२१.१२°C काठमाडौं
प्रदेश १ र सुदूरपश्चिम प्रदेशको विजयी सुरुआत
सुनसरी — प्रदेश १ र सुदूरपश्चिम प्रदेशको विजयसँगै सुनसरीको इटहरीमा शुक्रबारदेखि प्रधानमन्त्री कप महिला राष्ट्रिय टी–२० क्रिकेट प्रतियोगिता सुरु भएको छ । प्रदेश १ ले मधेस प्रदेशमाथि ९ विकेटको फराकिलो जित दर्ता गर्यो । ५० रनको झिनो लक्ष्यलाई प्रदेश १ ले ११.४ ओभरमै पूरा गर्यो ।
प्रदेश १ को जितमा काजल श्रेष्ठ र रुविना क्षेत्रीको ओपनिङ जोडीले जितको बलियो आधार तयार पार्यो । काजलले ४२ बलमा ४ चौका मद्दतले २४ रन बनाउँदा रुविनाले २७ बलमा २ चौका मद्दतले २१ रनको अविजित इनिङ्स खेलिन् ।
त्यसअघि टस जितेर पहिले ब्याटिङ गरेको मधेस प्रदेशले १९.२ ओभरमा अलआउट भयो । प्लेयर अफ द म्याच सवनम राईले ४ विकेट लिइन् । रुविना क्षेत्री र निशा शाहले २/२ तथा ज्योति दनुवार र एलिसा खडियाले १/१ विकेट लिए । मधेसबाट सन्तोषी चौधरीले १२ रन बनाउनुबाहेक अरूले दोहोरो अंक जोड्न सकेनन् । दोस्रो खेलमा सुदूरपश्चिमले वाग्मती प्रदेशलाई ३३ रनले हरायो । युवा अलराउन्डर कविता कुँवरको उत्कृष्ट ब्याटिङमा टस हारेर पहिला ब्याटिङ थालेको सुदूरले निर्धारित २० ओभरमा ५ विकेट गुमाउँदै १ सय २७ रन बनायो । कविताले ५२ बलमा ६ चौका र १ छक्कासहित सर्वाधिक ५० रन जोडिन् ।
ऋतु कनोजिया २१ बलमा ४ चौकासहित २७ रनमा अविजित रहिन् । कप्तान बिन्दु रावल र सम्झना खड्काले १०–१० रन बनाए । रुवि पोद्दार ८, शोभा रोकाया २ र कविता जोशीले ७ रन बनाए । वाग्मतीकी तीव्र गतिकी बलर अस्मिना कर्माचार्यले ४ ओभरमा ११ रन खर्चेर २ विकेट लिइन् । यशु पाण्डे, खुसी डंगेला र मनीषा उपाध्यायले १/१ विकेट लिए ।
वाग्मतीले निर्धारित २० ओभरमा ७ विकेट गुमाउँदै ९४ रनमात्र बनाउन सकियो । कञ्चन श्रेष्ठ २१ बलमा १ चौकासहित सर्वाधिक १६ रन बनाए । ओपनर अस्मिता खरेल ३, सोनी पाख्रिन १५, हेलिसा गुरुङ ९, अस्मिना कर्माचार्य १३ र खुसी डंगोलले १४ रन बनाए । ऋतुले ४ ओभरमा १० र मनीषा उपाध्यायले ४ ओभरमा २० रन खर्चेर २/२ विकेट लिए ।
प्रकाशित : पुस ३०, २०७९ ०७:०९
