ओलम्पियन जितबहादुर र मनीषा सम्मानित
काठमाडौँ — पूर्व ओलम्पियन जितबहादुर केसी र कराते खेलाडी मनीषा चौधरी सम्मानित भएका छन् । हाइड एन्ड सिक किन्डरगार्डेनले आफ्नो १० औं खेलकुद दिवसको अवसरमा पूर्वधावक केसी र १३ औं सागकी कांस्य पदक विजेता मनीषालाई नगद र दोसल्लासहित सम्मानित गरेका हुन् ।
उनीहरूलाई किन्डरगार्डेनकी संस्थापक प्रिन्सिपल कुमद भट्ट र संस्थापक निर्देशक इन्दिरा गौतमले सम्मानित गरे । किन्डरगार्डेनले दुई दिने खेलकुद कार्यक्रमको पहिलो दिन ओलम्पियन केसी र दोस्रो दिन करातेकी मनीषा चौधरीलाई सम्मानित गरेका हुन् । खेलकुद दिवसको पहिलो दिन प्ले ग्रुप र नर्सरीको तथा दोस्रो दिन एलकेजी र युकेजीका विद्यार्थीले दैनिक जीवनमा आधारित रहेर विभिन्न खेलमा प्रतिस्पर्धा गरेको विद्यालयको खेलकुद प्रशिक्षक हरि लामाले जानकारी गराए ।
प्रिन्सिपल भट्टले पुरानो पुस्तादेखि नयाँ पुस्तालाई हरेक वर्ष सम्मानित गर्ने उद्देश्यअनुरुप यस वर्ष ओलम्पियन केसी र करातेकी उदीयमान खेलाडी मनिषालाई सम्मानित गरिएको बताइन् ।
यसअघि हाइड एन्ड सिक किन्डरगार्डेनले १३ औं सागमा स्वर्ण जित्न सफल फुटबलका विकेश कुथु, करातेकी अनु अधिकारी र विप्लवलाल श्रेष्ठसँगै प्रशिक्षक दीपक श्रेष्ठ, कुशल श्रेष्ठ र तारा गुरुङलाई सम्मान गरेको थियो । फुटबलका सन्देश श्रेष्ठ पनि सम्मानित भइसकेका छन् ।
