सुदूरपश्चिम–११ तिलोत्तमा गोल्डकपको फाइनलमा प्रवेश
तिलोत्तमा — सुदूरपश्चिम–११ रुपन्देहीमा जारी तिलोत्तमा गोल्डकप फुटबल प्रतियोगिताको फाइनलमा प्रवेश गरेको छ । बुटवल–११ देवीनगरस्थित एन्फा टेक्निकल सेन्टरको मैदानमा बुधबार भएको पहिलो सेमिफाइनलमा थ्रीस्टार क्लबलाई १–० गोलले पराजित गर्दै सुदूरपश्चिम–११ ले उपाधि यात्रा तय गरेको हो ।
दुबै टोलीले गोलको धेरै अवसर पाए पनि सदुपयोग गर्न नसक्दा पहिलो हाफ गोलरहित बराबरीमा सकिएको थियो । थ्रीस्टारलाई सुरुदेखि नै दबाबमा राखेको सुदूरपश्चिमले अन्तत दोस्रो हाफमा फागुराम थारुको गोलको मद्दतमा खाता खोल्यो । सुदूरपश्चिमका लागि थारुले दोस्रो हाफको ३९ औं मिनेटमा गरेको गोल नै निर्णायक बन्यो । बुधबारको खेलमा सुदूरपश्चिमका विष्णु चौधरी म्यान अफ द म्याच घोषित भए । उनले ११ हजार १११ रुपैयाँ प्राप्त गरे ।
सुदूरपश्चिम–११ ले उद्घाटन खेलमा रुपन्देही–११ लाई ३–१ गोल अन्तरले पराजित गर्दै सेमिफाइनलमा स्थान बनाएको थियो । १५ औं संस्करणको तिलोत्तमा गोल्डकप फुटबल प्रतियोगिताको साबिक विजेता थ्रीस्टारले गोलको अवसर सदुपयोग गर्न नसक्दा सेमिफाइनलमै रोकिएको हो । खेलपछि थ्रीस्टारका प्रशिक्षक मेघराज केसीले आफूहरु शहीद स्मारक ए डिभिजन लिगमा केन्द्रित भएका कारण बुधबारको खेल गुमाउनु परेको बताए । थ्रीस्टारले हिमालयन शेर्पा क्लबलाई १–० गोलले हराएर सेमिफाइनलमा प्रवेश गरेको थियो ।
प्रतियोगिताअन्तर्गत दोस्रो सेमिफाइनलमा बिहीबार मनाङ मर्स्याङ्दी र फ्रेण्ड्स क्लबबीच प्रतिस्पर्धा हुनेछ । सुदूरपश्चिमले अब उपाधिका लागि बिहीबार हुने सेमिफाइनलको विजेतासँग प्रतिस्पर्धा गर्नेछ । तिलोत्तमा गोल्डकप फुटबलको उपाधि भिडन्त भने आगामी शनिबार हुनेछ ।
प्रतियोगितामा नेपाल पुलिस, सशस्त्र प्रहरीको एपीएफ, मनाङ मर्स्याङ्दी, रुपन्देही–११, थ्रीस्टार, हिमालयन शेर्पा, फ्रेन्डस क्लब र सुदूरपश्चिम–११ ले प्रतिस्पर्धा गर्नेछन् । दुई विभागीयसहित ८ टीम सहभागी प्रतियोगिताको विजेताले ११ लाख ११ हजार एक सय ११ रुपैयाँ र उपविजेताले ५ लाख ५५ हजार ५ सय ५५ रुपैयाँ प्राप्त गर्नेछ ।
सर्वोत्कृष्ट खेलाडीले एक लाख रुपैयाँ, एक थान मोटरसाइकल पुरस्कार पाउँदा उत्कृष्ट फरवार्ड, गोलरक्षक, मिडफिल्डर, डिफेन्स र कोचलाई जनही ३० हजारका दरले नगद पुरस्कार प्रदान गरिने आयोजक रुपन्देही जिल्ला फुटबल संघले जनाएको छ । त्यस्तै, प्रत्येक खेलमा म्यान अफ द म्याचलाई ११ हजार १ सय ११ रुपैयाँ पुरस्कार प्रदान गरिने संघले जनाएको छ ।
प्रकाशित : चैत्र ८, २०७९ १८:२०
