म्यानचेस्टरबाट रोनाल्डो अलग्गिने- खेलकुद - कान्तिपुर समाचार

म्यानचेस्टरबाट रोनाल्डो अलग्गिने

कान्तिपुर संवाददाता

लन्डन — पोर्चुगाली फरवार्ड क्रिस्टियानो रोनाल्डोले तत्काल लागू हुने गरेर मंगलबारबाट इंग्लिस प्रिमियर लिग क्लब म्यानचेस्टर युनाइटेड छाड्ने भएका छन् । विवादास्पद अन्तर्वार्तामा क्लब र प्रशिक्षक एरिक टेन हागको चर्को आलोचना आएपछि यो स्थिति बनेको हो ।

क्लब र खेलाडीले आपसी सहमतीमा अलग्गिने निर्णय गरेको बताएका छन् । युनाइटेडले प्रेस विज्ञप्तिमा भनेको छ, ‘दुई फरक समय क्लबमा पुर्‍याएको योगदानका लागि हामी धन्यवाद दिन चाहन्छौं ।’

विश्वकपका लागि अहिले प्रिमियर लिग विश्राममा छ र त्यस अगाडि टेन हागको नेतृत्वमा पहिलो सिजन खेल्दै म्यानचेस्टर अंक तालिकाको पाँचौं स्थानमा छ । टिमले सुधारिएको प्रदर्शन गरिरहेको छ ।

खराब प्रदर्शनका कारण प्रशिक्षक टेन हागले रोनाल्डोलाई नियमित खेलाइरहेका थिएनन् । रोनाल्डो भने पोर्चुगाली टिमसँगै कतारमा छन् ।

प्रकाशित : मंसिर ७, २०७९ ०६:३९
प्रतिक्रिया
पठाउनुहोस्

गुल्मीमा जिप दुर्घटना, ४ को मृत्यु, ५ जना घाइते

गगनशिला खड्का

गुल्मी — गुल्मीको सत्यवतीमा जिप दुर्घटना हुँदा ४ जनाको घटनास्थलमै मृत्यु भएको छ । सत्यवती गाउँपालिका– ३, ठूलोलुम्पेकबाट कुढडाँडा जाँदै गरेको लु ३ च ५३४० नम्बरको जिप बुधबार बिहान कुढडाडाँमा दुर्घटना हुँदा ४ जनाको घटनास्थलमै मृत्यु भएको र ५ जना घाइते प्रहरीले जनाएको छ ।

राति करिब बुधबार बिहान २ बजे भएको दुर्घटनामा परी मृत्यु हुनेहरुमा सत्यवती– ३ का जिप धनी ५१ वर्षका झलक सोमै, ५५ वर्षका टीका राहादी, ४७ वर्षका रनबहादुर सिजापति, २५ वर्षका मिलन तरामोको रहेको जिल्ला ट्राफिक प्रहरी कार्यालय गुल्मीका प्रहरी नायब निरीक्षक कृष्णप्रसाद आचार्यले बताए।

घाइते हुनेहरुमा सत्यवती– ३ का ३३ वर्षका कार्बाेलिन सोमै, ४३ वर्षकी जमुना सोमै, ३२ वर्षका चेतमान सिञ्जाली, ४९ वर्षका गिरबहादुर राहादी र खण्डन सोमै रहेको आचार्यले बताए ।

घाइते ५ जनालाई थप उपचारको लागि पाल्पा पठाइएको सत्यवती गाउँपालिकाका उपाध्यक्ष निरमाया तरामुले जानकारी दिइन् ।

दुर्घटनाको सूचना प्राप्त हुनसाथ उद्धारको लागि एम्बुलेन्स सहितको प्रहरीको टोली घटनास्थलतर्फ लागेको गुल्मीका प्रमुख जिल्ला अधिकारी पुण्यविक्रम पौडेलले बताए ।


प्रकाशित : मंसिर ७, २०७९ ०६:३७
पूरा पढ्नुहोस्
प्रतिक्रिया
पठाउनुहोस्
×