चेल्सीमा फेलिक्स

आर्सनल र म्यानचेस्टर युनाइटेडसँग पनि सम्पर्क भए पनि २३ वर्षीय फेलिक्सको रोजाइमा चेल्सी परेको हो । पोर्चुगिज खेलाडीले एट्लेटिकोसँगको सम्झौतामा पनि थप एक वर्षका लागि हस्ताक्षर गर्दै सन् २०२७ को जुनसम्म लम्ब्याएका छन् । ‘चेल्सी विश्वकै उत्कृष्ट टिममध्ये एक हो र उसको उद्देश्य पूरा गर्नका लागि मैले सहयोग गर्ने आशा गरेको छु,’ फेलिक्सले भने, ‘यहाँ आइपुगेकामा म धेरै धेरै खुसी छु । स्टामफोर्ड ब्रिजमा खेल्न निकै उत्साही छु ।’

एट्लेटिकोले इतिहासकै पाँचौं महँगो खेलाडीको रूपमा फेलिक्सलाई १९ वर्षको उमेरमै अनुबन्ध गरेको थियो । त्यसका लागि स्पेनी क्लबले बेन्फिकालाई सन् २०१९ मा ११ करोड ३० लाख पाउन्ड तिरेको थियो । उनले सबै खालको प्रतियोगितामा एट्लेटिकोबाट १ सय ३१ खेल खेल्दै ३४ गोल र १८ असिस्ट गरेका छन् ।

फेलिक्स गत महिना कतारमा भएको विश्वकपमा क्वाटरफाइनलबाट बाहिरिएको पोर्चुगिज टिममा थिए, जहाँ उनले ५ खेलमा एक गोल गरेका थिए । त्यसपछि उनले एट्लेटिकोका लागि दुई खेल खेल्नेक्रममा डिसेम्बर २९ मा इल्चेविरुद्ध २–० को जितमा गोल गरे भने आइतबार बासिलोनाविरुद्ध १–० ले हारेको खेलमा पनि ७३ मिनेट मैदानमा उत्रिएका थिए । यो सिजन एट्लेटिकोका लागि २० खेलमा ५ गोल र ३ असिस्ट गरेका छन् ।

‘जनवरी ट्रान्सफर’ मा बेनाइट बाडिसेल, डेविड दात्रो फोफना र आन्द्रेय सान्तोसपछि फेलिक्स चेल्सीमा आबद्ध भएका हुन् । प्रिमियर लिगमा चेल्सी हाल १० औं स्थानमा छ । चेल्सी शीर्ष चारभन्दा १० अंक पछाडि परेको छ । लिग कप र एफए कपबाट पनि बाहिरिइसकेको छ । चेल्सीलाई एफए कपको तेस्रो चरणमा गत साता म्यानचेस्टर सिटीले ४–० ले हराएको थियो ।