दक्षिण एसियाली टेबलटेनिस छनोट नेपालमा- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

दक्षिण एसियाली टेबलटेनिस छनोट नेपालमा

कान्तिपुर संवाददाता

काठमाडौँ — विश्व टेबलटेनिस च्याम्पियनसीपका लागि दक्षिण एसियाली क्षेत्रीय टेबलटेनिस छनोट प्रतियोगिता नेपालमा हुने भएको छ । प्रतियोगिता मंसिर २२ देखि २५ सम्म लैनचौरस्थित राष्ट्रिय टेबलटेनिस प्रशिक्षण केन्द्रमा हुने आयोजक अखिल नेपाल टेबलटेनिस संघले मंगलबार पत्रकार सम्मेलनमार्फत जनाएको छ ।

संघका अध्यक्ष चतुरानन्द राजवैद्यले प्रतियोगितामा नेपालसहित भारत, पाकिस्तान, बंगलादेश, श्रीलंका र माल्दिभ्स गरी ६ राष्ट्रको सहभागिता रहने जानकारी गराए । भुटानी पनि आउने प्रयास भइरहेको बताए । प्रत्येक राष्ट्रबाट ५–५ पुरुष/महिला खेलाडी सहभागी हुने बताइएको छ ।

पुरुष/महिला सिंगल्समा लिगकम नकआउट आधारमा हुनेछ । पुरुष/महिलामा १६–१६ खेलाडी छनोट हुनेछन् ।

नेपालबाट पुरुषमा रुविन महर्जन, प्रदीप रोक्का, संयोग कपाली, विनेश खानिया“ र शिवसुन्दर गोथेले प्रतिस्पर्धा गर्नेछन् । महिलामा नविता श्रेष्ठ, एलिना महर्जन, रविना महर्जन, सिक्का सुवाल र इभाना थापा मगरले खेल्नेछन् । खेलाडीलाई मुख्य प्रशिक्षक सन्जिव ढुंगेलको नेतृत्वमा सञ्जय अर्याल र सन्ध्या शाक्यले प्रशिक्षण गराइरहेका छन् ।

शंकर गौतम प्रतियोगिता निर्देशक, तेजेन्द्रसिंह महरा कम्पिटिसन म्यानेजर र आयोजक संघका प्रथम उपाध्यक्ष धम्रमान वज्राचार्यले व्यवस्थापन समितिको जिम्मेवारी पाएका छन् । प्रतियोगितालाई एनसेल एक्सजियटा, नेपाली घर, ब्रोडलिंक, नेबिकोलगायतले प्रायोजन गरेको पत्रकार सम्मेलनमा जानकारी गराइयो ।

प्रकाशित : मंसिर १३, २०७९ १९:२४
प्रतिक्रिया
पठाउनुहोस्

काठमाडौंमा डिजिटल स्वास्थ्य सम्मेलन सम्पन्न

कान्तिपुर संवाददाता

काठमाडौँ — काठमाडौंमा मंगलबार डिजिटल स्वास्थ्य सम्मेलन सम्पन्न भएको छ । मंसिर १२ र १३ गते २ दिनसम्म आयोजना भएको सो सम्मेलन नेपालमा पहिलो पटक आयोजना भएको बताइएको छ । बीपी कोइराला स्वास्थ्य विज्ञान प्रतिष्ठानस्थित ईलर्निङ तथा टेलिमेडिसिन युनिटको आयोजनामा सो सम्मेलन गरिएको हो ।

प्रतिष्ठानले स्विजरल्याण्डस्थित जेनेभा विश्वविद्यालय र डिजिटल हेल्थ हबसँगको सहकार्यमा सम्मेलन आयोजना गरिएको जनाएको छ । सम्मेलनको उद्घाटन गर्दै स्वास्थ्य तथा जनसंख्या मन्त्री भवानीप्रसाद खापुङले डिजिटल स्वास्थ्य सेवा मुलुक र जनताका लागि आवश्यक रहेको बताए । उनले डिजिटल स्वास्थ्य सेवालाई अझ परिस्कृत र प्रभावकारी बनाउन खाँचो रहेको औंल्याए । स्विजरल्याण्ड, जापान, अष्ट्रेलिया र भारतसँगै नेपालका सरकारी तथा गैरसरकारी क्षेत्रका प्रतिनिधिहरुको सहभागिता रहेको सम्मेलनमा ३० भन्दा बढी कार्यपत्र प्रस्तुत गरिएको आयोजक समितिका सचिव डा. परमेन्द्र प्रसाद गुप्ताले जानकारी दिए । सम्मेलनको आयोजनाले डिजिटल स्वास्थ्य नीतिलाई सही मार्गनिर्देश गर्न सहयोग पुर्‍याउने सम्मेलन आयोजक समितिका अध्यक्ष प्रा. डा. नरेन्द्र भट्टले दावी गरे ।


प्रकाशित : मंसिर १३, २०७९ १९:२३
पूरा पढ्नुहोस्
प्रतिक्रिया
पठाउनुहोस्
×