बिक्रीमा रोनाल्डो !- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

बिक्रीमा रोनाल्डो !

एपी

दोहा — बिक्रीमा छन् ‘क्रिस्टियानो रोनाल्डो’ । तिनै रोनाल्डोले पोर्चुगलका लागि बिहीबार आफ्नो पाँचौं तथा सम्भवतः अन्तिम विश्वकप सुरुआत गर्दैछन् । यी ३७ वर्षीय मंगलबार रातिबाट क्लबविहीन भएका छन् । म्यानचेस्टर युनाइटेडले उनीसँगको अनुबन्ध तोडेको छ ।

कारण स्पष्ट छ, केही दिनअगाडि उनले अन्तर्वार्ता दिने क्रममा म्यानचेस्टरका व्यवस्थापक एरिक टेन हाग, क्लब मालिक र आफ्ना अधिकांश सहकर्मीको अचम्मले खेदो खनेका थिए ।

अहिले तत्कालका लागि उनलाई किन्न सक्ने टिम कोही पनि छैन । हुनसक्छ, यस विश्वकपमा राम्रो प्रदर्शन गर्न सक्यो भने उनका सम्भावित क्रेता पनि अगाडि आउनेछन् । तर, सबैलाई लागिरहेको छ, पाँचपल्टको बालोन डी’अर विजेता रोनाल्डोले आफ्नो खेलजीवनका सबै राम्रा दिन पछाडि छाडिसके । भलै, उनले अहिलेसम्म गोल गर्ने कला भने बिर्सेका छैनन् । क्लब र खेलाडीबीचको आपसी सहमतिमा अनुबन्ध तोड्ने निर्णययता रोनाल्डोले पहिलोपल्ट मिडियासामु बोलेका छन् ।

उनी भन्छन्, म्यानचेस्टरसँगको कचमचले पोर्चुगलका लागि उनको प्रदर्शनमा केही फरक पर्ने छैन । तर त उनी कुनै प्रकारले टिममा व्यवधान पुर्‍याउन चाहन्छन् । पोर्चुगल आफैंले भने स्टेडियम–९७४ मा हुने समूह चरणको खेलमा घानाको सामना गर्दै छ । तय के छ भने यी सबै पृष्ठभूमिमा रोनाल्डो आफ्ना आलोचकलाई शान्त पार्न अझ राम्रो खेल्न प्रेरित रहन सक्छन् । उनी पक्कै पहिलोपल्ट विश्वकप जित्न चाहन्छन् ।

यसले उनको सम्भावित क्रेता पनि तयार पार्नेछ । दोहा झरेयता उनले भनेका छन्, ‘यो पोर्चुगाली टिमलाई केहीले पनि हल्लाउन सक्ने छैन ।’ सायद घानाविरुद्धको खेलमा पोर्चुगल पराजित भए, टिम आफैं नराम्रोसँग हल्लिने छ । विश्वकपमा जति टिम छन्, त्यसमध्ये सबैभन्दा तल्लो वरीयताको टिम हो घाना । त्यसो भनेको ६१ औं नम्बरको टिम । यो समूहका अन्य दुई टिम उरुग्वे र दक्षिण कोरिया कम्तीका छैनन् । अझ बलिया नै छन् ।

घानाका लागि साउदी अरेबियाले बाटो देखाइसकेको छ । साउदी टिमले मंगलबार मात्रै लियोनल मेसीको अर्जेन्टिनालाई अचम्मको तरिकाले हराएको थियो । घाना फेरि कमजोर छैन लुइस स्वारेजले हुँदै झेल्ली नगरेर बल हातले नरोकेको भए सन् २०१० को विश्वकपमा यो टिमले सेमिफाइनल खेलिसक्थ्यो । ‘द ब्ल्याक स्टार्स’ सँग अहिले उत्तिकै लयमा रहेका खेलाडी छन् । आर्सनलका मिडफिल्डर थोमस पार्टे भरपर्दा छन् । उनकै प्रदर्शनको मदतमा आर्सनल लिगमा उकालो लागिरहेको छ ।

घानासँग मोहम्मद कुडोस पनि छ । यी खेलाडीले युरोपेली च्याम्पियन्स लिगमा अयाक्सका लागि मौका पायो कि गोल गरिहाल्ने काम गरिरहेका छन् । खेलअगाडि त पोर्चुगल नै जितका लागि बलियो प्रत्याशी हो । प्रशिक्षक फर्नान्डो सान्तोसका लागि टिम कति गहिरोसँग विकल्प छ भने उनीसामु विकल्प नै विकल्पमात्र छ । उनकै नेतृत्वमा पोर्चुगलले सन् २०१६ को युरो पनि जितेको थियो । पोर्चुगाली टिम सम्हालेको ८ वर्ष भयो उनी समर्थकमाझ झन् लोकप्रिय छन् ।

उनी कडा निर्णय गर्न माहिर छन् । रोनाल्डोलाई बेन्चमा राखेर खेल सुरु गर्न पनि डराउँदैनन् । किनभने उनले यस्तै काम जुनमा आफ्नो खास प्रतिद्वन्द्वी स्पेनविरुद्ध गरेका थिए । यो नेसन्स लिगको खेल थियो । रोनाल्डोलाई नखेलाउनु पछाडि उनले रणनीतिक कारण देखाएका थिए । सायद घानाविरुद्ध पहिलो खेलमै उनले रोनाल्डोलाई नखेलाउने सम्भावना कम छ । सायद सान्तोस आफैंले पनि म्यानचेस्टर र रोनाल्डोबीच के कस्तो भएको थियो, त्यसमा धेरै ध्यान दिने पक्षमा छैनन् ।

प्रकाशित : मंसिर ८, २०७९ ०७:५७
प्रतिक्रिया
पठाउनुहोस्

अर्थपूर्ण मौनतामा नेयमार

ब्राजिली प्रशिक्षक टिटेसामु पहिलो खेलमा सबै खेलाडी ठीकसँग उपलब्ध
एपी

दोहा — विश्वकपका लागि कतार आएयता नेयमरले केही पनि बोलेका छैनन् । खासमा उनलाई बोल्नु आवश्यक छैन । यस्तो किनभन्दा विश्वकपलाई लिएर उनको जे जस्तो नियत छ, त्यो खुलस्त छ ।

पेरिस सेन्ट जर्मेन (पीएसजी) का स्टारले हालै सामाजिक सन्जालमा एक तस्बिर राखेका छन् । त्यसमा कतार उड्न लागेका नेयमरले आफ्नो पोसाकमा छ तारा देखाएका छन् । यसको संकेत हो, ब्राजिलले छैटौंपल्ट विश्वकप जितोस् भन्नु नै न हो ।

दक्षिण अमेरिकी टिमका फरवार्ड रिचार्लिसन भन्छन्, ‘यो त हामी सबैको सपना हो । नेयमरले किन यस्तो तस्बिर राखे भने यो उनको पनि सपना हो । उनी जित्न चाहन्छन् । त्यसका लागि उनी आफूले सक्दो गर्न तयार छन् । उनी जे गर्न चाहन्छन्, गर्न सक्छन् । नेयमर खुसी भएमा हामी पनि खुसी हुनेछौं । यो नै हाम्रा लागि सबैभन्दा महत्त्वपूर्ण कुरा हो ।’ खासमा यो ब्राजिली टिमकै भावना हो । सबैलाई थाहा छ, नेयमरको लय र मानसिक स्थितिले धेरै हदसम्म ब्राजिलको यात्रा तय गर्नेछ ।

ब्राजिलले बिहीबार विश्वकपमा आफ्नो पहिलो खेल खेल्दै छ । प्रतिद्वन्द्वी छ सर्बिया । यो यस्तो विपक्षी टिम हो, जसले विश्व फुटबलको माथिल्लो स्तरमा अहिलेसम्म खासै केही गरेको छैन । अहिले नेयमर लयमा छन्, उनमा चोटको समस्या छैन । सन् २०१८ को विश्वकपमा ब्राजिल बेल्जियमको हातबाट क्वाटरफाइनलमा पराजित हुँदा नेयमर घाइते थिए । उनीबारे एउटै मात्र समस्या छ । त्यो हो, उनी ढिला मात्रै इटालीको टुरिन पुगे ।

टुरिनमा ब्राजिलले आफ्नो प्रशिक्षण केन्द्र बनाएको थियो, तर नेयमर विमान यात्राको तालिकामा समस्या हुँदा त्यहाँ समयमै पुग्न सकेनन् । ब्राजिली प्रशिक्षक टिटेसामु टिमको पहिलो खेलमा सबै खेलाडी ठीकसँग उपलब्ध हुनेछन् । उनले एउटै प्रश्नको उत्तर खोज्नुपर्नेछ, नेयमरसँगै मिडफिल्डर लुकास पाक्वेटालाई खेलाउने हो कि आक्रामक मनस्थितिका भिनिसियस जुनियरलाई उतार्ने हो ? अहिलेसम्म नेयमरले ब्राजिलका लागि ७५ गोल गरिसकेका छन् ।

उनले थप दुई गोल गर्ने हो भने पेलेको नाममा रहेको कीर्तिमान बराबर हुनेछ । त्यसमाथि नेयमरका लागि भाग्य भनौं वा के उनले विश्वकप जस्तो प्रतियोगितामा यो कीर्तिमान बराबरी गर्नेमात्र होइन, त्यसलाई उछिन्ने अवसर पनि छ । संयोग भनौं, विश्वकप आफैं त्यो देश कतारमा भइरहेको छ, जसले उनको क्लब पीएसजीमा लगानी गरेको छ । पीएसजीमा उनलाई भित्र्याउन पनि कतारले कीर्तिमान २३ करोड डलर खर्चेको थियो ।

स्वतन्त्र देशको पहिचान पाएयता सर्बिया चौथोपल्ट विश्वकप खेलिरहेको छ र अहिलेसम्म उसले एकैपल्ट मात्र समूह चरण काटेर अगाडि बढेको छ । पाँचपल्ट प्रयास गर्दा पनि यो टिम अहिलेसम्म युरोमा छनोट हुन सकेको छैन । अहिलेको सर्बियाली टिममा तिनै खेलाडीको बाहुल्य छ, सन् २०१५ जसले यू–२० विश्वकपको फाइनलमा ब्राजिललाई हराएर उपाधि जित्दा खेलेका थिए । यही टिमले त्यसको दुई वर्षअघि यू–१९ युरोको फाइनलमा पनि फ्रान्सलाई हराएको थियो ।

एलेक्जान्डर मिट्रोभिच, सेर्गेज मिलिनोकोभिच–साभिच, नेमन्जा माकसिमोभिच र आन्द्रेजिया जिभ्कोभिचले उमेर समूहको प्रतियोगितामा जस्तै सफलता पाए पनि त्यसलाई राष्ट्रिय टिममा भने भित्र्याउन सकेका छैनन् । सायद सर्बियाली टिमको सबैभन्दा ठूलो आस २२ वर्षीय सेन्टर फरवार्ड डुसान भ्लाहोभिचमा टिकेको छ, जसले फिओरेन्टिना र युभेन्ट्सका लागि पछिल्ला दुई सिजन सबैखाले प्रतियोगितामा गरेर ५० गोल गरेका छन् ।

यो महत्त्वपूर्ण प्रश्न, के सर्बियाली टिममा त्यस्तो रक्षापंक्ति पनि छ र, जसले ब्राजिलको विविधताले भरिएको आक्रमण रोक्न सक्छ । समूह ‘सी’ मा ब्राजिलका प्रतिद्वन्द्वीमा स्विट्जरल्यान्ड र क्यामरुन छन् । सर्बियाली प्रशिक्षक ड्रागन स्टोजकोभिच भन्छन्, ‘यो समूह वास्तवमै कठिन छ । हाम्रा लागि आफूलाई सिद्ध गर्ने यो राम्रो अवसर हो ।’ तर यही चुनौती ब्राजिलका लागि धेरै नहुन सक्छ, विशेषतः नेयमर जत्तिको खेलाडीका लागि ।

प्रकाशित : मंसिर ८, २०७९ ०७:५१
पूरा पढ्नुहोस्
प्रतिक्रिया
पठाउनुहोस्
x
×