धरान रनमा भारतीय सेनाका लिम्बू र नेपाल पुलिसकी पछाई विजयी

शनिबार सम्पन्न दौडमा लिम्बूले निर्धारित १० किलोमिटरको दुरी ३२ मिनेट ५ सेकेन्डमा पूरा गर्दै विजेता बन्दै नगद ६० हजार रुपैयाँ, मेडल र प्रमाणपत्र हात पारे । पुरुषतर्फ दोस्रो भएका त्रिभुवन आर्मी क्लबका गजेन्द्र राईले ३२ मिनेट २४ सेकेण्डमा दौड पूरा गरेर दोस्रो पुरस्कार नगद ४० हजार रुपैयाँ हात पारे भने केन्याली धावक सिमेन किप्लागतले ३३ मिनेट १३ सेकेन्डमा दौड पूरा गरेर तेस्रो हुँदै नगद ३० हजार पाए ।

महिलातर्फ विजेता पछाईले निर्धारित १० किलोमिटरको दुरी ३७ मिनेट ३६ सेकेन्डमा दौड पूरा गरेकी थिइन् । त्रिभुवन आर्मी क्लबकी पूर्णलक्ष्मी न्यौपानेले ४० मिनेट २८ सेकेन्डमा दुरी पार गर्दै दोस्रो भइन् भने एपीएफकी आशा राउतले ४२ मिनेट २७ सेकेन्डमा दौड पार गर्दै तेस्रो भइन् । उनीहरुले क्रमशः मेडल र प्रमाणपत्रसँगै नगद ६० हजार, ४० हजार र ३० हजार पुरस्कार हात पारे ।

१६ वर्षमुनिको दौडमा पुरुषतर्फ कविन राई प्रथम, करण लिम्बू दोस्रो र अनिष लिम्बु तेस्रो भए । महिलातर्फ नानी तामाङ प्रथम, कुसुम राई दोस्रो र सुना सिद्धिकी तेस्रो भए । उनीहरुले क्रमशः नगद ७ हजार, ५ हजार र ३ हजार पुरस्कार पाए । भेट्रानतर्फ पुरुषमा धर्म महर्जन प्रथम, निमेश क्षेत्री दोस्रो र पाण्डव महतो तेस्रो भए । भेट्रान महिलातर्फ जमुना लिम्बू प्रथम, श्रीलामा भुटिया दोस्रो र शर्मिला राई तेस्रो भए । उनीहरुले पनि नगद ७ हजार, ५ हजार र ३ हजार रुपैयाँ क्रमश: हात पारे ।

दौडका विजेताहरुलाई आयोजक धरान रनका संस्थापक सन्तोष राई, अध्यक्ष रमु राई, प्रमुख अतिथि धरानका मेयर हर्कराज साम्पाङ, उपमेयर अइन्द्रबिक्रम बेघा, अभिनेता दयाहाङ राई, बीबीसी मास्टर सेफ विजेता सन्तोष साहलगायतले पुरस्कार वितरण गरेका थिए । प्रतियोगितामा स्वदेश र विदेशका ३ हजारभन्दा बढीले धावक सहभागी भएका थिए । धरान रन च्यारिटीबाट संकलित रकम बालबालिकाको शिक्षामा खर्च गरिने बताइएको छ । अध्यक्ष रोमु राईले भने, ‘नेवा च्यारिटी कोषमा १२ लाख रुपैयाँ छ । त्यही कोषले १२ जना बालबालिकालाई पढाइरहेका छौं । यसपटकको रकम पनि कोषमै जम्मा गर्ने छौं ।’