मिल्स गोल्डकप : उपाधिका लागि सिरहाको प्रतिभा र झापाको ध्रुवतारा भिड्ने
विराटनगर — साविक विजेता सिरहा गोलबजारको प्रतिभा फुटबल क्लब विराटनगरमा जारी तेस्रो मिल्स गोल्डकप फुटबल प्रतियोगिताको फाइनलमा प्रवेश गरेको छ । सिरहाले बिहीबार विराटनगर जुट मिल मैदानमा गाईघाट फुटबल क्लब उदयपुरलाई ३–० गोलले हराउँदै उपाधि रक्षाको यात्रा तय गरेको हो ।
प्रतिभाले उपाधि रक्षाका लागि शनिबार झापाको ध्रुवतारा युवा क्लबसँग प्रतिस्पर्धा गर्नेछ । सिरहाका लागि अब्दुला, बिनु आलेमगर र सिद्धान्त लामाको प्रहार गोलमा परिणत भयो । निकै प्रतिस्पर्धात्मक खेल पहिलो हाफसम्म गोलरहित रह्यो ।
दोस्रो हाफदेखि सिरहाले आक्रमक खेल पक्दै ४४ औं मिनेटमा गोलको खाता खोल्यो । सिद्धान्त लामाले डीबक्सभित्र दिएको पासलाई अब्दुलाले गोलमा परिणत गरेका थिए ।
६२ औं मिनेटमा बिनु आलेमगरले उत्कृष्ट फिनिसिङ गर्दै टिमको अग्रता दोब्बर गरे । उनले बल नियन्त्रण गर्ने क्रममै गाईघाट डिफेन्स निमछिरिङ शेर्पालाई झुक्याउँदै आकर्षक गोल गरी अग्रता दोब्बर बनाएका थिए ।
खेलको ७४ औं मिनेटमा सिद्धान्त लामाले गोल गरे । उनले बिनु आलेमगरले डीबक्सभित्रबाट निकालिदिएको क्रसमा बललाई पोस्टको दिशा दिएका थिए ।
प्रकाशित : चैत्र २, २०७९ १९:५९
