विश्वकपले ईपीएल ६ साता विश्राम
लन्डन — इंग्लिस प्रिमियर लिग (ईपीएल) ले अहिलेसम्म कहिल्यै नभएको ६ साताको विश्राम लिँदै छ । कारण हो, कतारमा हुने विश्वकप । यो सप्ताहन्तका खेल सबै सकिएका छन् । अब फेरि डिसेम्बर २६ देखि मात्र खेल सुरु हुनेछ । विश्वकप आफैं नोभेम्बर २० मा सुरु भएर डिसेम्बर १८ मा सकिनेछ । यस्तोमा प्रश्न हो, विश्वकप विश्रामअघि ईपीएलको वास्तविक स्थिति कस्तो छ त ? यो प्रश्न किन महत्त्वपूर्ण छ भने यो लिग नै त्यस्तो प्रतियोगिता हो, जसबाट सबैभन्दा बढी खेलाडीले विश्वकप खेल्नेछन् ।
आर्सनल लिगको शीर्षस्थानमा छ । टोलीलाई दोस्रो स्थानमा रहेको डिफेन्डिङ च्याम्पियन म्यानचेस्टर सिटीमाथि ५ अंकको अग्रता प्राप्त छ । सन् २००७–०८ को सिजनयता आर्सनल क्रिसमसअघि लिग तालिकाको शीर्षस्थानमा रहेको पहिलोपल्ट हो । आर्सनलको १४ खेलबाट ३७ अंक छ । उसले आफ्नो इतिहासकै सबैभन्दा राम्रो सुरुआत पाएको छ । महत्त्वपूर्ण तथ्य के छ भने सुरुआती १४ खेलमध्ये १२ मा विजयी रहने सबै टिमले अहिलेसम्म अन्त्यमा लिग जितेको छ ।
त्यतिमात्र होइन, पछिल्लो १३ सिजनमा क्रिसमसका बेला शीर्ष रहने टिममध्ये १० ले अन्ततः लिग उपाधि पनि जितेको छ । यसले आर्सनललाई उत्साहित बनाउने नै छ । तर निराश हुनुपर्ने तथ्य पनि छ । डिसेम्बर २५ मा शीर्षस्थानमा रहेर आर्सनल पाँचपल्ट लिग अन्त्यमा विजेता नरहेको इतिहास छ । न्युकासल युनाइटेड भने तेस्रो स्थानमा छ र यो टोलीका लागि एक प्रकारले अनेक्षित हो । न्युकासल आर्सनलभन्दा ७ अंकले पछाडि छ ।
सन् २००१–०२ यता पहिलोपल्ट न्युकासल यो स्थितिमा पुगेको हो । टोटेनहम थप एक अंक पछाडि छ न्युकासलभन्दा । यसरी लिगको शीर्ष चारको स्थिति छ भने त्यस पछाडि म्यानचेस्टर युनाइटेड र लिभरपुल छन् । म्यानेस्टर लयमा फर्कन प्रयासमा छ भने लिभरपुलको प्रदर्शन कहिले राम्रो त कहिले खराब भइरहेको छ । चेल्सीले लिगका पछिल्ला ५ खेलमध्ये कुनैमा पनि जित निकाल्न सकेको छैन । टोली आठौं स्थानमा छ । यो चेल्सीका लागि निकै गाह्रो समय छ ।
वास्तवमै निकै रमाइलो स्थिति के छ भने चेल्सी पछाडिका सबै टिमले आफूलाई रेलिगेसन दबाब महसुस गर्नेछ । अझ भनौं, रेलिगेसन क्षेत्रमै छन् । नवौंमा रहेको फुलहम र १८ औं स्थानमा रहेको नटिङ्घम फरेस्टबीच जम्माजम्मी ६ अंकको मात्र भिन्नता छ । उल्भस सबैभन्दा पछाडि छ, सुरक्षात्मक स्थितिबाट ४ अंक पछाडि । त्यसैले सायद भन्न सकिन्छ, यस सिजन रेलिगेसन पर्ने कुनै टिम पहिलो हुनेछ भने त्यो उल्भस नै हुनेछ, अरू होइन ।
विश्वकप सुरु हुन ठ्याक्कै अगाडि दुई टिमले व्यवस्थापक फेरेका छन् । उल्भसका स्टिभ डेविसको स्थानमा जुलेन लोपेटेगुइ आएका छन् भने साउथह्याम्पटनले नयाँ प्रशिक्षक पाएको छ नथान जोन्सका रूपमा । साउथह्याम्पटन पुछारबाट दोस्रोमा छ । सट्टेबाजका लागि अब बर्खास्त हुने प्रशिक्षकका रूपमा मानिएका छन् एभरटनका फ्रान्क लाम्पार्ड । रेलिगेसन क्षेत्रबाट एक अंक माथि रहेको एभरटनले पछिल्लो ३ खेलमा हार बेहोरेको छ ।
डिफेन्डिङ च्याम्पियन सिटीका १६ खेलाडीले विश्वकप खेल्नेछन् । यो कुनै पनि क्लबका लागि कीर्तिमान हो । ब्रेन्टफोर्डविरुद्ध हालै पराजित खेलमा १६ मध्ये १० खेलाडीले सुरुदेखि खेले । त्यसमध्ये एक खेलाडीले विश्वकप खेल्ने छैनन् । उनी हुन् नर्वेका इर्लिङ हल्यान्ड । नर्वे छनोट नै हुन सकेनन् । म्यानचेस्टर युनाइटेडका १५ खेलाडी कतार जानेछन् । चेल्सीका १२, टोटेनहमका ११ र आर्सनलका १० । अचम्मले न्युकासलका ५ र लिभरपुलका ५ खेलाडीमात्र कतार जानेछन् ।
हुनसक्छ, विश्वकपले लिभरपुललाई धेरै फाइदा गराउन सक्छ । किनभने विश्वकपपछि फेरि लिग सुरु हुँदा उसको टिममा थाकेका खेलाडी धेरै हुने छैनन् । मोहम्मद सलाहको इजिप्ट नै छनोट भएको छैन, त्यसैले उनले यो विश्राममा राम्रै आराम पाउने छन् । साउथ
ह्याम्पटन र बर्नमाउथबाट समान दुई तथा लिड्सबाट तीन खेलाडीले मात्र विश्वकप खेल्नेछन् । यस्तोमा यी टिमले पनि विश्वकपपछि राम्रो प्रदर्शन गर्न सक्नेछन् ।
प्रकाशित : कार्तिक २९, २०७९ ०६:५२
