सागका दोहोरो स्वर्णधारी प्यारागनका दूत
काठमाडौँ — १३ औं दक्षिण एसियाली खेलकुदका दोहोरो स्वर्ण विजेता कराते खेलाडी मण्डेकाजी श्रेष्ठले प्यारागन पब्लिक स्कुलले दुई वर्षका लागि ब्रान्ड एम्बासडरमा नियुक्त गरेको छ ।
एम्बासडर नियुक्तिसँगै मण्डेकाजीलाई मासिक रूपमा तलब दिनुका साथै विभिन्न अन्तर्राष्ट्रिय प्रतियोगितामा सहभागिता जनाउँदा विद्यालयले सहयोग गर्नेसमेत सहमति भएको छ । सहमतिपत्रमा हस्ताक्षर गर्दै विद्यालयका प्रधानाध्यापक श्रीमती बिना बानु र प्रबन्ध निर्देशक साकिर उद्दिनले खेलकुदबाट मुलुकका लागि योगदान गर्ने व्यक्तिलाई कदर गर्नेक्रममा विद्यालयसँग आबद्ध गराउन पाउनु अत्यन्तै गर्वको विषय भएको बताए ।
करातेका खेलाडी मण्डेकाजीले ब्रान्ड एम्बासडर बनेर विद्यालयलाई सहयोग गर्न पाएकामा आफूलाई पनि खुसी महसुस भएको बताए । उनले प्यारागन पब्लिकमा खेलकुदको विकास गर्ने कार्यसँगै शैक्षिक गतिविधिमा संलग्न गराएका विद्यालय परिवारप्रति आभार व्यक्त गरे ।
