काठमाडौँ — गल्फर टासी छिरिङ दोङले गोकर्ण गल्फ क्लबमा शनिबार इन्डियन एम्बासडर आमन्त्रण गल्फ प्रतियोगिताको उपाधि जितेका छन् ।

दुई ह्यान्डिक्यापसँग खेल्दै टासीले ४० स्टेबलफोर्ड अंक बटुलेर उपाधि जिते । टासी छिरिङ ३७ अंकसाथ उपविजेता भए । सद्भाव आचार्यले ३७ ग्रस अंक जोडेर बेस्ट ग्रसको अवार्ड जितेका छन् । लङ्गेस्ट ड्राइभको अवार्ड पनि उनैले जिते ।

महिलातर्फ तारा कार्की चित्रकार ३८ अंकसहित विजेता भइन् । गीता गुरुङ ३३ अंकसहित उपविजेता भइन् । सिनियर (६० वर्षभन्दा माथि) तर्फ मेजर विजय मोक्तान ३५ अंकसहित विजयी भए । सिनियर मोस्ट गल्फरको अवार्ड पूर्वप्रधानसेनापति प्रज्ज्वल शमशेर राणाले पाए ।

उत्कृष्ट फ्रन्टनाइनको अवार्ड पवित्रकुमार कार्की र उत्कृष्ट ब्याकनाइन अवार्ड श्याम तामाङले जिते । विजय श्रेष्ठ इन्हाउसले चार बर्डीसहित सर्वाधिक बर्डीको अवार्ड पाए । लेफ्टिनेन्ट कर्णेल निश्चयजंग रायमाझीले मोस्ट पार अवार्ड जिते । नोर्बुछिरिङ शेर्पाले क्लोजेस्ट टु द पिन अवार्ड पाए ।

समापनमा हालै सम्पन्न बंगलादेश एमेच्योर गल्फ च्याम्पियनसिपमा टिम इभेन्टमा स्वर्ण पदक जितेका सुवास तामाङ र सद्भाव आचार्यलाई सम्मान गरिएको थियो । युवा महिला गल्फर कश्मिरा शाह र जुनी गुरुङलाई जनही ५० हजार रुपैयाँबराबरको छात्रवृत्ति भारतीय दूतावासद्वारा प्रदान गरिएको छ ।

प्रतियोगितामा १२ महिला गल्फरसहित ९५ गल्फरको सहभागिता थियो । विजेतालाई नेपालका लागि भारतीय राजदूत नवीन श्रीवास्तव, रक्षा सहचारी कर्णेल अमित शर्मा, गोकर्ण गल्फ क्लबका अध्यक्ष सुहृद घिमिरे, क्याप्टेन जोसेफ नाथन र नेपाल एसबीआई बैंकका प्रमुख कार्यकारी अधिकृत दीपक कुमार डेले पुरस्कार प्रदान गरेका थिए ।

गैरगल्फर्सबीचको पटिङ प्रतियोगितामा सारिका शर्मा विजयी भइन् भने काउन्टब्याकमा ऋतिका डे दोस्रो र निधि श्रीवास्तव तेस्रो भए ।