विराट गोल्डकपको पुरस्कार राशि २० लाख
विराटनगर — चैत ९ गतेदेखि सहिद रंगशालामा सुरु हुने छैटौं दिवा-रात्रिकालीन विराट गोल्डकप फुटबल प्रतियोगिताको पुरस्कार राशि २० लाख कायम गरिएको छ । त्यसैगरी उपविजेताले १० लाख रुपैयाँ पाउने छन् ।
यसैगरी प्रत्येक खेलको विजेता टिमले नगद २५ हजार प्राप्त गर्ने पनि बताइएको छ । यस्तै, उत्कृष्ट प्रशिक्षक, उत्कृष्ट गोलकिपर, उत्कृष्ट मिडफिल्डर, उत्कृष्ट डिफेन्डर, उत्कृष्ट फरवार्ड, सर्वाधिक गोलकर्ता र फेयर प्ले टिमलाई पनि नगद पुरस्कारको व्यवस्था गरिएको छ ।
प्रतियोगिता आयोजना गर्न करिब दुई करोड खर्च हुने आकलन गरिएको छ । प्रतियोगिताको पाँचौं संस्करणको विजेता एपीएफले १५ लाख १५ हजार र उपविजेता पञ्जाव पुलिसले ७ लाख ५१ हजार प्राप्त गरेको थियो ।
प्रतियोगितामा भारतका दुई टिमको सहभागिता हुने पक्का भएको गोल्डकपका कार्यकारी निर्देशक सुवाशीस कोइरालाले जानकारी दिए । भारतमा जारी आई लिगको दोस्रो डिभिजन खेलिरहेको दिल्ली एफसी र केरलामा रहेको लुका सकर क्लब आउने छन् ।
यसैगरी नेपालका तिन विभागीय क्लब एपीएफ, त्रिभुवन आर्मी र नेपाल पुलिसका साथै घरेलु टोलीको रुपमा विराटनगर सिटी फुटबल क्लबको सहभागिता रहनेछ । कोइरालाका अनुसार विभागीय क्लब बाहेक ए डिभिजन खेलिरहेका संकटा क्लब र जावलाखेल युथ क्लबसहित प्रतियोगितामा ८ टिमको सहभागिता रहने छ ।
प्रकाशित : फाल्गुन ३०, २०७९ १५:५१
