एभरटनसँग आर्सनल स्तब्ध

सन् २००४ पछि पहिलो लिग उपाधि जित्ने आसमा रहेको आर्सनल अहिले पनि ५ अंकले अगाडि छ । तर, म्यानचेस्टर सिटीले आइतबार टोटेनहमलाई पराजित गरेमा यो दुरी २ अंकमा छोटिने छ । आफ्नो गृहमैदानमा एभरटनले पछिल्ला ४ खेल हारेको थियो । सन् १९५८ यता एभरटन पहिलो पटक यति कमजोर स्थितिमा पुगेको थियो ।

जसका कारण फ्रान्क लाम्पार्डले एभरटनबाट म्यानेजर पद गुमाउन पुगेका थिए भने उनको स्थानमा आएका डाइसले पहिलो खेलमै जादुगरी प्रदर्शन देखाएका हुन् । क्लबका समर्थकको चर्को विरोधपछि एभरटनका बोर्ड सदस्यहरू आफ्नै टोलीको खेल मैदान आएर हेर्न सकेका छैनन् । अंकतालिकामा पुछारबाट दोस्रो स्थानमा भए पनि जनवरी ट्रान्सफर विन्डो सदुपयोग नगर्ने एभरटन एक्लो टोली थियो ।

तर, घरेलु टोलीले डाइसलाई पर्याप्त प्रतिभा रहेको देखाएको थियो । जेम्स तार्कवस्कीले ६० औं मिनेटमा ड्वाइट म्याकनेलको कर्नरबाट आएको बलमा हेड गोल गरे । विजयपछि एभरटन दुई स्थान उक्लँदै १७ औं स्थानमा आएको छ ।

शनिबार राति चेल्सी स्टामफोर्ड ब्रिजमै फुलहमबाट रोकिएको थियो । दर्जन नयाँ खेलाडी भित्र्याए पनि लन्डन डर्बीमा चेल्सी गोलरहित बराबरीमा अड्किएको हो । १० करोड ७० लाख पाउन्डमा तीन दिनअघि बेन्फिकाबाट आएका विश्वकप विजयी अर्जेन्टिनी मिडफिल्डर इन्जो फर्नान्डेजले चेल्सीबाट ‘डेब्यु’ गरे पनि उनले आफ्नो नयाँ टोलीको नतिजामा कुनै परिवर्तन ल्याउन सकेनन् ।