सुदूरपश्चिममा मिलनको प्रभाव- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

सुदूरपश्चिममा मिलनको प्रभाव

कान्तिपुर संवाददाता

काठमाडौँ — सुदूरपश्चिम प्रदेशले वाइवाइ यू–१९ राष्ट्रिय क्रिकेट प्रतियोगितामा लगातार तेस्रो जित हात पारेको छ । मिलन बोहराले ६ विकेट लिएपछि सुदूरपश्चिमले आइतबार त्रिवि क्रिकेट मैदान कीर्तिपुरमा गण्डकी प्रदेशलाई १ सय १३ रनले पराजित गर्‍यो ।

मिलनको उत्कृष्ट बलिङपछि २ सय १४ रनको लक्ष्य लिएर आएको गण्डकी ३२.५ ओभरमा १ सय रनमा अलआउट भयो । प्लेयर अफ द म्याच मिलनले ९.५ ओभरमा ४ मेडन राख्दै ११ रन खर्चंदै गण्डकीलाई धराशायी बनाए । आकाश चन्दले २ र नरेन साउदले १ विकेट लिए । गोविन्द विक र अर्जुन कुमालले १० ओभरभित्र ४२ रन जोडी गण्डकीलाई राम्रो सुरुआत दिलाएका थिए । तर मिलनको सानदार बलिङ प्रदर्शनमा गण्डकीले अन्तिम ९ विकेट केवल ३५ रनमा गुमाएको थियो । गोविन्दले २२ र अजुन कुमालले २० रन जोडे । त्यसपछि दोहोरो स्कोर बनाउनेमा करण पंगेनी (१५) र कप्तान सुवास भण्डारी (१६) मात्र थिए ।

यसअघि टस जितेर ब्याटिङमा आएको सुदूरपश्चिम निर्धारित ५० ओभरको खेलमा ४९.३ ओभरमा २ सय १३ रनमा अलआउट भएको थियो । तल्लोक्रममा ब्याटिङ गर्दै आकाश चन्दले सर्वाधिक ४० रन बनाए । उनले ४५ बल खेल्दै ३ चौका र १ छक्का प्रहार गरे । कप्तान अनुराग सिंह ३७ रन बनाई रनआउट भए । उनले ४१ बल खेल्दै ४ चौका प्रहार गरे । नरेन २८, मिलन २४, गजेन्द्र बोहरा, सुनील चन्द र हेमन्त धामी समान १९ तथा दीपक बोहरा ११ रनमा आउट भए । गण्डकीका सुवासले १० ओभरमा १ मेडन राख्दै ३० रन खर्चेर ३ तथा सुदीप अर्याल, निर्तेश गिरी, शिशिर भुसाल, सिब्रिन श्रेष्ठ, अर्जुन र सचिनराज अधिकारीले १–१ विकेट लिए ।

राउन्ड रोबिन लिगमा सात प्रदेश एकअर्कासँग आमनेसामने भएपछि शीर्ष दुई टोली फाइनल खेल्ने प्रावधान छ । सुदूरपश्चिमले जस्तै वाग्मतीले पनि पहिलो तीनै खेल जितेको छ । त्यसको विपरीत गण्डकीले पहिलो तीनै खेलमा पराजय भोगेको छ । कर्णालीले तेस्रो खेलमा आएर पहिलो जित हात पारेको छ । कर्णालीले मधेस प्रदेशलाई २ विकेटले पराजित गर्‍यो । मधेसले दुवै खेल हारेको छ ।

टस जितेर ब्याटिङमा आएको मधेस ४१.५ ओभरमा १ सय ३५ रनमा अलआउट भयो । ओपनर शैलेन्द्र शाहले सर्वाधिक ३१ रन बनाए । उनले ४८ बल खेली ५ चौका प्रहार गरे । अर्का ओपनर मायन यादव १८, सरफराज मन्सुरी १७, मेघराज राम १६ र दब्लु मलिकले १५ रन बनाए । युनिश सिंहले ५ विकेट लिँदै मधेसको इनिङ्सलाई खुम्चाए । प्लेयर अफ द म्याच उनले १० ओभरमा २ मेडन राख्दै ३५ रन खर्चे । मोहन विक र आवास शाहले २–२ तथा गणेश डडेलले १ विकेट लिए ।

तल्लोक्रममा मोहनले अविजित ३८ रन बनाएपछि कर्णालीले ३५ औं ओभरमा लक्ष्य पूरा गर्‍यो । उनले ४० बल खेल्दै ६ चौका प्रहार गरे । ओपनर मनीष थापाले ३४ बल खेली ५ चौका र १ छक्का प्रहार गरी ३२ रन बनाए । अनिरुध कवर १६, सुवास ऐर १४ र आवासले १२ रन बनाए । मधेसका रञ्जित कुमारले ५ विकेट लिए । उनले १० ओभरमा ३ मेडन राख्दै २३ रन खर्चे । अविजितले २ र राजेश यादवले १ विकेट लिए ।

प्रकाशित : मंसिर १२, २०७९ ०७:०३
प्रतिक्रिया
पठाउनुहोस्

‘मेसी यहाँ छन्’

साउदी अरेबियासँग पराजित भएपछि ‘ह्वेर इज मेसी’ सामाजिक सञ्जालमा ट्रेन्डिङ नै भएको थियो, मेक्सिकोविरूद्धको जितपछि ट्रेन्डिङ अर्कै छ
राजु घिसिङ

दोहा — कतारमा ९० स्थानमा बनाइएका ‘फ्यान जोन’ मा विश्वकप २०२२ का प्रत्येक खेल ठूलो स्क्रिनमा देखाइन्छ । दोहाको अल अदामा बनाइएको फ्यान जोनमा उभिएरै ३३ हजार बढी मानिसले हेरेको मेक्सिकोविरुद्ध शनिबारको खेलमा अर्जेन्टिनी कप्तान लियोनल मेसीले गोल गरेपछि धेरैले आकाशे नीलो–सेतो रङको जर्सी नम्बर खोलेर दुई हातले उचाल्दै भने, ‘मेसी इज हियर (मेसी यहाँ छन्) ।’

दुईपल्टको विश्वकप विजेता अर्जेन्टिनालाई कतार संस्करणमा कायमै रहन पनि लुसेल रंगशालाको प्रतिस्पर्धा जित्नैपर्ने बाध्यता थियो । मेसी र एन्जो फर्नान्डेजको उत्कृष्ट गोलमा अर्जेन्टिना २–० ले विजयी भएपछि बासस्थान फर्किने क्रममा पनि दर्शकले ‘मेसी इज हियर’ भन्दै नारा लगाइरहेका थिए । यो नारा मेसी र अर्जेन्टिनी टिम समूह चरणबाटै बाहिरिएको हेर्न चाहनेका लागि मिठो जवाफ हो, जसरी मेसीले जित्नैपर्ने खेल जिताएर करिअरको अन्तिम विश्वकपमा पनि उपाधि जित्न आतुर भएको संकेत दिए ।

अर्जेन्टिनालाई पहिलो खेलमै साउदी अरेबियाले २–१ ले स्तब्ध पार्दै अपराजित यात्रालाई ३६ खेलमै रोकेको थियो । त्यसपछि अरू टिमका समर्थकले कतारमा बस, मेट्रोलगायत सार्वजनिकस्थलमा ‘ह्वेर इज मेसी’ (मेसी कहाँ छन् ?) भन्दै नारा लगाइरहेका थिए । विशेषगरी साउदी, क्रिस्टियानो रोनाल्डो, ब्राजिल र मेक्सिकोका समर्थकले जताततै उफ्रिँदै निधारमा हत्केला उठाउँदै यताउति हेरेर मेसी कहाँ छन् भनिरहेका थिए । वास्तवमा साउदीले विश्वकप इतिहासकै एक अनपेक्षित नतिजा निकाल्नुअघि यहाँ अर्जेन्टिनाका समर्थकको चहलपहल बढी नै थियो । अर्जेन्टिनी समर्थकमा पनि अधिकांशले मेसीकै जर्सी नम्बर १० लगाएका थिए । उनीहरू विश्वकपअघि ‘मेसी–मेसी’ को नारा लगाउँदै हिँड्थे । सन् १९७८ र १९८६ को च्याम्पियनलाई एसियाली टिम साउदीले पराजित गरेपछि अर्जेन्टिनी समर्थक शान्त भएका थिए । ह्वेर इज मेसीे सामाजिक सन्जालमा ट्रेन्डिङ नै भएको थियो । र, मेक्सिकोविरुद्धको जितपछि मेसी इज हियर भन्ने ट्रेन्डिङ बनेको छ ।

मेक्सिकोविरुद्ध हारेको भए अर्जेन्टिनाको ३६ वर्षपछि उपाधि जित्ने लक्ष्य फेरि अधुरै हुने थियो र इतिहासकै एक खराब प्रदर्शनसहित दक्षिण अमेरिका फर्किनुपर्ने हुन्थ्यो । डिएगो म्याराडोनाको उत्कृष्ट खेलमा १९८६ मा विश्वकप जितेयता अर्जेन्टिना विश्वविजेता बनेको छैन । गत वर्ष मृत्यु भएका म्याराडोना मेसीलाई आफ्नो उत्तराधिकारी मान्थे । म्याराडोनालाई भगवान् मान्ने अर्जेन्टिनीहरू मेसीलाई पनि उस्तै सम्मान दिन्छन् । तर मेसीमा म्याराडोनाभन्दा एउटा कुराको कमी छ । त्यो हो विश्वकपको उपाधि । त्यसैले कतार संस्करणमा अर्जेन्टिना बाहिरिने डरभन्दा पनि फुटबल इतिहासकै एक उत्कृष्ट खेलाडी मेसीको करिअर विश्वकप नजितेरै सकिने भयो भन्ने डर बढेको थियो । यसले मेसी आफैं पनि चर्को दबाबमा थिए ।

करिब २० यार्डबाट आफ्नै परम्परागत शैलीमा मेक्सिकोविरुद्ध गोल गरेपछि मेसीले सहकर्मीसँग खुबै खुसियाली मनाए । दुई हात दर्शकतिर हुत्याउँदै जोस देखाए । एन्जेल डि मारियाको पासमा भएको त्यो गोलपछि उनको अनुहारमा आएको चमक बिछट्टै थियो । उनकै पासमा इजे एन्जोले ८७ औं मिनेटमा गोल गरेपछि जित पक्का भयो । मेसी र अर्जेन्टिनाले विश्वकप जित्ने सम्भावनालाई कायमै राखे । त्यो बाटोमा रहनका लागि पहिला नकआउट चरणमा पुग्नुपर्छ । त्यसका लागि अर्जेन्टिनाले समूह चरणको अन्तिम खेलमा रोबर्ट लेवान्डोस्कीको टिम पोल्यान्डलाई पराजित गर्नुपर्नेछ ।

‘साउदीविरुद्धको हारले चर्को दबाब दियो,’ ३५ वर्षीय मेसीले भने, ‘अब हामी बाहिरिएका छैनौं । हाम्रा लागि सबै खेल फाइनल हो । कुनै गल्ती गर्नु हुँदैन किनभने हामीलाई हरेक खेल जित्नैपर्छ भन्ने थाहा छ । हाम्रा लागि अर्को एउटा विश्वकप सुरु भएको छ । यसमा के गर्नुपर्छ भन्ने पनि हामीलाई थाहा छ ।’ साउदीविरुद्ध पेनाल्टीमा गोल गरेका उनी पाँचौं विश्वकपमा असिस्ट गर्ने पहिलो खेलाडी पनि भए । विश्वकपमा अर्जेन्टिनाका लागि गोल गर्ने सबभन्दा कान्छो र सबभन्दा बुढो खेलाडीको रेकर्ड बनाएका उनले सन् २००६, २०१४, २०१८ हुँदै २०२२ मा गोल गरेका हुन् । त्यसक्रममा म्याराडोनाको आठ गोलको कीर्तिमान मेक्सिकोविरुद्ध बराबरी गरे । उनी दक्षिण अफ्रिका (२०१०) भने गोल गर्न असफल भएका थिए ।

अर्जेन्टिनाका लागि सन् १९९४ फाइनलयताकै सबभन्दा बढी ८८,९६६ दर्शक (मेक्सिकोविरुद्धको खेलमा) उपस्थित लुसेल रंगशाला ‘होम ग्राउन्ड’ नै हो । अर्जेन्टिनाले समूहका सबै खेल यहीं खेल्दै छ, जुन अवसर अरू टिमले पाएका छैनन् । डिसेम्बर १८ मा फाइनल पनि नयाँ सहरको यही रंगशालामा हुनेछ ।

स्पेनी महारथी बार्सिलोना छाडेर गत सिजन फ्रेन्च लिग वान क्लब पीएसजी (पेरिस सेन्ट जर्मेन) मा सन् २००५ मा डेब्यु गरेका मेसीले देशका लागि १ सय ६७ खेलमा ९३ गोल गरेका छन् । अहिले खेलिरहेकामध्ये उनीभन्दा बढी गोल पोर्चुगलका क्रिस्टियानो रोनाल्डोले गरेका छन् । यी दुईले यो विश्वकपमा पहिलो गोल पेनाल्टीमार्फत गरेपछि ‘पेसी पेनाल्डो’ पनि ट्रेन्डिङमा आयो । ३७ वर्षीय रोनाल्डो पनि करिअर विश्वकपको उपाधि जितेर सार्थक पार्न चाहन्छन् । यी दुईले नजितेको एकमात्र उपाधि विश्वकप नै हो ।

मेसी आठ वर्षअघि विश्वकप उपाधिको सबैभन्दा नजिक पुगेका थियो । तर, रियोस्थित माराकाना रंगशालामा भएको फाइनलमा मारियो गोट्जले अतिरिक्त समयमा गोल गरेपछि मेसीको टिमलाई १–० ले निराश पार्दै जर्मनी च्याम्पियन भएको थियो । उनले त्यसबेला गोल्डेन बलको अवार्ड त जिते तर ६.१ किलोग्रामको ट्रफी चुम्न पाएनन् । लगातार चार फाइनल (कोपा २००७, २०१५, २०१६ र विश्वकप २०१४) हारेपछि मेसीले बार्सिलोनामा जस्तै प्रदर्शन अर्जेन्टिनी टिमबाट नगरेको आशंका गरियो । मेसीको अन्तर्राष्ट्रिय करिअरमा प्रश्न पनि तेर्सियो । उनी केही समय अर्जेन्टिनी टिमसँग अलग रहे ।

गत वर्ष फाइनलमा ब्राजिललाई हराएर पहिलो अन्तर्राष्ट्रिय उपाधिका रूपमा कोपा अमेरिका जितेका मेसीले मिल्ने साथी सर्जियो एगुइरोसँगै यू–२० विश्व च्याम्पियनसिप र ओलम्पिक स्वर्ण जितेका थिए । एगुइरोले बुट थन्क्याइसकेका छन् । अर्जेन्टिनाले फिफा वरीयतामा तेस्रो स्थानमा रहेको सावित गर्ने प्रदर्शन दुई खेलसम्म गरेको छैन । मेसी आफ्नो औसत टिमबाटै पनि विश्वकप जित्न चाहन्छन् । टिम उनकै प्रदर्शनमा निर्भर छ । मेक्सिकोविरुद्ध पहिलो हाफमा चुपचापजस्तै रहेका उनले केही सेकेन्डमै कुनै पनि बेला खेलको नतिजा उल्ट्याउन सक्छन्, आफ्नो पक्षमा पार्न सक्छन् । कतारमा उनीसँग यस्तै प्रदर्शनको अपेक्षा गरिएको छ, जसले अर्जेन्टिनालाई ३६ वर्षपछि विश्वविजेता बनाउन सक्छ र आफ्नै करिअरलाई पनि सार्थक तुल्याउन सक्छ ।

कीर्तिमान सातपल्टको वर्षका सर्वोत्कृष्ट फुटबलरको अवार्ड बालोन डि‘अर जितेका मेसीले तीनपल्ट क्लब विश्वकप, चारपल्ट युरोपेली च्याम्पियन्स लिग, १० पल्ट स्पेनी ला लिगा, पहिलो सिजन नै फ्रान्सको लिग वानको उपाधि जितेका छन् । त्यसैले मेसीले फुटबलमा विश्वकपबाहेक अरू कुनै त्यस्तो जित्न बाँकी उपाधि छैन । उनी लयमा पनि छन् । अर्जेन्टिनाका लागि एउटै वर्षमा सबैभन्दा बढी गोल यसैपालि गरेका छन्् । सन् २०१२ मा गरेको १२ गोललाई २०२२ मा एक गोलले उछिनेका उनले अझै थप्न सक्छन् । करिअरमा एक अर्ब अमेरिकी डलर कमाइसकेका उनका लागि यो ३५ वर्षको उमेर विश्वविजेता बन्ने अन्तिम आवसर हो ।

प्रकाशित : मंसिर १२, २०७९ ०६:५९
पूरा पढ्नुहोस्
प्रतिक्रिया
पठाउनुहोस्
×