काठमाडौँ — नेपाली प्रो शुक्रबहादुर राई टलिगन्ज क्लबमा बुधबार १ अन्डर ६९ खेल्दै ‘कट’ बनाएर टाटा स्टिल पीजीटीआई प्लेयर्स च्याम्पियनसिप २०२३ को अन्तिम दुई चरणका लागि छनोट भएका छन् ।

पहिलो दिन २ अन्डर ६८ स्कोर गरेका शुक्र समग्रमा ३ अन्डर १ सय ३७ को कार्ड बनाएर ९ खेलाडीसँगै संयुक्त २६ औं स्थानमा रहँदै कट बनाएका हुन् । भारु १ करोड पुरस्कारको प्रतियोगितामा १ अन्डर ३९ को स्कोरसम्म रहेका ५३ गल्फर अन्तिम दुई चरणका लागि छनोट भएका छन् । भारतीय प्रो सचिन वैश्य १० अन्डर १ सय ३० सहित शीर्षस्थानमा छन् ।

प्रोफेसनल गल्फ टुर अफ इन्डिया (पीजीटीआई) मा नयाँ सिजनको पहिलो प्रतियोगितामा शुक्रले दोस्रो दिन चार बर्डी गर्दै तीन बोगी बेहोरे । उनी पहिलो दिन ६ बर्डी बनाएर पनि चार बोगीमा परेका थिए । उनले केभिन स्टिभ रिगेल र अमृतलाल रुबानाको समूहमा रहेर तेस्रो दिन प्रतिस्पर्धा गर्नेछन् । गत सिजन २०२२ १८ प्रतियोगिता खेल्दै आठमा कट बनाएका उनी ‘अर्डर अफ मेरिट’ मा ६७ औं स्थानमा रहेपछि सिधै नयाँ सिजनको कार्ड हासिल गर्न असफल रहे । फेरि छनोट खेल्दै उनी लगातार दोस्रो सिजन पीजीटीआई पुगेका हुन् ।