बीएमडब्लु वेस्टर्न क्रिकेट क्लबलाई उपाधि
भैरहवा — भैरहवामा सम्पन्न नेपाल टेलिकम रुपन्देही सुपरलिगको उपाधि बीएमडब्लु वेस्टर्न क्रिकेट क्लब, बुटवलले जितेको छ । लुम्बिनी खुकुरी क्लबमाथि ५२ रनको जित निकाल्दै वेस्टर्न उपाधि लिन सफल भएको हो ।
उपाधिसँगै वेस्टर्नले १ लाख रुपैयाँको नगद पुरष्कार र ट्रफी प्राप्त गरेको छ । उपविजेता बनेको लुम्बिनी खुकुरीले ५० हजार रुपैयाँ नगद र ट्रफी प्राप्त गर्यो । सिद्धार्थ रंगशालामा टस जितेर ब्याटिङ गरेको वेस्टर्नले मौसमका कारण ३६ ओभरमा झारिएको खेलमा २२.३ ओभरमा खेल्दै सबै विकेट गुमाएर ९४ रनको झिनो योगफल बनाएको थियो ।
जसमा, अनिलकुमार साहले २६, अनिल खरेलले २४ र देब खनालले २३ रन बनाए । बलिङमा लुम्बिनी खुकुरीका साहव आलमले ५.३ ओभरमा १ मेर्डनसहित १७ रन खर्चेर ६ विकेट लिए । यस्तै, इकलाख वारिसले १ विकेट लिए ।
प्रतिउत्तरमा ९५ रनको विजय लक्ष्यलाई लुम्बिनी खुकुरी २०.१ ओभरमा सम्पूर्ण विकेट गुमाउँदै ५२ रनमै सिमीत हुन पुग्यो । खुकुरीका इकलाख वारिस र संदीप रजालीले सर्वाधिक ८/८ रन बनाए । प्रज्वल थापाले ७ रन मात्रै जोडे । लुम्बिनी खुकुरीलाई सस्तैमा रोक्न बलिङमा वेस्टर्नकन विष्णु पाण्डेले ४.१ ओभरमा १० रन खर्चिंदै सर्वाधिक ५ विकेट लिए ।
उनी म्यान अफ द फाइनल भई पुरष्कृत भए । अनिल खरेल र अभिषेक गौतमले समान २–२ तथा देव खनालले १ विकेट लिए ।प्रतियोगितामा वेस्टर्नका अनिलकुमार साह म्यान अफ द सिरिज भए ।
प्रकाशित : चैत्र ४, २०७९ १९:१९
