मनाङ तिलोत्तमा गोल्डकपको सेमिफाइनलमा

प्रसन्न श्रेष्ठले खेलको ३२ औं मिनेटमा गरेको गोलबाट मनाङले सुरुवाती अग्रता लिएको थियो । पहिलो हाफको अतिरिक्त समयमा चेतनले अर्को गोल थप्दै मनाङको अग्रता दोब्बर पारे । पुलिसका लागि दोस्रो हाफको ८ औं मिनेटमा बुद्धबहादुर तामाङले एक गोल फर्काए पनि जितका लागि पर्याप्त हुन सकेन ।

मंगलबार भएको खेलमा मनाङका चेतनकुमार थारु म्यान अफ द म्याच घोषित भए । उनले ११ हजार १११ रुपैयाँ प्राप्त गरेका छन् । यो जितसँगै मनाङले सेमिफाइनलमा फ्रेण्ड्स क्लबसँगको भेट पक्का गरेको छ ।

सोमबार भएको खेलमा विभागीय टोली सशस्त्र प्रहरीको एपीएफलाई २–१ गोल अन्तरले पराजित गर्दै फ्रेण्ड्सले अन्तिम चारमा स्थान सुरक्षित गरिसकेको छ । फ्रेण्ड्स क्लब १५ औं संस्करणको तिलोत्तमा गोल्डकपको उपाधि विजेता पनि हो ।

प्रतियोगिताअन्तर्गत बुधबारबाट सेमिफाइनलका खेलहरु सुरु हुनेछन् । बुधबार हुने पहिलो सेमिफाइनलमा थ्रीस्टार र सुदूरपश्चिम–११ बीच दिउँसो ३ बजे प्रतिस्पर्धा हुनेछ । सुदूरपश्चिम–११ ले उद्घाटन खेलमा रुपन्देही–११ लाई ३–१ गोल अन्तरले पराजित गर्दै सेमिफाइनलमा स्थान बनाएको थियो । थ्रीस्टारले आइतबारको क्वाटरफाइनलमा हिमालयन शेर्पा क्लबलाई १–० गोलले हराएर सेमिफाइनल यात्रा तय गरेको हो ।

प्रतियोगितामा नेपाल पुलिस, सशस्त्र प्रहरीको एपीएफ, मनाङ मर्स्याङ्दी, रुपन्देही–११, थ्रीस्टार, हिमालयन शेर्पा, फ्रेन्डस क्लब र सुदूरपश्चिम–११ ले प्रतिस्पर्धा गर्नेछन् । दुई विभागीयसहित ८ टीम सहभागी प्रतियोगिताको विजेताले ११ लाख ११ हजार १ सय ११ रुपैयाँ र उपविजेताले ५ लाख ५५ हजार ५ सय ५५ रुपैयाँ प्राप्त गर्नेछ ।

सर्वोत्कृष्ट खेलाडीले १ लाख रुपैयाँ १ थान मोटरसाइकल पुरस्कार पाउँदा उत्कृष्ट फरवार्ड, गोलरक्षक, मिड फिल्डर, डिफेन्स र कोचलाई जनही ३० हजारका दरले नगद पुरस्कार प्रदान गरिने आयोजक रुपन्देही जिल्ला फुटबल संघले जनाएको छ । त्यस्तै, प्रत्येक खेलमा म्यान अफ द म्याचलाई ११ हजार १ सय ११ रुपैयाँ पुरस्कार प्रदान गरिने संघले जनाएको छ ।