कराँची — पाकिस्तानमाथि ३–० को ऐतिहासिक टेस्ट शृंखला जितेपछि इंग्लिस टिमका प्रशिक्षक ब्रेन्डन म्याकलम मान्छन्, आफ्नो टिम पूर्णतातर्फ अग्रसर छ । इंग्ल्यान्डले कराँचीमा भएको तेस्रो तथा अन्तिम टेस्टमा पाकिस्तानलाई ८ विकेटले हराएको थियो ।

यससँगै पाकिस्तानलाई उसकै भूमिमा भएको टेस्ट शृंखलामा ‘क्लिन स्विप’ गर्ने इंग्ल्यान्ड पहिलो टिम बनेको थियो । म्याकलमले भने, ‘पछिल्लो चार साता अद्वितीय रह्यो, यो निकै सन्तुष्टि दिने खालको प्रदर्शन थियो ।’

उनले भने, ‘यो शृंखलामा हामीले पक्कै पनि विशेष उपलब्धि हासिल गरेका छौं । यसलाई हामी कहिल्यै पनि बिर्सने छैनौं ।’ अहिलेको शृंखलाअगाडि इंग्ल्यान्डले आफ्नो भूमिबाहिर पाकिस्तानलाई २२ वर्षयता कुनै पनि टेस्टमा हराउन सकेको थिएन । पाकिस्तानविरुद्ध पछिल्ला २२ टेस्टमा इंग्ल्यान्ड दुई अवसरमात्र विजयी थियो । तर, सन् २००५ यता पहिलोपल्ट पाकिस्तानमा खेलिरहेको इंग्ल्यान्डले आफ्नो समग्रै इतिहासमै चौथोपल्ट घरबाहिर ‘ह्वाइटवास’ गरेको हो ।

रावलपिन्डीमा भएको पहिलो टेस्टमा इंग्ल्यान्डले पहिलो दिन नै ४ विकेट गुमाएर ५ सय ६ रन बनाएको थियो । यसै ‘फ्लायट’ पिचमा पाँचौं दिनको अन्त्यतिर खराब प्रकाशबीच जित निकालेको थियो । मुल्तानको दोस्रो टेस्ट पनि रोमाञ्चक रह्यो । कराँचीमा प्राप्त तेस्रो जित भने सजिलो थियो । यो सबै सफलता त्यस्तो स्थितिमा प्राप्त भएको थियो, जतिबेला शृंखला हुनु २४ घण्टामात्र बाँकी छँदा इंग्ल्यान्डका केही खेलाडी बिरामी परेका थिए ।

‘हामीले शृंखलाका क्रममा सबैखाले चुनौती सामना गरेको थियौं,’ न्युजिल्यान्डका म्याकलमले भने, ‘केही चुनौती रणनीतिक थिए, केही चुनौती प्राविधिक थिए, केही चुनौती मानसिक पनि रहे । भ्रमणका क्रममा केही खेलाडी बिरामी परे । यी सबै परिस्थितिमा अहिले जस्तो क्रिकेट खेल्नु, त्यो पनि तीन फरक क्रिकेट मैदानमा । मेरो विश्लेषणमा हामी पूर्णताको नजिक छौं ।’ यो शृंखलाको सबैभन्दा ठूलो विशेषता ह्यारी ब्रुक्सको उदय रह्यो ।

जोनी बेरिस्टोको खुट्टा भाँचिएपछि मात्रै ब्रुक्सले अवसर पाएका थिए । तर म्याकलम मान्छन्, बेरिस्टो ठीक भएपछि टिममा फर्कन्छन् । यसै शृंखलाका क्रममा इंग्ल्यान्डले १८ वर्षीय रेहान अहमदको डेब्यु अवसर थियो । उनी टेस्ट क्रिकेटमा इंग्ल्यान्डको प्रतिनिधित्व गर्ने कान्छा खेलाडी बने । लेग स्पिनर अहमद तेस्रो टेस्टको दोस्रो इनिङ्समा पाकिस्तानका ५ ब्याटरलाई आफ्नो सिकार बनाउँदै उत्कृष्ट सुरुआत लिन सफल भए ।

म्याकलमले फ्रेन्चाइज क्रिकेटमा अहमद उपयुक्त हुने दाबी गरे । शुक्रबार हुने इन्डियन प्रिमियर लिगको खेलाडी लिलामीमा लेस्टरसायरका अहमदको नाम पनि छ । म्याकलम थप्छन्, ‘हामीले उनको खेललाई नजिकबाट हेरिरहेका हुनेछौं र यो महत्त्वपूर्ण छ । म उनलाई सकेसम्म बढी फ्रेन्चाइज क्रिकेट खेल्न प्रेरित गर्नेछु । त्यो पनि सबैतर्फ खेलेर बहुमूल्य अनुभव बटुल्न । अझ फरक–फरक खेलाडी, प्रशिक्षक र परिस्थितिबीच ।’

प्रशिक्षकमा म्याकलम र कप्तान बेन स्टोक्सको आगमनयता इंग्ल्यान्डले पछिल्लो १० मध्ये ९ टेस्ट जितेको छ । स्टोक्स भन्छन्, ‘हामीले जे गरेका छौं, त्यो विशेष छ । पाकिस्तानलाई उसकै भूमिमा ३–० ले हराउनु निकै गर्विलो उपलब्धि हो । लगातार जितिरहेका बेला इंग्ल्यान्डका लागि खेल्नुको मज्जा नै बेग्लै हुन्छ ।’ अब इंग्ल्यान्डले फेब्रुअरीमा न्युजिल्यान्डविरुद्ध दुई टेस्टको शृंखला खेल्नेछ । जुनमा आयरल्यान्डविरुद्ध एक टेस्ट खेलेपछि इंग्ल्यान्डको ध्यान अस्ट्रेलियाविरुद्धको एसेज शृंखलामा हुनेछ ।