जुनियर टेनिसमा १२ देशका खेलाडी- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

जुनियर टेनिसमा १२ देशका खेलाडी

कान्तिपुर संवाददाता

पोखरा — पोखरा रंगशाला टेनिस कोर्ट कम्प्लेक्समा शनिबारदेखि हुने अन्तर्राष्ट्रिय जुनियर टेनिस प्रतियोगितामा १२ देशका खेलाडीले प्रतिस्पर्धा गर्ने भएका छन् । नेपाल आईटीएफ जुनियर्स (यू–१८) वर्ल्ड र्‍याङकिङ टेनिस च्याम्पियनसिप ग्रेड–५ सर्किट वान र टु प्रतियोगितामा १३ देखि १८ वर्षका खेलाडीले प्रतिस्पर्धा गर्नेछन् ।

कास्की जिल्ला टेनिस संघको आयोजनामा हुने प्रतियोगितामा पुरुष र महिलातर्फ ६४–६४ गरी १ सय २८ खेलाडी सहभागी हुँदै छन् । प्रतियोगितामा सहभागी हुन् भारत, ताइपेई, दक्षिण कोरिया, रुस, स्पेन, जर्मनी, जापान, श्रीलंका, फिलिपिन्स, अस्ट्रेलिया, हङकङ र अमेरिकाका खेलाडी पोखरा आइसकेका छन् । मंसिर २४ सम्म हुने प्रतियोगिता पुरुष सिंगल्स र डबल्स, महिला डबल्स र सिंगल्स इभेन्टमा प्रतिस्पर्धा हुनेछ ।

टुर्नामेन्ट डाइरेक्टर अजय विष्टले ३२ खेलाडीको ड्र हुने र ३२ भन्दा बढी खेलाडी भएकाले शनिबार र आइतबार क्वालिफाइङ प्रतियोगिता र सोमबारदेखि मुख्य प्रतियोगिता हुने बताए । उनका अनुसार सिंगल्सतर्फ विजेताले ३०, रनरअपले १८, सेकेन्ड रनरअपले ९, क्वाटरफाइनलिस्ट ५ र पहिलो राउन्ड जित्नेले २ अंक प्राप्त गर्नेछन् । डबल्सतर्फ खेलाडीले सिंगल्समा पाउने अंकको २५ प्रतिशत पाउने छन् ।

विजेताले ७, रनरअपले ४.४, सेकेन्ड रनरअपले २.२५, क्वार्टरफाइनलिस्टले १.२५ अंक पाउने छन् । ‘यो अंक वर्ल्ड र्‍यांकिङमा जोडिने भएकाले खेलाडीका लागि महत्त्वपूर्ण हुन्छ,’ विष्टले भने । प्रतियोगिताका लागि आईटीएफ रेफ्री प्रवीणकुमार नायक नेपाल आइसकेका छन् ।

प्रकाशित : मंसिर १०, २०७९ ०८:०६
प्रतिक्रिया
पठाउनुहोस्

प्रतीकको शतक

कान्तिपुर संवाददाता

काठमाडौँ — प्रतीक श्रेष्ठको सानदार शतकमा वाग्मती प्रदेशले वाइवाइ यू–१९ राष्ट्रिय क्रिकेट प्रतियोगितामा लगातार दोस्रो जित हात पारेको छ । प्रतीकले अविजित १ सय ४२ रन बनाएपछि वाग्मतीले शुक्रबार प्रदेश १ लाई ७२ रनले पराजित गर्‍यो । 


त्रिवि क्रिकेट मैदान कीर्तिपुरमा ४४ बलमा अर्धशतक र ९० बलमा शतक पूरा गरेका उनले कुल १ सय ५ बलको इनिङ्समा १० चौका र ९ छक्का प्रहार गरे । लक्की कठायत ८, उत्तम मगर शून्य, सक्षम बस्ताकोटी २३, अशोक पौडेल २५, योगेश भाट १४, ओमकार यादव ७ रनमा आउट भएपछि प्रतीकले अथर्व पौडेलसँग सातौं विकेटमा १ सय रनको साझेदारी गरे ।

अथर्वले ४८ बल खेल्दै २ चौकासहित १५ रन बनाए । सक्रिय कार्कीले ८ रन जोडे । प्रदेश १ बाट दीपेश कँडेल, विपिन महतो र सोनु अन्सारीले २–२ विकेट लिए । दीपेशले १० ओभरमा १ मेडन राख्दै २४, विपिनले १० ओभरमा ३४ र सोनुले ६ ओभरमा ५९ रन खर्चे । अभिनय राजवंशी र आशिष मगरले १–१ विकेट लिए ।

प्रदेश १ जवाफमा ५० औं ओभरमा १ सय ९७ रनमा अलआउट भयो । कप्तान दीपेशले ४७ रन बनाउनेक्रममा ६६ बल खेल्दै ४ चौका र १ छक्का प्रहार गरे । सोनु १३, शुभन गहतराज २६, स्टाइन रिजाल ३५, भूपाल डंगोल ८, फैजल रहमान २४ रनमा आउट भए । १० औं नम्बरमा ब्याटिङ गरेका विपिनले २२ बल खेल्दै २ चौका र १ छक्कासहित २१ रन बनाए । वाग्मतीका सक्रियले ३ विकेट लिए । उनले १० ओभरमा १ मेडन राख्दै ३८ रन खर्चे । ओमकारले ९ ओभरमा १ मेडन राख्दै ३० रन खर्चेर २, अहमद राजा, अभिषेक कोइराला र अथर्वले १–१ विकेट लिए ।

वाग्मतीले पहिलो खेलमा गण्डकीलाई ७४ रनले हराएको थियो । प्रदेश १ ले दोस्रो खेलमा पहिलो हार भोगेको हो । राउन्ड रोबिन लिगमा सात प्रदेश आमनेसामने भएपछि शीर्ष दुई टोली फाइनल खेल्ने प्रावधान छ । वाग्मतीले जस्तै गत वर्षको उपविजेता सुदूरपश्चिमले पनि पहिलो दुई खेलमै विजय हात पारेको छ ।

सुदूरपश्चिमले लुम्बिनीलाई १ सय रनले पराजित गर्‍यो । दीपक बोहराको अर्धशतकप्रेरित सुदूरपश्चिम ४९.५ ओभरमा १ सय ८० रनमा अलआउट भयो । दीपकले ७३ बल खेली ८ चौका प्रहार गर्दै ५४ रन बनाए । गजेन्द्र बोहरा १९, अर्का दीपक बोहरा र नरेन्द्र साउद समान १७, विशाल ऐर १६ तथा हेमन्त धामी १५ रनमा आउट भए । लुम्बिनीका कप्तान विशालविक्रम केसीले ६ ओभरमा १ मेडन राख्दै २० रन खर्चेर ३ विकेट लिए । त्यस्तै नर सार्की र निर्मल गुरुङले २–२ तथा दुर्गेश गुप्ता र रमेश कुर्मीले १–१ विकेट लिए ।

मूलपानी क्रिकेट मैदानको कठिन विकेटमा लुम्बिनी २१ ओभरमा ८० रनमै अलआउट भयो । आकाश त्रिपाठीले २२, देव खनालले १३ र मनोज मगरले ११ रनबाहेक अन्यले दोहोरो स्कोर बनाउन सकेनन् । सुदूरपश्चिमका आकाश चन्दले ३ ओभरमा १३ रन खर्चेर ५ विकेट लिए । उनी नै प्लेयर अफ द म्याच बने । हेमन्तले ३ र कैलाश ऐरले १ विकेट लिए ।

प्रकाशित : मंसिर १०, २०७९ ०८:०३
पूरा पढ्नुहोस्
प्रतिक्रिया
पठाउनुहोस्
×