काठमाडौँ — सूर्य नेपाल च्यालेन्ज गल्फको तेस्रो दिन बिहीबार रवि खड्का पुनः शीर्षस्थानमा फर्केका छन् । उनले १ अन्डर ६७ को कार्ड बनाउँदा समग्रमा ३ अन्डर २ सय १ सहित शीर्षस्थानमा उक्लिएका हुन् । उनी पहिलो दिन पनि अगाडि थिए ।

रविले साबिक विजेता भुवन नगरकोटीलाई २ स्ट्रोकले पछि पारेका छन् । १ अन्डर ६७ सहित समग्रमा १ अन्डर २०३ को स्कोरसहित भुवन दोस्रो स्थानमा रहे । २ ओभर ७० मा दिनको खेल सकेका भुवनकुमार रोक्का समग्रमा इभन पार २ सय ४ सहित तेस्रो स्थानमा छन् ।

एमेच्योर खेलाडी सदभाव आचार्यले बिहीबार २ ओभर ७० मा खेल टुंग्याए । उनी समग्रमा १ ओभर २ सय ५ को नतिजामा चौंथो स्थानमा रहे । एमरच्योरतर्फ उनी शीर्षस्थानमै छन् ।

सूर्य नेपाल गल्फ टुर २०२२/०२३ अन्तर्गत छैटौं प्रतियोगितामा दिनेश प्रजापति समग्रमा २ ओभर २ सय ६ सहित पाँचौं स्थानमा छन् । उनले ३ ओभर ७१ मा खेल सके । नेपाल नम्बर एक एमरच्योर गल्फर सुभाष तामाङ खराब प्रदर्शन गर्दै ४ ओभर ७२ मा खेल टुंग्याउँदा समग्रमा ३ ओभर २ सय ७ सहित छैटौं स्थानमा पुगेका छन् । एमरच्योरतर्फ उनी सदभावभन्दा २ स्ट्रोकले पछि रहे ।

समग्रमा ६ ओभर २ सय १० स्कोर जोडेका दीपक मगर र धनबहादुर थापाले संयुक्त सातौं स्थान बाँडे । दीपकले ७ ओभर ७५ र दोस्रो दिनका लिडर धनले ९ ओभर ७७ को बिर्सनलायक प्रदर्शन गरे । जयराम श्रेष्ठ, सञ्जय लामा, शिवराम पौडेल र एमरच्योर खेलाडी युवराज भुजेल संयुक्तरुपमा नवौं स्थानमा छन् । उनीहरूले समग्रमा ८ ओभर २ सय १२ स्कोर गरे ।

रविले फ्रन्ट नाइन इभन पार ३४ मा सके । उनले पहिलो र चौथो होलमा बर्डी प्रहार गर्दा आठौं र नवौं होलमा बोगी सामना गरे । यसपछि १०, १३ र १७ औं होलमा एक–एक शट बचाए । तर ३ पारको १२ औं होलमा डबल बोगी खेप्दा ब्याक नाइन १ अन्डर ३३ मा टुंग्याएका थिए ।

भुवनले चौथो र आठौं होलमा बर्डी प्रहार गरे । सातौं र नवौं होलमा एक–एक शट खेर फाल्दै फ्रन्ट नाइन इभन पार ३४ मा सकेका थिए । ब्याक नाइन १ अन्डर ३३ मा पुरा गर्ने क्रममा १०, १२ र १४ औं होलमा तीन बर्डी प्रहार गरे । ११ र १७ औं होलमा एक–एक शट प्रहार गरे ।

भुवन कुमार रोक्काले पहिलो होलमा बर्डी प्रहार गर्दा नवौं होलमा बोगीको सामना गर्दै फ्रन्ट नाइन इभन पार ३४ मा सकाए । यसपछि दसौं र पन्ध्रौं होलमा एक–एक शट खेर फाले भने १२ र १६ औं होलमा बर्डी प्रहार गरे । तर ४ पारको १८ औं होलमा डबल बोगी खेप्दै ब्याक नाइन २ ओभर ३६ मा पूरा गरे ।

सदभावले पहिलो होलमा बर्डी प्रहार गरे । नवौं होलमा एक शट खेर फाले र फ्रन्टनाइन इभन पार ३४ मा टुंग्याए । ब्याक नाइन भने नाटकीय बन्यो । ११ औं होलमा एक शट खेर फाल्दा ५ पारको १३ औं होलमा इगलको सफलता पाए । तर ३ पारको १५ औं होलमा ट्रिपल बोगी खेपे । १७ औं होलमा एक शट बचाए पनि १८ औं होलमा बोगी प्रहार गरे ।

प्रोफेसनल गल्फर्स एसोसिएसन नेपालले सूर्य नेपाल प्रालिको प्रायोजनमा आयोजना गरेको प्रतियोगितामा ३७ खेलाडीले प्रतिस्पर्धा गरिरहेका छन् ।