एन्फा अध्यक्ष नेम्वाङ एएफसी कार्यसमितिमा निर्विरोध निर्वाचित

अन्तर्राष्ट्रिय फुटबल महासंघ (फिफा) ले भ्रष्टाचारको अयिभोगमा प्रतिबन्ध लगाइएका एन्फाका पूर्वअध्यक्ष गणेश थापापछि महादेशीय फुटबलको सर्वोच्च निकायमा निर्वाचित हुने पहिलो नेपाली हुन् नेम्वाङ । थापा सन् २००३ देखि दुई कार्यकाल एएफसी सदस्य र २०११ मा उपाध्यक्ष निर्वाचित भएका थिए । तर, उनलाई भ्रष्टाचार गरेको ठहर गर्दै फिफाले सन् २०१५ नोभेम्बरमा फुटबल गतिविधिमा संलग्न हुनबाट दस वर्षको लागि प्रतिबन्ध लगाउने निर्णय गरेको थियो ।

अल इन्डिया फुटबल फेडेरेसन (एआईएफएफ)का महासचिव शाजी प्रभाकरणले उम्मेदवारी फिर्ता लिएपछि एन्फा अध्यक्ष नेम्वाङसँगै माल्दिभ्स फुटबल संघका अध्यक्ष बसम अदिल जलिल ‘साउथ जोन’बाट एएफसी कार्यकारी समिति सदस्यमा निर्विरोध निर्वाचित भएका हुन् । यस क्षेत्रबाट भुटानका उगेन छेछुप उपाध्यक्षमा निर्विरोध भए । बंगलादेशकी मफुजा अख्तर महिला सदस्यको रुपमा फेरि चुनिइन् तर उनले फिफा काउन्सिल सदस्यता भने गुमाएकी छन् । उनी काउन्सिल सदस्यको निर्वाचनमा लाओसकी कान्या किमानीविरुद्ध ३६–७ मतले पराजित भइन् । बहराइनका शेख सलमान लगातार तेस्रोपल्ट एएफसी अध्यक्ष चुनिए । उनी पनि निर्विरोध भए । फिफा काउन्सिलका ६ सदस्यसहित २२ सदस्यीय कार्यसमितिको कार्यकाल सन् २०२३ देखि २०२७ रहने छ ।

नेम्वाङ गत असार ६ गते भएको एन्फा कार्यसमिति निर्वाचनमा निवर्तमान अध्यक्ष कर्माछिरिङ शेर्पालाई ६ मतले हराएर अध्यक्ष चुनिएका थिए । दुई दशकअघि केन्द्रीय सदस्य बनेका उनी एन्फा अध्यक्ष हुनुअघि एक कार्यकाल वरिष्ठ उपाध्यक्ष रहेका थिए । मनामा यात्रासँगै एएफसीमा पुगे पनि उनलाई देशको मुख्य प्रतियोगिता लिगलगायत कार्यक्रमलाई व्यवस्थित र व्यावसायिक रुपमा सन्चालन गर्न एन्फा कार्यसमितिभित्रै संघर्ष गर्नुपर्ने अवस्थामा छन् ।