तेक्वान्दोका ढकालले दुई अन्तर्राष्ट्रिय स्पर्धा खेलाउने
काठमाडौँ — तेक्वान्दोका अन्तर्राष्ट्रिय रेफ्री दीपेन्द्र ढकालले अस्ट्रिया र स्पेनमा हुने विश्व वरीयताका तेक्वान्दो प्रतियोगिताका लागि निर्णायकको भूमिका निर्वाह गर्ने भएका छन् ।
अस्ट्रियाको इन्सब्रुकमा शनिबारदेखि अस्ट्रियन ओपन अन्तर्राष्ट्रिय तेक्वान्दो प्रतियोगितामा उनी निर्णायकको भूमिकामा रहने छन् । त्यसपछि उनी स्पेनको एलिकान्टेमा वैशाख १ देखि ३ सम्म हुने स्पेनिस ओपन विश्व वरीयता तेक्वान्दोका लागि उनी सहभागी हुनेछन् । ढकाल गत वर्ष एलिकान्टेमै भएको विश्व वरीयता जी टु तेक्वान्दो च्याम्पियनसिपमा वेस्ट रेफ्री भएका थिए ।
युरोपियन तेक्वान्दो युनियनबाट उक्त प्रतियोगिताका लागि आफूलाई निर्णायक मण्डलमा छनोट गरेको निर्णायक ढकालले जानकारी गराए । उनले हालै उज्वेकिस्तानको तास्केन्द सहरमा सम्पन्न पेरिस ओलम्पिक २०२४ को अन्तर्राष्ट्रिय रेफ्री छनोट तालिममा सहभागिता जनाएका थिए ।
अन्तर्राष्ट्रिय दोस्रो श्रेणीका तेक्वान्दो निर्णायक ढकालले यसअघि बेल्जियम, फ्रान्स, पाकिस्तान, जर्मनी, चीनमा भएका अन्तर्राष्ट्रिय तेक्वान्दो प्रतियोगिताहरूमा निर्णायकको भूमिका निर्वाह गरिसकेका छन् ।
काभ्रे कुशादेवीका बासिन्दा उनलाई अस्ट्रिया जानुअघि जिल्ला समन्वय समिति काभ्रेपलाञ्चोकले बिदाइ गरेको थियो । जिसस प्रमुख दीपककुमार गौतम, समन्वय अधिकारी शान्तिराज प्रसाई, सूचना अधिकारी होमबहादुर राउतलगायतले बिदाइ गरेका थिए ।
