कुम्मायक गोल्ड कप : मिक्लाजुङ र फाल्गुनन्द सेमिफाइनलमा
पाँचथर — पाँचथरको कुम्मायक गाउँपालिका केन्द्र यासोकमा जारी चौथो 'कुम्मायक गोल्डकप' प्रतियोगिताअन्तर्गत आइतबार सम्पन्न दुइटा खेलमा आ-आफ्ना प्रतिस्पर्धीलाई हराउँदै मिक्लाजुङ र फाल्गुनन्द गाउँपापालिकाका टिम सेमिफाइनमा प्रवेश गरेका छन् ।
पहिलो खेलमा फिदिम नगरपालिकालाई हराँउदै मिक्लाजुङ र हिलिहाङलाई हराउँदै फाल्गुनन्द सेमिफाइनलमा प्रवेश गरेका हुन् । फिदिम नगरपालिकालाई १–४ गोलको फराकिलो अन्तरले हरायो भने फाल्गुनन्दले फिदिमलाई २–४ गोल अन्तरले पराजित गर्यो ।
आइतबारको खेलमा मिक्लाजुङका विजय तामाङ र फाल्गुनन्दका रितिक आङ्देम्बे उत्कृष्ट खेलाडी घोषित भए । सोमबार मध्याह्न १२ बजे याङवरक गाउँपालिका र तुम्बेवा गाउँपालिकाबीच पहिलो चरणको अन्तिम खेल सञ्चालन गर्ने आयोजकको तालिका छ । यसैगरी दिउँसो ३ बजे कुम्मायक गाउँपालिका र फाल्गुनन्द गाउँपालिकाबीच पहिलो सेमिफाइनल खेल सञ्चालन गरिने आयोजक कुम्मायक स्पोर्टिङ क्लबका अध्यक्ष रोहन घिमिरेले जानकारी दिए ।
प्रतियोगिताको फाइनल चैत १५ गते हुनेछ । प्रतियोगितामा प्रथम हुने टिमले नगद एक लाख ११ हजार एक सय ११ नगद पुरस्कारसहित तीन वर्षे रनिङ ट्रफी, मेडल र प्रमाणपत्र प्राप्त गर्नेछ ।
यस्तै उपविजेता टिमले नगद ५५ हजार पाँच सय ५५ रुपैयाँसहित ट्रफी मेडल र प्रमाणपत्र पाउने छन् । प्रतियोगिता पृथ्वी मावि यासोकको खेल मैदानमा सञ्चालन भइरहेको छ ।
