कान्तिपुर वेबसाईट
AdvertisementAdvertisement
२१.१२°C काठमाडौं
काठमाडौंमा वायुको गुणस्तर: ९७

एपीएफलाई हराउँदै केरलाको लुका सकर विराट गोल्डकपको फाइनलमा

विनोद भण्डारी

विराटनगर — साविक विजेता एपीएफलाई टाईब्रेकरमा हराउँदै भारत केरलाको लुका सकर फुटबल क्लब पहिलो सहभागितामै सातौं विराट गोल्डकप फुटबल प्रतियोगिताको फाइनल प्रवेश गरेको छ । मंगलबार सहिद मैदानको फ्लड लाइटमा निर्धारित ९० र अतिरिक्त ३० मिनेटको खेल गोलरहित भएपछि खेलको छिनोफानो टाईब्रेकरबाट गर्दा लुका सकरको पक्षमा ४–२ गोलको नतिजा निस्कियो ।

एपीएफलाई हराउँदै केरलाको लुका सकर विराट गोल्डकपको फाइनलमा

केरलाको प्रिमियर लिगको पाँचौ स्थानमा रहेको लुका सकरले जितसँगै २० लाख १५ हजार रुपैयाँ पुरस्कार राशिका लागि बिहीबार आयोजक विराटनगर सिटीसँग प्रतिस्पर्धा गर्ने छ । उपविजेताले १० लाख १५ हजार पाउने छ । केरलाले क्वाटरफाइनलमा पनि संकटा क्लबलाई सडनडेथमा ८–७ गोलले पन्छाउँदै अन्तिम चारको यात्रा गरेको थियो । विराटनगरले जावलाखेललाई २–१ गोलले हराउँदै उपाधि यात्रा गरिसकेको छ ।

टाईब्रेकरमा केरलाका लागि पाउल ओपार, अश्विन लालु, मोहमद रफि र कार्लेसको प्रहार गोलमा परिणत हुँदा कियामुव हेफनको प्रहारलाई एपीएफका गोलकिपर राजु नगरकोटीले रोकेका थिए । विशाल स्याङ्तान र गोलकिपर राजु नगरकोटीको प्रहार विफल हुँदा एपीएफ उपाधि रक्षा गर्न असफल रह्यो । दिपेश धिमाल र सविन गुरुङको प्रहारमात्र गोलमा परिणत भएको थियो । नगरकोटीको प्रहार पोष्टको माथिल्लो वारमा लागेर फर्किएको थियो भने टिमका तर्फबाट विशालले गरेको पहिलो प्रहारलाई केरलाका गोलरक्षक सनफेनले उत्कृष्ट रोकेर टिमलाई उपाधि यात्रामा पुर्‍याए । उनी खेलको म्यान अफ द म्याच हुँदै ११ हजार पुरस्कार थापे ।

विपक्षीलाई दबाबमा राखेर खेलेकको एपीएफले निर्धारित र अतिरिक्त समयमा दर्जन बढी बुनेको पोष्ट आक्रमणमा गोल गर्न चुक्दा खेलको निर्णय टाईब्रेकरबाट गर्नु परेको थियो । खेलको ९ औं मिनेटमा एपिएफका हरि कार्कीको कर्नर भलीमा अर्मान्द बेडमले गरेको हेडिङ पोष्ट बाहिरिँदा गोलको अवसर गुमाउँदा उसको दुर्भाग्यको संकेत देखा परेको थियो । त्यसबेला केरलाका गालकिपर मोहमद सनफेर पोष्टको विपक्षी क्षेत्रमा बिट भएका थिए ।

१४ औं मिनेटमा एपीएफका पेपेको क्रसमा बुद्धिमान राईले डिबक्सबाट गरेको सशक्त प्रहारलाई केरलाका गोलकिपर सनफेनले उत्कृष्ट बचाउ गर्दै टिमको संकट टारेका थिए ।

केरलाले खेलको पहिलो हाफमा एक पटकमात्र पोष्ट आक्रमण गरेर डिफेन्स खेलेको थियो । उसकका एकमल सानले ४० औं मिनेटमा गरेको पोष्ट आक्रमण बाहिरिएको थियो ।

खेलको ६० मिनेटमा एपीएफका पोउटको प्रहारलाई केरलाका गोलकिपर सनफेनले क्याच गर्ने क्रममा ड्रप भएको बललाई युवराज खड्काले टच गर्न नसक्दा एपीएफले गोलको उत्कृष्ट अवसर गुमाएको थियो । ७३ औं मिनेटमा सविन थापाको पासमा युवराजले पेनाल्टी क्षेत्रबाट गरेको प्रहार पोष्ट माथिवाट बाहिरिँदा निर्धारित समयमा एपीएफले अग्रता लिने अवसर गुमाएको थियो ।

केरला प्रिमियर लिगको पाँचौ स्थानमा रहेको लुका सकरले दोस्रो हाफमा पनि एक पटकमात्र पोष्ट आक्रमण बुन्यो । उसको पाउल ओपारले ६९ औं मिनेटमा पेनाल्टी क्षेत्रमा दिएको क्रसलाई अकम सनको प्रहार पोष्ट बाहिरिँदा गोलको अवसर गुमेको थियो । त्यसलगत्तै छितिजले ३० यार्डबाट गरेका प्रहार पोष्ट बाहिर जाँदा खेल अतिरिक्त समयपछि टाईब्रेकरमा धकेलिएको थियो ।

प्रकाशित : चैत्र १४, २०७९ २२:२९
प्रतिक्रिया
पठाउनुहोस्
जनताको राय

मंसिरदेखि दूधको भुक्तानी नपाएपछि विरोधमा उत्रिएका किसानमाथि प्रहरीले धरपकड गरेकोबारे तपाईंको के टिप्पणी छ ?

x