पाँचथर — याङवरक गाउँपालिका पाँचथरको कुम्मायक गाउँपालिकामा जारी चौथो 'कुम्मायक गोल्डकपको फाइनलमा प्रवेश गरेको छ । मंगलबार सम्पन्न अन्तिम सेमीफाइनल खेलमा प्रतिस्पर्धी मिक्लाजुङ गाउँपालिकालाई टाइब्रेकर मा ६–५ गोल अन्तरले हराउँदै याङवरकले फाइनलको यात्रा सुरक्षित गरेको हो ।

निर्धारित समयमा ३–३ गोल बराबरीमा खेलेका दुवै टिमले थप गरिएको समयमा पनि निर्णायक गोल गर्न नसकेपछि टाइब्रेकरमार्फत निर्णय लिइएको थियो ।

आजको खेलमा याङवरकका टिम क्याप्टेन सुमन योङ्यालाई उत्कृष्ट खेलाडी घोषणा गर्दै नगदसहित पुरस्कृत गरियो । विजेता याङवरकले बुधबार हुने फाइनल खेलमा उपाधिका लागि फाल्गुनन्द गाउँपालिकाबीच प्रतिस्पर्धा हुने आयोजक कुम्मायक स्पोटिङ क्लबका अध्यक्ष रोहन घिमिरेले जानकारी दिए ।

प्रतियोगिताको विजेता टिमले नगद एक लाख ११ हजार एक सय ११ नगद पुरस्कारसहित तीन वर्षे रनिङ ट्रफी, मेडल र प्रमाणपत्र प्राप्त गर्नेछ । उपविजेताले नगद ५५ हजार पाँच सय ५५ रुपैयाँसहित ट्रफी मेडल र प्रमाणपत्र पाउने छन् । प्रतियोगिता चैत ११ गते सुरु भएको थियो ।