सीईसीलाई भीएनसीएको सहयोग

दुई वर्षअघि संन्यासको घोषणा गरेयता पारसले काठमाडौंको बालुवाटारमा सीईसी सञ्चालन गरिरहेका छन् । नेप्लिज एसोसिएसन अफ भिक्टोरियोको निमन्त्रणामा १८ औं न्याभ कप क्रिकेट प्रतियोगिताको गुडविल एम्बासडरको भूमिकामा पारस मेलबर्न आएका छन् । उनले नेपाली क्रिकेटरलाई अस्ट्रेलिया क्रिकेटसँग जोड्ने विषयमा नेपाल समुदायसँग छलफल गरिरहेका छन् ।

भीएनसीएद्वारा आयोजित कार्यक्रममा उनले अस्ट्रेलियामा नेपाली समुदायले स्थापना गरेको क्रिकेट क्लबहरू बलियो भएर नेपाली क्रिकेटरका लागि क्रिकेट अस्ट्रेलियासँग सम्बन्ध स्थापित गर्नुपर्नेमा जोड दिए ।

भीएनसीएका अध्यक्ष बस्नेतसहित उपाध्यक्ष सन्दीप बोगटी, कोषाध्यक्ष सचिन बुढाथोकी, संस्थापक अध्यक्ष यसवन्त सुवेदी, सल्लाहकार राजन मास्के र संरक्षक विनीत शर्माले पारसलाई सम्मान गरेका थिए । यसवन्तसहित अभिषेक केसी, विवेक श्रेष्ठ मिलेर भीएनसीएको स्थापना गरेका थिए ।

नेपालले सात पटक आईसीसी यू–१९ विश्वकप खेलिसकेको छ । नेपालबाट ३–३ पटक विश्वकप खेल्ने थोरै खेलाडीको सूचीमा पारस र यसवन्त रहेका छन् । यसवन्तले २००२, २००४ र २००६ तथा पारसले २००४, २००६ र २००८ मा भएको यू–१९ विश्वकप खेलेका थिए । २००९ यता यसवन्त अस्ट्रेलियामा आई मेलबर्नलाई कर्मथलो बनाइरहेका छन् ।