स्कुल बास्केटबलमा रेडियन्ट विजयी- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

स्कुल बास्केटबलमा रेडियन्ट विजयी

कान्तिपुर संवाददाता

काठमाडौँ — आयोजक रेडियन्ट पब्लिकले आठौं रेडियन्ट कप अन्तरविद्यालय बास्केटबल प्रतियोगिताको सिनियर गर्ल्सतर्फ सफलता पाएको छ ।

घरेलु कोर्टमा रेडियन्टले बुधबार रिब्सलाई १८–७ स्कोरले पराजित गर्‍यो । रेडियन्टकी दिव्यांशा कार्कीले ८ स्कोर जोडिन् । रेडियन्ट समूह ‘सी’ को विजेता बन्दै क्वाटरफाइनल पुग्यो । रिब्स पनि समूह उपविजेताका भएर क्वाटरफाइनल पुग्यो ।

गर्ल्समै इनोभेटिभले सनसाइनलाई ११–६ र स्वर्णिमले विल्सनलाई ११–५ ले हराए । इनोभेटिभकी पूजा थापाले ८ र स्वर्णिमकी अरिभानाले १० स्कोर गरे ।

सिनियर ब्वाइजमा इडेन ब्रिज एकेडेमी (ईबीए) ले रेडियन्ट रिडर्सलाई ३७–२४ ले हराएर प्रिक्वाटरफाइनलमा स्थान सुरक्षित गर्‍यो । ईबीएका सौगातले १७ स्कोर जोडे । जेनिथले बौद्ध चिल्ड्रेन हेभनलाई ३५–१४, काठमाडौं जेभियरले हार्टल्यान्डलाई ४०–३६ तथा स्वर्णिमले नेपाल सेन्ट्रललाई ३१–१८ ले निराश पारे । जेनिथका सुशील शाहीले १४, काठमाडौं जेभियरका आदित्यले १० र स्वर्णिमका दीपेश शाक्यले १७ स्कोर बनाए ।

जुनियर ब्वाइजमा ईबीएले ओरेकल रेमाथि २६–३ स्कोरको सहज जित दर्ता गर्‍यो । ईबीए क्वाटरफाइनलमा पुग्यो । टोलीका निखिल शाहीले २० स्कोर गरे । जुनियर ब्वाइजमै विधान कार्कीको १० स्कोरमा आयोजक रेडियन्टले महामन्जुश्रीलाई १३–१० स्कोरले हरायो ।

प्रकाशित : कार्तिक २३, २०७९ १९:५६
प्रतिक्रिया
पठाउनुहोस्

पूर्वमन्त्री राईद्वारा ‘दस दृष्टि’ सार्वजनिक

रुपा गहतराज

नेपालगन्ज — जनता समाजवादी पार्टी नेपालबाट बाँके क्षेत्र नं २ का प्रतिनिधिसभा उम्मेदवार मोहम्मद इश्तियाक राईले आफ्नो क्षेत्र विकासका लागि आफ्ना ‘दस दृष्टि’ सार्वजनिक गरेका छन्।

राईले आफ्ना दृष्टिबारे बुधबार नेपालगन्जमा पत्रकार सम्मेलन गरेर जानकारी गराएका हुन् । बाँके क्षेत्र नं २ को समग्र विकास र नागरिकको समृद्धिका लागि उनले विभिन्न दसवटा क्षेत्रमा गर्ने सामाजिक आर्थिक विकासका योजनाहरू समेटेका छन्।

विभिन्न दस बुँदामा समेटिएका उनको क्षेत्रगत विकासका दृष्टिहरूमा यहाँको स्वास्थ्य, शिक्षा, भौतिक निर्माण, युवा, खेलकुद, सामाजिक सुरक्षा, महिला समाबेशीकरण लगायतका विषयहरू समेटिएका छन्।

पत्रकारहरूसँगको साक्षात्कारमा उनले आफूले यो क्षेत्रको विकासका लागि निरन्तर काम गरिरहेको र अझ उन्नत विकासका लागि थप योजनाहरू ल्याएको बताए।

‘हामीले काम गर्नसक्छौं, गरिरहेका पनि छौं । काम गरिरहेको र गर्नसक्ने व्यक्तिलाई भोट दिनुस् भनेका छौं,’ राईले भने । मतदातालाई रिझाउनका लागि आफूहरूले कुनै पनि झुटा योजना र सपनाहरू नबाँडेको पनि उनले बताए।

‘बरू हाम्रा विरूद्ध विपक्षी मित्रहरूले अफवाह फैलाइरहनुभएको छ। उहाँहरूले हामीलाई एकोहोरो भ्रष्टाचार गरेको भनेर भ्रमहरू फिँजाइरहनु भएको छ। कसले काम गरेको छ र कसले भ्रष्टाचार गरेको छ भन्ने कुरामा त जनता प्रस्टै छन्। मैले कहीँ कतै भ्रष्टाचार गरेको छु भने प्रमाणित गरिदिनुस् म सजाय भोग्न तयार छु,’ नेता राईले भने ।

२०७४ सालको निर्वाचनमा राई २ वटा गठबन्धनलाई पराजित गर्दै प्रतिनिधिसभा सदस्यमा विजयी भएका थिए । राई निवर्तमान भौतिक पूर्वाधार तथा यातायात मन्त्री हुन् ।

प्रकाशित : कार्तिक २३, २०७९ १९:४५
पूरा पढ्नुहोस्
प्रतिक्रिया
पठाउनुहोस्
×