रेजिना कपको उपाधि ओखलढुंगाले जित्यो
संखुवासभा — भोजपुरलाई हराउँदै ओखलढुंगा भलिबल टिमले १ नम्बर प्रदेशस्तरीय रेजिना रनिङ शिल्ड भलिबल प्रतियोगिताको उपाधि जितेको छ ।संखुवासभाको खाँदबारीमा शनिबार भएको फाइनलमा भोजपुर भलिबल टिमलाई ३–१ को अन्तरले हराउँदै ओखलढुंगाले उपाधि जितेको हो । प्रतियोगितामा झापा भलिबल टिम तेस्रो र पाँचथर भलिबल टिम चौथो भएको छ ।
प्रतियोगितामा सर्वोकृष्ट खेलाडी ओखलढुंगाका समिप श्रेष्ठ घोषित भए । वेस्ट स्पाईकर ओखलढुंगाका हरि अधिकारी, लिफ्टर मनोज घिमिरे, व्लकर द्वारीका थापा, लिब्रो भोजपुरका सन्तोष राई र सरभर बालकुमार रायमाझी घोषित भए । विजयी ओखलढुंगाले नगद १ लाख ११ हजार र २ सय १० तोलको चाँदीको शिल्ड हात पार्यो । उपविजेता बनेको भोजपुरले ५५ हजार रुपैयाँमा चित्त बुझाएको छ ।
प्रतियोगितामा १ नम्बर प्रदेशका १३ जिल्लाका टिम सहभागी भएको आयोजक सूर्य माविले जनायो । विजयी टिमलाई भलिबल संघका केन्द्रीय महासचिव रोशन श्रेष्ठले पुरस्कार वितरण गरे ।
प्रकाशित : माघ २१, २०७९ १७:१९
