलिगा आउँछ । अनि मात्रै फ्रान्सेली लिग–वान ।

फ्रान्सको यो माथिल्लो डिभिजनको लिगलाई खासै उम्दा नभएको आरोप लगाउनको पनि संख्या पनि कम्ती छैन । यही जमातले भन्छ, अबको सिजन एमबाप्पेले अन्यत्र जानैपर्छ । उसलाई सुहाउने क्लब धेरै अर्थमा स्पेनमा छ, विशेषतः रियल म्याड्रिड । अथवा इंग्ल्यान्डका कुनै ठूला क्लब । पोहोर सिजनै एमबाप्पेलाई रियलले लगभग किनिसकेको थियो, तर अन्त्यमा आएर कहाँनिर के भयो, कसैले थाहै पाएनन् । गत सिजननै उनले पीएसजीसँग नयाँ अनुबन्ध पनि गरे र यो सन् २०२५ सम्म कायम रहनेछ ।

एमबाप्पेलाई पीएसजी छाडेर अन्यत्रा जान उक्साइरहेका सबैभन्दा अगाडि छन्, फ्रान्सकै पुराना खेलाडी इमानुल पेटी । उनी भन्छन्, ‘एमबाप्पे १७ वर्षको उमेरदेखि नै स्टार खेलाडी छन् । फ्रान्समा उनले आफूले सक्दो सबै कीर्तिमान आफ्नो नाममा बनाइसके । तर उनले च्याम्पियन्स लिग जित्न सकेका छैनन् । विश्वकै उत्कृष्ट खेलाडी हुन् र बेलन डे’अर उपाधि जित्न एमबाप्पेले च्याम्पियन्स लिग जित्नैपर्छ ।’ सायद पीएसजीले अबका सिजन च्याम्पियन्स लिग जित्नेमा पेटीलाई पनि शंका छ ।

उनी के पनि मान्छन् भने पोहोर सिजन जे जस्तो भए पनि एमबाप्पे आउने भयो भने रियलले आफ्नो ढोका सधैंका लागि खुल्ला राख्ने नै छ । फेरि रियल भनेको च्याम्पियन्स लिगको राजा हो । यो च्याम्पियन्स लिगको डिफेन्डिङ च्याम्पियन मात्र होइन, यो जत्तिको च्याम्पियन्स लिगमा सफल क्लब अरू कुनै छैन । त्यसैले रियल एमबाप्पेबीच मिलन हुनु नै पर्छ भन्नेहरू धेरै छन् । त्यसैले फुटबलको यो सिजन सकिँदा सबैभन्दा ठूलो प्रश्न हुनेछ, के एमबाप्पेले पीएसजी छाड्ने छन् त ?

प्रकाशित : वैशाख २०, २०८० ११:०४
प्रतिक्रिया
पठाउनुहोस्

‘सिटाडेल’ की बोन्ड गर्ल

निक जोनाससँग वैवाहिक सम्बन्धमा बाँधिएयता प्रियंका चोपडाको चर्चा हाल निकै बढेको छ । र, यसको कारण हो, उनको नयाँ वेब सिरिज ‘सिटाडेल’ । 
हिमेश

निक जोनास आफ्नी पत्नी प्रियंका चोपडालाई कति माया गर्छन् होला ? यो प्रश्नको उत्तर त उनीहरूसँग पनि छैन होला । तर निक आफ्नो प्रेमको प्रदर्शन भने खुलेर गर्छन् । भर्खरै उनीहरू हँदै रोमान्टिक पारामा देखिए, लन्डनमा । त्यसै पनि प्रियंका सुन्दर त छिन् नै, त्यसमाथि रातो लुगा लगाउनुपर्छ, उनी वास्तवमै आकर्षक देखिन्छिन् । प्रियंकाको यस्तै रूपमा निक मोहित भएका केही तस्बिर सोसल मिडियामा अहिले जताततै पाइन्छन् ।

प्रियंकाले अफ–सोल्डर रेड गाउन लगाएकी थिइन् र त्यो उनलाई वास्तवमै खुबै सुहाएको थियो । उनी जताजता गइरहेकी थिइन्, निक उनलाई नै पछ्याइरहेका थिए । अहिले प्रियंका चर्चा नै चर्चामा छिन् र यसको कारण हो, उनको नयाँ वेब सिरिज ‘सिटाडेल’ । लन्डनमा भएको यसकै प्रिमियरकै बेला प्रियंकालाई पछ्याइरहेका निकको तस्बिर भाइरल भएको हो । र, यसले त्यही वेब सिरिजलाई अझ चर्चाको विषय बनाउन मदत भने पक्कै गरेको छ ।

जतिजति बेला निक कन्सर्ट गर्छन्, त्यहाँ प्रियंका पनि पुग्ने गर्छिन् । अब प्रियंकाको एउटा ठूलो सम्भावित उपलब्धिमा निकको उपस्थिति पनि चाहिन्थ्यो नै । ‘सिटाडेल’ कै पृष्ठभूमिमा प्रियंकाका केही खास अन्तर्वार्ताहरू पनि सुन्न पाइएको छ । त्यसमा उनले भनेकी छन्, ‘अब बल्ल त्यस्तो समय आएको छ, जहाँ आफूलाई हलिउडमा सबैले चिन्न थालेका छन् । तर यहाँसम्म पुग्न उनले धेरै नै संघर्ष पनि गर्नु पर्‍यो । यो संघर्ष ठ्याक्कै सकिने पनि छैन, न यो सजिलो नै थियो ।’

अझै जारी रहनेछ । फेरि यो सजिलो पनि हुने छैन । बलिउडबाट हलिउड छिरेको लगभग १० वर्षपछि उनी यत्तिको भन्न सक्ने भएकी हुन् । खासमा प्रियंका एउटा राम्रो ब्रेकको प्रतीक्षामा थिइन् । सायद यो ब्रेक त्यही ‘सिटाडेल’ हुन सक्छ । केही सिनेमा पण्डितले प्रियंका अब ग्लोबल आइकन हुने दाबी पनि गरिरहेका छन् । प्रियंका भन्छिन्, ‘म हलिउडमा आएको पनि दस वर्ष भयो, बल्ल एउटा ठूलो राम्रो भूमिका पाएकी छु । सिटाडेलमा मेरो भूमिका दमदार छ ।’

तस्बिरहरू : सिटाडेल ट्वीटर अफिसियल

उनी थप्छिन्, ‘यहाँसम्म पुग्न मैले धेरै मिहिनेत गरेकी छु । अनि मैले आफ्नो कामबाट हलिउडलाई मनाउन पनि सकेकी जस्तो लाग्छ ।’ त्यसको अर्थ के हो भने हलिउडले अब प्रियंकालाई खुलेर स्विकार्न थालेको छ । नत्र यसअघिका अन्तर्वार्तामा प्रियंकाले बारम्बार भन्दै आएकी थिइन्, बलिउडमा उनलाई हेर्ने नजर धेरै राम्रो छैन, विशेषतः एसियालीका रूपमा । अझ बलिउड कलाकारका रूपमा । सायद अब यो फेरिँदै छ, यसका लागि धेरै श्रेय प्रियंकालाई दिनैपर्छ ।

यसअघि पनि बलिउडका केही कलाकारले हलिउडमा प्रवेशका लागि प्रयास नगरेको पनि होइन, तर सबै उत्तिकै सफल भएनन् । तर प्रियंका एक प्रकारले अपवाद पनि रहिन् । यसको एउटा ठूलो कारण केही गरेर देखाउने उनको जिद्दीपन पनि जिम्मेवार छ । उनी सपना खुबै देख्छिन् । तर त्यसमै मात्र सीमित भने हुन चाहँदैनन् । सुरुमा उनका लागि बलिउडमा काम गर्न पाउनु नै ठूलो थियो, पछि उनले हलिउडको पनि सपना देखिन् र त्यसैको कारण हो, ‘सिटाडेल’ ।

हो चाहिँ के त यो ? पछिल्लो समय हलिउडमा जासुसी कथामा आधारित एकपछि अर्को सिरिज बनिरहेका छन् र ती सफल पनि भएका छन् । जेम्स बोन्ड सिनेमाबाट आकर्षित नहुने को होला र ? ‘सिटाडेल’ लगभग यस्तै परम्पराको वेब सिरिज हो, जसको मुख्य भूमिकामा प्रियंका देखापरिरहेकी छन् । त्यस अर्थमा प्रियंका भइन्, बोन्ड गर्ल । एउटा रमाइलो तथ्य के पनि हो भने प्रियंकालाई मन पर्ने भूमिका पनि यस्तै हो, उनले धेरै अगाडि सपना देखेकी थिइन्, बोन्ड गर्ल बन्ने ।

‘सिटाडेल’ सँग एक अर्को बलिउड स्टार वरुण धनव पनि जोडिएका छन् र यसका पनि खुसी छन्, प्रियंका । बलिउडमै छँदा पनि प्रियंकाले उत्तिकै संघर्ष गर्नुपरेको समाचार आइरहन्थे, किनभने उनको कोही गडफादर थिएन । उनी उत्तर प्रदेशमा जन्मेर हुर्केकी थिइन्, त्यसैले बलिउडकै लागि उनी बाहिरका थिए । त्यसैले उनलाई ‘सेल्फ मेड’ पनि भन्ने गरिन्छ । खासमा उनको कुनै मनोरन्जन क्षेत्रको कुनै पृष्ठभूमि थिएन, तर त्यसमै आफूलाई प्रमाणित गरिन् ।

एउटा तथ्य के पनि हो भने हलिउडले मात्र प्रियंकालाई अब खुलेर स्विकारेको छैन, बलिउडले पनि ज्वाइँका रूपमा निकलाई माया गर्न थालेको छ । अझ भनौं, भारतीय सिनेमाका पारखीका लागि निक पनि मन पर्न थालेको छ । नत्र सुरुमै शंकाको प्रश्न थियो, यी निकले कति दिनसम्म प्रियंकालाई मन पराइरहने हो, कतै यो प्रसंग पनि टुट्ने होइन, जस्तो उनका यसअघिका प्रेम सम्बन्ध टुटेका थिए । यी अमेरिकी गायक, गीतकार तथा नायकको जीवनमा यसअघि धेरै आए र गए पनि ।

धेरै अगाडि उनले डिस्ने स्टार माइली साइरसलाई डेट गरेकी थिइन् । त्यसपछि दुई वर्षसम्म निक सेलेना गोमेजको मायामा भुले । त्यसबाट उम्केपछि उनको सम्बन्ध अस्ट्रेलियाली गायिका डेल्टासँग भयो । पछि उनीहरूको ब्रेकअपको समाचार आयो । निक यत्तिकैमा रोकिएनन् । उनको जीवनमा फेरि आइन्, मिस युनिभर्स २०१२ ओलिभा । उनी पछि मात्र प्रियंकाको पालो आएको हो । यसपल्ट लागिरहेको छ, निक प्रियंकासँग सम्बन्धलाई लिएर गम्भीर छन् ।

यसलाई टुटाउन चाहँदैनन् । सन् २०१८ मा उनीहरूको पहिलो भेट भएको थियो । त्यही वर्ष निकले विवाहको प्रस्ताव राखे । अझ त्यही वर्ष उनीहरूको इन्गेजमेन्ट पनि भयो । पछि विवाह पनि । अब उनीहरूको एक छोरी पनि भइसकेकी छन् । अहिले धेरैलाई लागेको हुनुपर्छ, निक र प्रियंका दुवैलाई उनीहरूको सम्बन्धले धेरै फाइदा गरेको छ, करियरको दृष्टिकोणले पनि । यो त सकारात्मक नै हो । सुरुमै गरिएको प्रश्नको उत्तर सायद हुन सक्छ, निक प्रियंकालाई धेरै माया गर्छन् ।

प्रकाशित : वैशाख १४, २०८० १०:४२
पूरा पढ्नुहोस्
प्रतिक्रिया
पठाउनुहोस्
×