जावलाखेललाई हराउँदै आयोजक विराटनगर फाइनलमा
विराटनगर — आयोजक विराटनगर सिटी सातौं विराट गोल्डकप फुटबल प्रतियोगिताको फाइनलमा पुगेको छ । सहिद मैदानको फ्लड लाइटमा सोमबार भएको पहिलो सेमिफाइनल खेलमा विराटनगरले जावलाखेल यूथ क्लबलाई २–१ गोलले निराश गर्दै उपाधिको दावेदारी प्रस्तुत गरेको हो ।
विराटनगरले लुका सकर कोलकाता र एपीएफ बीचको विजेतासँग बिहीबार उपधिका लागि प्रतिस्पर्धा गर्नेछ । विजेताले २० लाख १५ हजार र उपविजेताले १० लाख १५ हजार पुरस्कार पाउने छन् ।
गत वर्षको लिग विजेता मछिन्द्र क्लबको सेटलाई मैदानमा उतारेको आयोजक विराटनगरका लागि दुबै गोल दोस्रो हाफमा सम्भव भयो । उसका लागि खेलको ६७ औं मिनेटमा स्टेफन र ८७ औं मिनेटमा अविषेक गुरुङले गोल गर्दै टिमलाई उपाधि यात्रा गराए ।
स्टेफनले जाबलाखेलका गोलकिपर अनिल देउलाबाट रिबाउण्ड भएको बललाई पोष्टको दिसा दिएका थिए । विमल धर्तीमगरको प्रहारमा देउलाले पञ्ज गरेर पेनाल्टी क्षेत्रमा फर्काएको बललाई स्टेफनले जाली चुमाएर टिमलाई अग्रता दिलाए । उनी खेलको म्यान अफ द म्याच हुँदै ११ हजार रुपैयाँ हात पार्न सफल भए ।
एक गोलले पछिपरेपछि आक्रामक खेल प्रस्तुत गरेको जावलाखेलले ८६ औं मिनेटमा काउण्टर आक्रामणमा दोस्रो गोल बेहोरेको थियो । जावलाखेलका हिसुव थपलियाको प्रहारलाई विराटनगरका गोलकिपर विशाल श्रेष्ठले पञ्ज गर्दै मैदानमा फर्काएको बललाई विमलले मध्य भागबाट दिएको लामो पासमा अविषेकले ३० यार्डबाट गरेको सशक्त प्रहारमा जावलाखेलका गोलकिपर देउला प्रतिक्रियाविहीन देखिए ।
जावलाखेलका लागि इन्जुरी समयको अन्तिम क्षणमा हिसुव थपलियाले सान्त्वना गोल फर्काएर गोल अन्तर घटाए । उनले फोडेको क्रसलाई सदुपयोग गरेका थिए ।
खेलको २७ औं मिनेटमा विराटनगरका विमलको कर्नर भलीमा जावलाखेलका गोलकिपर देउला बिट भएको स्थितिमा ओलावालको हेडिङ पोष्टमाथिबाट बाहिरिँदा विराटनगरले सुरुवाती अग्रता लिने अवसर गुमाएको थियो । ३३ औं मिनेटमा स्टेफनको पासमा विमलको सटिक प्रहार फ्रेममा नपर्दा अर्को गोलको अवसर खेर गएको थियो ।
खेलको १७ औं मिनेटमा जावलाखेलका सुनिल खड्काले विराटनगरका गोलकिपर विशाललाई बिट गर्न नसक्दा खेलमा अग्रता लिने अवसर गुमाएका थिए । खड्काले वान भर्सेस वानमा गरेको प्रहारलाई विशालले उत्कृष्ट बचाउ गर्दै टिमको संकट टारेका थिए । खेलको ५९ औं मिनेटमा विराटनगरका स्टेफनले जावलाखेलका एनकोटोलाई डिबक्स बाहिर फल खेल्दा पाएको फ्रिकिकमा हिसवुको प्राहार पोष्टको माथिल्लो बारमा लागेर मैदानमा फर्कँदा जावलाखेलको र्दूभाग्य देखिएको थियो । त्यसबेला विराटनगरका गोलरक्षक विशाल बिट भएका थिए ।
खेलको ८९ औं मिनेटमा जावलाखेलका कप्तान सिमन्त थापाको प्रहार बाहिरिँदा खेलमा फर्कने अवसर गुमेको थियो । लगैत सुनिल खड्काले डिबक्सबाट गरेको सशक्त प्रहार विराटनगरका गोलरक्षक विशालले बचाउ गर्दै टिमको अग्रता कायम राखेका थिए । विराटनगरले २०६८ को विजेता नेपाल पुलिसको र जावलाखेलले आर्मीको चुनौती पन्छाउँदै अन्तिम चारको यात्रा गरेका थिए । मंगलबार साविक विजेता एपीएफ र भारतको लुका सकर कोलकाताबीच अन्तिम सेमिफइनल खेल हुनेछ ।
प्रकाशित : चैत्र १३, २०७९ २१:४७
