अब आहा–रारा पोखरा गोल्डकप- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

अब आहा–रारा पोखरा गोल्डकप

सहारा र हिमश्री फुड्सबीच १० वर्षे प्रायोजन सम्झौता
दीपक परियार

पोखरा — आहा–रारा गोल्डकप फुटबल प्रतियोगिता अब ‘आहा–रारा पोखरा गोल्डकप’ को नामबाट हुने भएको छ । पोखराको व्यावसायिक घराना केसी ग्रुपले थप १० वर्ष मुख्य प्रायोजनलाई निरन्तरता दिने सम्झौता भएसँगै प्रतियोगिताको नाम फेरिएको हो । केसी ग्रुपको हिमश्री फुड्स प्रालिले प्रतियोगिताको मुख्य प्रायोजन गर्दै आएको थियो ।

उक्त अवधि १० वर्ष बढाउने प्रतियोगिता आयोजक सहारा क्लब र हिमश्री फुड्सबीच मंगलबार पोखरामा सम्झौता भएको छ । प्रालिका कार्यकारिणी अध्यक्ष प्रेमकुमारी केसी र आयोजक सहाराका अध्यक्ष हरिराम गुरुङबीच सम्झौतापत्रमा हस्ताक्षर भयो । २०८८ सम्मको सम्झौताबमोजिम हिमश्रीले कुल २ करोड ७१ लाख क्लबलाई प्रदान गर्नेछ । पोखराका समाजसेवी, उद्योगी एवं पूर्वसांसद सूर्यबहादुर केसीको पहल र सक्रियतामा ०५९ मा आहा गोल्डकपमा हिमश्री फुड्सको उत्पादन आहा तयारी चाउचाउले मुख्य प्रायोजनको सम्झौता गरेको थियो । त्यसको १० वर्षपछि ०६९ आहा–रारा गोल्डकप नामकरणमा १० वर्षको करार भएकोमा अब आहा–रारा पोखरा गोल्डकप फुटबल प्रतियोगिता नामकरणसहित सम्झौता भएको हो ।

मुख्य प्रायोजनवापत पहिलो ३ वर्षमा वार्षिक १८ लाख, दोस्रो ३ वर्ष वार्षिक २१ लाख, तेस्रो ३ वर्ष वार्षिक २४ हजार र ०८८ मा २७ लाख रुपैयाँ चरणबद्ध रूपमा प्रदान गर्ने सहमति भएको छ । प्रतियोगिताको व्यवस्थापकीय पक्षका लागि प्रालिले प्रत्येक ३ वर्ष ४ लाख ५० हजार, दोस्रो ३ वर्ष ५ लाख २५ हजार, तेस्रो ३ वर्ष ६ लाख २५ हजार र ०८८ मा ७ लाख रुपैयाँ प्रदान गर्नेछ । पछिल्लोसहित ३० वर्षसम्मको दीर्घकालीन सम्झौता नेपाली खेलक्षेत्रमा मुख्य प्रायोजनवापत सबैभन्दा लामो समयसम्मको पहिलो सम्झौता हो ।

यसबाहेक हिमश्रीले स्व. सूर्यबहादुर केसी सहारा फुटबल एकेडेमीलाई दुई वर्षदेखि वार्षिक १५ लाख रुपैयाँ प्रदान गर्दै आएको छ । १० वर्षसम्मको उक्त सम्झौताबमोजिम ३० लाख रुपैयाँ प्राप्त भइसकेको क्लबका महासचिव रामजीप्रसाद अधिकारीले जनाए ।

हिमश्री फुड्सका निर्देशक किरण केसी र प्रकाश केसीले बुवा (सूर्यबहादुर)को खेल लगायत विभिन्न क्षेत्रमा सहयोगको भावनाको स्मरण गरे । उनीहरूले बावुको पदचाप आफूहरूले पछ्याएको र आगामी दिनमा समेत सन्ततिले पनि सहारालाई टेवा दिइरहने विश्वास व्यक्त गरे । फुटबलमार्फत सामाजिक सेवामा क्रियाशील सहारा मोफसलको प्रतिष्ठित क्लब रहेको बताउँदै उनीहरूले आफूहरूबीच अन्योन्याश्रित सम्बन्ध रहेको बताए ।

सहारा क्लबले पहिलोपल्ट ०५८ मा क्याराभान गोल्डकप गरेको थियो । त्योसहित अब २२ औं संस्करण पुस १४ देखि २३ पोखरा रंगशालामा हुँदै छ । प्रतियोगितामा १० टिमले भाग लिनेछन् ।

कठिन परिस्थिति एवं विपन्न वर्गका बालकलाई शिक्षा, दीक्षा तथा फुटबल सिकाउन आवासीय सुविधासहित क्लबले पोखरा–१७ दोभिल्लामा स्व.सूर्यबहादुर केसी सहारा एकेडेमी सञ्चालन गर्दै आएको छ । एकेडेमीमा हाल तेस्रो ब्याचका १३ बालक आश्रित छन् ।

आहा–रारा पोखरा गोल्डकपको मुख्य प्रायोजन गर्ने सम्झौतापत्र गर्दै हिमश्री फुड्सकी प्रेमकुमारी केसी र आयोजक सहारा क्लबका हरिराम गुरुङ । तस्बिर : दीपक/कान्तिपुर

प्रकाशित : मंसिर १३, २०७९ २०:०१
प्रतिक्रिया
पठाउनुहोस्

तेस्रो पटकमा गच्छदारलाई हराउँदै भगवतीको संसद्‍ यात्रा

गच्छदारको ३० वर्षे अपराजित यात्रामा विराम
सुम्निमा चाम्लिङ

इटहरी — सुनसरी–३ बाट दुई पटकसम्म पराजय भोगेकी भगवती चौधरी तेस्रोपटक ऐतिहासिक जित निकाल्न सफल भएकी छन् । अपराजित यात्रामा रहेका नेपाली कांग्रेसका उम्मेदवार तथा पाँच पटकसम्म उपप्रधानमन्त्री भइसकेका विजयकुमार गच्छदारलाई पराजित गर्दै चौधरी विजयी भएकी हुन् ।

उनको पहिलो संसदीय निर्वाचनको जितसँगै सुनसरीबाट प्रत्यक्ष प्रतिनिधिसभा जित्ने एक्ली थारु महिला बनेकी छन् । भगवतीलाई हराएर इतिहास रच्ने दाउमा रहेका गच्छदारको प्रयास यसपटक भने असफल रह्यो । दोस्रो संविधानसभा ०७० र ०७४ को प्रतिनिधिसभा निर्वाचनमा गच्छदार विरुद्ध लडेकी उनले यसपटक भने बाजी मारिन् ।

गच्छदार सुनसरी ३ बाट ०४८, ०५१ र ०५६ मा नेपाली कांग्रेसबाट विजय भएका थिए । राजनीति यात्रामा तीन दशकदेखि जित्दै आएका गच्छदार यस पटक पनि विजयको खोजीमा सुनसरी आएका थिए । तर भगवतीले यसपटक गच्छदारलाई सहज रुपमा पराजित गरिन् । अधिकांश समय राजधानीमा बस्दै आएका गच्छदार चुनाव जित्न कठिन हुने संकेत पाएपछि पछिल्लो समय निकै सक्रिय बनेका थिए ।

भगवतीलाई ०७० मा ३ सय ६४ र ०७४ को चुनावमा ३ सय २१ को झिनो मतान्तरले कठिन जित निकाल्न सफल बनेका विजय यसपटक भने संसद प्रवेश गर्नबाट बञ्चित बने । अघिल्लो चुनावमा चौधरीले गच्छदार विरुद्ध धाँधलीको आरोप लगाउँदै पुनः मतगणनाको माग गर्दै सर्वोच्चमा रिट दायर गरेकी थिइन् । तर उक्त मुद्दामा आजसम्म पेसीसमेत चढेन । भगवतीले गच्छदार सत्तामा रहेको कारण उक्त मुद्दामा अदालतले न्याय दिन नसकेको भन्दै आएकी थिइन् ।

उनले इटहरी–११ को थारु बस्तीमा भएको पहिलो चुनावीसभामा अदालतले न्याय दिन नसके पनि जनताले न्याय गर्ने कान्तिपुरलाई बताएकी थिइन् । उनले भनेझै यसपटक जनताले भारी मत दिँदै भगवतीलाई संसदमा पठाएका छन् ।

गच्छदारले भने तीन दशकयता सरकारमा रहे पनि आफ्नो पुरानो विरासत जोगाउन सकेनन् । पटकपटक जिते पनि अपेक्षा अनुरुप जनताको समस्या सम्बोधन गर्न नसक्दा गच्छदारको नतिजा उल्टो आएको स्थानीय अगुवाहरू बताउँछन् ।

को हुन् भगवती चौधरी ?

पूर्वको राजनीतिमा भगवती चौधरी परिचित अनुहार हो । महिला नेतृहरुको स्थानमा उनको नाम अग्रस्थानमा छ । सुनसरीको गढी गाउँपालिका औरावनीमा जन्मिएकी ५१ वर्षीया उनी साहसी नेतृको रुपमा परिचित छिन् ।

पारिवारिक पृष्ठभूमि समेत राजनीति र सामाजिक क्षेत्रमा रहेकोे कारण उनमा सानैदेखि समाजसेवा गर्ने रुची थियो । २०५१ सालदेखि ग्रामीण महिला उत्सकुता विकास मञ्च संस्था स्थापना गरी स्थानीय महिलाहरुको हितमा शिक्षा, स्वास्थ्य, आर्थिक र कानुनी शिक्षा सचेतना फैलाउँदै आएकी थिइन्। २०५९ देखि फरवार्ड लघुवित्त स्थापना गरी महिलाहरुको आर्थिक विकासमा जोड दिँदै आएकी छिन् ।

उनी २०४८ मा नेकपा एमालेको पार्टी सदस्यता लिँदै राजनीतिमा प्रवेश गरेकी थिइन् । महिलाको क्षेत्रमा काम गर्दै आएकी उनी २०५८ देखि सक्रिय राजनीतिमा लागिन् । ०६४ मा नेकपा एमाले सुनसरी सदस्य हुँदै २०७० मा कोसी अञ्चल कमिटी सदस्य बनिन् । नेकपा एमालेको नवौं र दसौं महाधिवेशनबाट केन्द्रीय सदस्य तथा श्रम तथा स्वरोजगार केन्द्रीय विभागको उपप्रमुख बनेकी छन् । हाल उनी सुनसरी सहइन्चार्ज हुन् ।

२०६८ मा करिब ६ महिना वन तथा भू–संरक्षण राज्यमन्त्री रहिन् । ०६४ मा संविधानसभा सदस्यमा मनोनित भइन् । समाजशास्त्र तथा व्यवस्थापन संकायमा स्नातकोत्तर पूरा गरेकी उनी हाल इलेक्ट्रोल सिस्टम डेमोक्रेसीमा विद्यावारिधि गर्दैछिन् ।पुरुषको तुलनामा महिलालाई राजनीतिक क्षेत्रमा निकै संघर्ष गर्नुपर्ने उनको अनुभव छ । उनले भनिन्, ‘महिलालाई राजनीतिमा पहाड जत्तिकै चुनौती छ, उच्च ओहदामा बसेर काम गरिसकेको उम्मेदवारसँग लड्दा थप चुनौती छ ।’

प्रकाशित : मंसिर १३, २०७९ १९:५८
पूरा पढ्नुहोस्
प्रतिक्रिया
पठाउनुहोस्
×