म्याड्रिड — स्पेनी ला लिगाको शीर्ष स्थानमा रहेका बार्सिलोना र रियल म्याड्रिड दुवै आइतबार विजयी रहे । बार्सिलोनाले गेटाफेलाई १–० ले हरायो र त्यसमा पेड्रीले निर्णायक गोल गरे ।
यो जितपछि बार्सिलोना ४४ अंकमा शीर्ष स्थानमा रह्यो । यस्तै, रियलले भने एथलेटिको बिलबाओलाई २–० ले पराजित गर्यो । रियलका लागि करिम बेन्जेमा र टोनी क्रुसले गोल गरे ।
रियलको भने ४१ अंक रहेको छ । त्यसपछि रियल सोसिडाडको ३८ र एटलेटिको म्याड्रिडको ३१ अंक रहेको छ ।
लन्डन — इंग्लिस प्रिमियर लिगमा उत्कृष्ट पुर्नआगमन रच्दै शीर्ष स्थानमा रहेको आर्सनलले आइतबार म्यानचेस्टर युनाइटेडलाई ३–२ ले हराएको छ । इमिरेट्समा भएको खेलमा आर्सनलका लागि एडी एनकेटिहले दुई गोल गरे ।
त्यसमध्ये उनले निर्णायक गोल ९० औं मिनेटमा गरे । युनाइटेडले मार्कस रसफोर्डको गोलले अग्रता लिएयता बुकायो साकाले बराबरी गोल गरे । युनाइटेडको अर्को गोल लिसान्ड्रो मार्टिनेजको नाममा रह्यो ।
यो नतिजापछि आर्सनलको ५० अंक भएको छ । दोस्रो स्थानमा रहेको म्यानचेस्टर सिटीको ४५ अंक छ । त्यस पछाडि न्युकासल र युनाइटेडको समान ३९ अंक छ ।
त्यस अगाडि सिटीका लागि इर्लिङ हालन्डले गरेको चौथो ह्याट्रिकको मदतले पेप ग्वार्डिओलाको टिमले रेलिगेसन दबाबबाट गुज्रिरहेको उल्भ्सलाई ३–० ले हराएको छ ।
यस प्रदर्शनसँगै सबै प्रतियोगितामा गरेर हालयान्डको गोल संख्या यस सिजन ३१ पुगेको छ । अर्को खेलमा लिड्स युनाइटेड र ब्रेन्टफोर्डले गोलरहित बराबरी खेले ।
प्रकाशित : माघ ९, २०७९ ०७:२६
