इटहरी — सुनसरीको इटहरीमा प्रधानमन्त्री कप राष्ट्रिय महिला टी–२० क्रिकेट प्रतियोगिता हुने भएको छ । नेपाल क्रिकेट संघको आयोजना र सुनसरी क्रिकेट संघको सहआयोजनामा लिगकप नकआउटमा हुने प्रतियोगिता पुस २९ देखि माघ ८ गतेसम्म चल्नेछ ।

इटहरी–९ स्थित जनता क्रिकेट पार्कमा राष्ट्रिय खेलकुद परिषद्को सहयोगमा सञ्चालन हुने प्रतियोगितामा ७ वटा प्रदेश र विभागीय टोली नेपाल एपीएफ क्लब गरी ८ टिम सहभागी हुनेछ ।

नेपाल क्रिकेट संघका कोषाध्यक्ष रोशनकुमार सिंहले ८ टिमलाई दुई समूहमा विभाजन गरी प्रतिस्पर्धा गराइने बताए । विजेता टिमले नगद ५ लाख र उपविजेताले ३ लाख रुपैयाँ प्राप्त गर्नेछन् ।

प्रतियोगिताको उत्कृष्ट खेलाडीलाई ३० हजार, उत्कृष्ट ब्याट्स म्यानलाई २० हजार र उत्कृष्ट बलरलाई २० हजार रुपैयाँ प्रदान गरिने छ । साथै, प्रत्येक खेलको उत्कृष्ट खेलाडीलाई नगद ३ हजार प्रदान गरिनेछ ।

प्रतियोगिता संयोजक विप्लव घोषका अनुसार प्रतियोगिताका लागि कुल १ करोड १३ लाख रुपैयाँ बजेट लाग्ने अनुमान छ । जसमध्ये राष्ट्रिय खेलकुद परिषद्ले ४० लाख र बाँकी रकम नेपाल क्रिकेट संघले व्यवस्थापन गर्नेछ ।