नवयुगको उत्कृष्ट गोल

विशेषगरी नवयुगको गोल उत्कृष्ट रह्यो । कप्तान एवं गोलकिपर किरण चेम्जोङले दिएको बललाई मैदानको मध्यभाग नजिक नियन्त्रण गर्दै नवयुगले प्रहार गरेको ‘भली’ मा बलले सिधै जाली चुम्न पुगेको थियो । उनले करिब ३५ यार्डबाट सशक्त रूपमा प्रहार गरेको बललाई पाहुना गोलकिपर सायसाभाथ सौकापोनले ठम्याउनै सकेनन् र आकर्षक गोलमा परिणत भएपछि नेपालले ५६ औं मिनेटमा २–० को अग्रता लियो । अन्तर्राष्ट्रिय खेलमा उनको यो आठौं गोल हो ।

नवयुगको गोलबारे लाओसको मुख्य प्रशिक्षक माइकल वेसले भने, ‘गोलकिपरबाट आएको राम्रो बलमा राम्रो गोल । राम्रो भली ।’ राष्ट्रिय टिमका लागि झन्डै दुई वर्षप्छि गोल गरेका नवयुगले पाँचौं मिनेटमै आयुष घलानको क्रसमा पाएको बलमा भने पोस्ट नजिकबाट गरेको हेडर प्रयास फितलो भएको थियो ।

रंगशालामा ५,१७० दर्शकसामु गोलको खाता भने डिफेन्डर अनन्त तामाङले खोलेका थिए । उनले नवीन लामाको कर्नरमा ३० औं मिनेटमा हेडर गोल गर्दै नेपाललाई अगाडि बढाएका थिए । त्यसमा नवीनले बल प्रहार गरेपछि अगाडि बढ्दै अनन्त बलको पहुँचमा पुगेका थिए र गोलकिपरलाई प्रतिक्रिया जनाउने कुनै अवसर नदिई पोस्टमा छिराइदिए । उनले लाओसविरुद्ध पछिल्ला दुवै खेलमा गोल गरेका छन् । यसअघि सन् २०१६ मा मलेसियाको कुचिङमा भएको एएफसी सोलिडारिटी कपको सेमिफाइनलमा २–२ को बराबरीपछि टाइब्रेकरमा नेपालले ३–० ले जितेको खेलमा पनि अतिरिक्त समयमा हेडर गोल गरेका थिए ।

अन्तर्राष्ट्रिय करिअरमा तेस्रो गोल गरेका अनन्तले लाओसविरुद्धको हेडर गोलबारे भने, ‘योजना त्यस्तै थियो । हामीले अभ्यासमा पनि प्रयास गरेका थियौं, राम्रै भइरहेको थियो । कोचले दिएको निर्देशनमा त्यही ‘मुभमेन्ट’ मा गोल भयो । खुसी लागिरहेको छ ।’ नेपालले दशरथ रंगशालामा लगातार पाँचौं जित हात पारेको हो । यही मैदानमा नेपालले गत वर्ष मौरिससलाई दुई खेलमा समान १–०, असोजमा बंगलादेशलाई ३–१ र कात्तिकमा पाकिस्तानलाई १–० ले पराजित गरेको थियो ।

फिफा वरीयतामा १२ स्थानमुनि रहेको पूर्वी एसियाली देशको टिमविरुद्ध नेपालको प्रदर्शन भने खासै गतिलो भएन । बल नियन्त्रणमा लाओसको पकड रह्यो । इटालियन प्रशिक्षक भिन्सेन्जो अल्बर्टो एनेसको प्रशिक्षणमा पहिलो खेलमा नेपाललाई नियमित ५–७ पास खेल्न पनि गाह्रो भयो । जर्मन प्रशिक्षक वेसले सम्हालेको टिमलाई दुई अवसरमा अनन्त तामाङ र रोहित चन्दले गोल गर्नबाट रोकिदिए । राउन्डग्लास पन्जाबलाई आई लिग च्याम्पियन बनाए फर्किएका कप्तान किरणलाई पाहुना टिमले गोलपोस्टमा गतिलो चुनौती दिन सकेन । आक्रामक नदेखिए पनि लाओसले नेपाली डिफेन्सलाई भने पछाडि नै व्यस्त राख्यो ।

‘हामीले धेरै नयाँ खेलाडीसँग पहिलो खेल जितेका छौं,’ प्रशिक्षक एनेसले भने, ‘राष्ट्रिय टिम धेरै समयपछि खेलमा फर्किंदा तीन दिनको तयारीमा लाओसविरुद्ध खेलेका छौं । यू–२३ का १० खेलाडी छन् र राष्ट्रिय टिममा धेरै खेलाडी नयाँ हुन् । यो यात्राको सुरुआतमा हात पारेको जित महत्त्वपूर्ण छ ।’ उनले थपे, ‘लाओस गत वर्षदेखि प्रगति गरिरहेको टिम हो । उसको बल पोजेसन राम्रो थियो । तर, आज (बुधबार) हामीले गरेका छौं । हाम्रो ट्याक्टिकल अनुशासन उत्कृष्ट रह्यो । काउन्टरमा राम्रो भयो । हामीले मिहिनेत गरेर अझै राम्रो गर्न सक्छौं ।’

उनले नवयुगको गोलबारे भने, ‘उत्कृष्ट गोल । पहिलो हाफमा एउटा गोल पनि चुकेको थियो । अब अर्को खेल (भुटानविरुद्ध मंगलबार) का लागि तयार हुनुपर्छ ।’ नवयुगको पासमा पेनाल्टी क्षेत्रमा खाली रहेका आयुषले ७२ औं मिनेटमा प्रहार गरेको बल पनि पोस्टमाथि गएको थियो ।

म्यान अफ द म्याच घोषित अनन्तले आफ्नो टिमको प्रदर्शनबारे बोले, ‘त्यति सन्तोषजनक थिएन । हामीसँग तयारी गर्ने समय धेरै थिएन र टिममा धेरै नै नयाँ खेलाडी आएका छन् । सोचेअनुसार खेल्न सकेनौं । पोजिसनको हिसाबले लाओसले वर्चस्व राख्यो । हामी ‘कम्प्याक्ट डिफेन्स’ राखेर खेल्यौं । अलि डिप (पछाडि) बसेर खेलेका थियौं । त्यतिसारो बल पोजेसन राख्न नसकेपनि रिजल्ट हाम्रो हातमा आएको छ । राम्रै मान्नुपर्छ ।’ तीन देश सहभागी प्रतियोगितामा जितसँगै नेपाली टिम फाइनलनजिक पनि पुगेको छ । प्रतियोगिताको अर्को टिम भुटानले लाओसविरुद्ध शनिबार खेल्नेछ ।

चार खेलाडीको डेब्यु

प्रशिक्षक एनेसले नेपाली टिमसँग आफ्नो ‘डेब्यु’ मा चार खेलाडीलाई अन्तर्राष्ट्रिय खेलमा पहिलोपल्ट मैदानमा उतारेका छन् । २३ सदस्यीय टिममा नयाँ ६ खेलाडीलाई स्थान दिएका उनले राइट–ब्याक सनिश श्रेष्ठ, मिडफिल्डर मणिकुमार लामा, फरवार्डद्वय दीपकराज सिंह ठकुरी र सुमित श्रेष्ठलाई डेब्यु दिएका हुन् । पहिलो रोजाइमै उत्रिएका एपीएफका सनिश पूरा समय खेले । एपीएफकै मणिले सात वर्षपछि टिममा फर्किएका नवीन लामालाई ७३ औं मिनेटमा स्थानान्तरण गरे । सातदोबाटो युवाका दीपकले ८३ औं मिनेटमा नवयुगको स्थान लिए । मनाङ मर्स्याङ्दीका सुमित तीन मिनेटको इन्ज्युरी समयको अन्तिम मिनेटमा आयुषको स्थानमा खेलेका थिए ।