ऋचा मेमोरियल टी–२० क्रिकेट : पुलिस र विराटनगरको लगातार जित

विराटनगर जुट मिल मैदानमा शुक्रबार १ सय ३० रनको लक्ष्य पछ्याएको पुलिसले १६.४ ओभरमा ४ विकेट गुमाएर पार गर्‍यो । दिलीप नाथले विष्फोटक ब्याटिङ गर्दै ३६ बलमा ८ चौका र २ छक्कासहित ७५ रनको अर्धशतकीय इनिङ्स खेले । उनी प्लेयर अफ द म्याच भए । योगेन्द्र कार्कीले ४८ रन बनाउँदा ३ छक्का र ४ चौका प्रहार गरे । शंकर रानाले १८ वलमा ३५ र अमित श्रेष्ठले १४ रनको योगदान गरे । बलिङमा धनगढीका हेमन्त धामीले २ तथा कौशल राजपुत र दिपक भट्टले समान १–१ विकेट लिए ।

यसअघि धनगढीले ७ विकेट गुमाई १ सय २९ रन बनायो । दीपक बोहराले ३८ बलमा ६५ रन जोडे । उनले २ छक्का र ९ चौका प्रहार गरे । उत्तम थापामगरले ५१ रन बनाउँदा ३ छक्का र ५ चौका प्रहार गरे । दीपक भट्टले ५ छक्का र २ चौकामा ४४ बनाएका थिए ।

पुलिसका योगेन्द्रसिंह कार्कीले ४४ रन खर्चेर ३ विकेट लिए । रशिद खानले ३१ रन खर्चेर २ विकेट र मन्जित श्रेष्ठले १ विकेट लिए ।

दोस्रो खेलमा पहिलो व्याटिङ गरेको एनबीएससी विराटनगरले १६.३ ओभरमा समेटिँदै १ सय २९ रनको मध्यम योगफल तयार गर्दा रवि शर्माले २३ बलमा ५ चौकासहित २५ रन जोडे । विधान गोस्वामीले ७ बलमा २ छक्का र २ चौकासहित २०, इमरानले ७ बलमा २ छक्का र १ चौकासहित १७ रन, सुमन गतराजले १९ र सतिश कुमारले १६ रनको योगदान दिए ।

१ सय ३० रनको लक्ष्य पछ्याएको दिल्ली १७.२ ओभरमा अलआउट हुँदै ९७ रनमा समेटियो । दिल्लीका मनीष मिश्रले १७, शक्ति केडीले १४ र अंकितले १२ रनको योगदान गरे । विराटनगरका मेहाङले १५ रन खर्चेर ४ विकेट लिए । उनी प्लेयर अफ द म्याच भए । आयरले १७ रन खर्चेर ३, प्रशान्त कुमार, राहुल चौधरी र विधान गोस्वामीले १–१ विकेट लिए ।