बेन्जेमाको स्थानमा अर्को खेलाडी नल्याइने- खेलकुद - कान्तिपुर समाचार

बेन्जेमाको स्थानमा अर्को खेलाडी नल्याइने

एएफपी

दोहा — डिफेन्डिङ च्याम्पियन फ्रान्सले चोटग्रस्त खेलाडी करिम बेन्जेमाको स्थानमा विश्वकप टिममा अर्को खेलाडी नल्याउने भएको छ । प्रशिक्षक डिडिएर डेसक्याम्पले आइतबार यसबारे घोषणा गरेका छन् । फ्रान्सलाई अर्को ठूलो धक्काका रूपमा चोटका कारण बेलन डे’अर विजेताले खेल्न नसक्ने भएका हुन् ।

शनिबार टिम अभ्यासको क्रममा उनलाई तिघ्रामा चोट लागेको हो र उनको अनुपस्थितिले फ्रान्सको विश्वकप उपाधि रक्षा गर्ने अभियान अझ कमजोर भएको छ । डेसक्याम्पले रियल म्याड्रिड फरवार्डको स्थानमा अर्को खेलाडीका लागि फिफासँग अनुरोध नगर्ने बताए । प्रशिक्षकसँग नयाँ खेलाडी माग गर्न सोमबारसम्मको समय रहेको छ ।

डेसक्याम्पले फ्रान्सको टीएफ–वानलाई दिएको अन्तर्वार्तामा बेन्जेमा घाइते हुनु ठूलो नोक्सानी रहे पनि वर्तमान टिममा आफ्नो पूर्वआत्मविश्वास रहेको बताए । यस्तै उनले टिम आफैंमा उत्कृष्ट रहेको पनि दाबी गरे । उनले भनेका छन्, ‘हाम्रो जुन टिम उद्देश्य छ, त्यसका लागि अहिलेको टिम पर्याप्त छ । मलाई खेलाडीमाथि पनि उत्तिकै विश्वास छ ।’

उनले फ्रान्सेली टिम बेन्जेमालाई ठीक ढंगले व्यवस्थापन गर्न नसकेको आरोपबारे केही बोल्न चाहेनन् । गत महिनादेखि बेन्जेमा चोटबाट संघर्षरत छन् । डेसक्याम्पले भने, ‘तपाईंहरू विवाद सिर्जना गरेको हेर्न चाहनुहुन्छ । तर टिममा सबथोक ठीक छ र नियन्त्रणमा छ । चोट अभ्यासका क्रममा बल्झेको होइन । जोकोहीलाई पनि चोटको समस्या हुन सक्छ ।’

प्रकाशित : मंसिर ५, २०७९ ०३:०६
प्रतिक्रिया
पठाउनुहोस्

नन्दनलाई पहिलो पटक मौका, आदिल बाहिर

कान्तिपुर संवाददाता

काठमाडौँ — नन्दन यादवलाई समावेश गर्दै नेपालले विश्वकप लिग २ को नामिबिया भ्रमणका लागि १४ सदस्यीय टोलीको घोषणा गरेको छ । बलिङ अलराउन्डर नन्दन पहिलो पटक राष्ट्रिय टोलीमा स्थान पाउँदा ब्याटिङ अलराउन्डर मोहम्मद आदिल आलमलाई बाहिर राखिएको छ ।

डिसेम्बर २ देखि ८ सम्म नामिबियामा हुने लिग–२ मा नेपालले नामिबिया र स्कटल्यान्डसँग प्रतिस्पर्धा गर्दै छ । नेपालले डिसेम्बर २ मा घरेलु टोली नामिबियासँग खेलेर यात्रा प्रारम्भ गर्नेछ । त्यसपछि डिसेम्बर ४ मा स्टकल्यान्ड, डिसेम्बर ७ मा नामिबिया र डिसेम्बर ८ मा स्कटल्यान्डसँग खेल्नेछ ।

भर्खर यूएईविरुद्धको तीन एकदिवसीय अन्तर्राष्ट्रिय शृंखलामा नन्दन नेपालको १६ सदस्यीय टोलीमा थिएनन् । यूएईसँगको शृंखलामा आदिललाई एउटै खेलमा खेलाइएको थिएन । त्यसअघिका खेलमा आदिलले राम्रो प्रदर्शन गर्दै आएका थिए । यूएईसँगको शृंखलापछि प्रशिक्षक मनोज प्रभाकरले आदिल ट्वान्टी–२० शैलीको खेलाडी भएको जनाएका थिए ।

रोहित पौडेलको कप्तानीमा रहेको नेपाली टोलीमा नन्दनसहित, अर्जुन साउद, आसिफ शेख, ज्ञानेन्द्र मल्ल, दीपेन्द्रसिंह ऐरी, आरिफ शेख, कुशल भुर्तेल, गुलसन झा, ललित राजवंशी, करण केसी, सोमपाल कामी, हरिशंकर शाह, सागर ढकालले स्थान पाएका छन् ।

नेपाल २० खेलमा १७ अंक जोडी ७ राष्ट्र सहभागी लिग–२ को अंक तालिकामा छैटौं स्थानमा छ । सबै ३६ खेल खेलिसकेको ओमान ४४ अंकसहित शीर्षस्थानमा छ । स्कटल्यान्ड २८ खेलमा ४०, अमेरिका ३२ खेलमा ३२, नामिबिया २४ खेलमा २८, यूएई २६ खेलमा २७ अंक जोडी क्रमश: दोस्रो देखि पाँचौं स्थानमा छन् । २५ खेल खेलेको पपुवा न्युगिनी ५ अंकसहित पुछारमा छ । लिग–२ को शीर्ष ३ टोली विश्वकप छनोटमा पुग्नेछन् भने शीर्ष ५ स्थानमा रहने टोलीको एकदिवसीय अन्तर्राष्ट्रिय मान्यता यथावत् रहनेछ । नेपालले लिग–२ का ४ शृंखलामा १६ खेल खेल्न बाँकी रहेको छ ।

प्रकाशित : मंसिर ५, २०७९ ०३:०३
पूरा पढ्नुहोस्
प्रतिक्रिया
पठाउनुहोस्
×