नाटकीय ‘टाइ’ ले मधेस सेमिफाइनलमा- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

नाटकीय ‘टाइ’ ले मधेस सेमिफाइनलमा

पुलिस र मधेसबीचको अन्तिम लिग खेलले समूह विजेता छान्ने
कान्तिपुर संवाददाता

काठमाडौँ — हारले मधेस प्रदेश प्रधानमन्त्री कप पुरुष एकदिवसीय राष्ट्रिय क्रिकेट प्रतियोगिताको समूह चरणबाटै बाहिरिने सक्थ्यो । मधेस र वाग्मती प्रदेशबीच खेलको अन्तिम ओभरहरू निकै रोचक स्थितिमा पुगेको थियो । यो स्थितिमा मधेसले उत्कृष्ट पुनरागमन गर्दै ‘टाइ’ नतिजासाथ सेमिफाइनल पुगेको छ ।

प्रधानमन्त्री कप क्रिकेट प्रतियोगितामा सोमबार वाग्मती प्रदेशको विकेट लिएपछि मधेस प्रदेशका खेलाडी । तस्बिर : हेमन्त श्रेष्ठ/कान्तिपुर

टस जितेको मधेसले त्रिवि क्रिकेट मैदान कीर्तिपुरमा १ सय ९० रन जोडेर अलआउट हुनुअघि ४६.२ ओभर खेलेको थियो । अघिल्लो दुई खेल जिते पनि मधेसले समूह चरण पार गर्ने पूर्ण स्थिति बनिसकेको थिएन । मंगलबार समूह चरणको अन्तिम खेलमा बलियो मानिएको नेपाल पुलिस क्लबविरुद्ध खेल्नुपर्ने पृष्ठभूमिमा वाग्मतीविरुद्धको खेल मधेसका लागि निकै महत्त्वपूर्ण थियो ।

मधेसले सूर्य तामाङ र रिजन ढकाललाई २ रनको अन्तरमा आउट गरेपछि जवाफमा आएको वाग्मती ४९.२ ओभरमा १ सय ९० रनमा अलआउट हुन पुग्यो । प्रदीप पासवानलाई सूर्यले ४८ ओभरको पहिलो बलमा छक्का र दोस्रो बलमा चौका प्रहार गर्दा वाग्मतीलाई विजयनिम्ति ३ रन आवश्यक थियो । चौथो बलमा सूर्यले क्याच थमाउन पुगे । वाग्मतीले ४९ औं ओभरमा २ रन जोडेको थियो । तर ५० औं ओभरको दोस्रो बलमा रिजनलाई एलबीडब्लू आउट गरी राजेश यादवले खेललाई ‘टाइ’ बनाए ।

मधेस प्रदेश पहिलो पटक प्रादेशिक ढाँचामा प्रतियोगिताको सेमिफाइनल पुगेको हो । २०७७ मा प्रधानमन्त्री कपको पछिल्लो एकदिवसीय संस्करणमा मधेसले सबै चार खेलमा हार बेहोरेको थियो । पहिलो तीन खेल हारिसकेकाले वाग्मतीलाई यस खेलको जित–हारले सेमिफाइनल समीकरणका लागि कुनै अर्थ राख्दैनथ्यो । तर ‘टाइ’ मार्फत आएको १ अंकले मधेसलाई सेमिफाइनल पुर्‍याएको हो ।

मधेसको ५ अंक पुगेको छ । लुम्बिनी ४ अंकसहित सेमिफाइनल दौडमा कायम थियो । तर नाटकीय ‘टाइ’ खेलले लुम्बिनी औपचारिक रूपमै प्रतियोगिताबाट बाहिरिएको छ । पुलिस यसअघि नै तीन खेल जितेर सेमिफाइनल पुगिसकेको थियो । पुलिस र मधेसबीचको खेलले समूह विजेता छान्नेछ ।

मधेसबाट ओपनरद्वय सन्तोष कार्की २३ र कप्तान हरिशंकर शाह १३ रनमा आउट भए । रोहन बिकले सर्वाधिक ६३ रन बनाए । ९४ बल खेलेका उनले ६ चौका र २ छक्का प्रहार गरे । अनिल शाह १०, विशाल सुस्लिङ ११, विवेक यादव ७, मोहम्मद आदिल अलाम ६, दब्लु मलिक ४ र रुपेश सिंह २ रन बनाउन सफल भए । प्लेयर अफ द म्याच राजेशले २१ बल खेल्दै २ चौकासहित १६ रन बनाए । वाग्मतीका नन्दन यादव र सूर्यले ३–३ तथा रामनरेश गिरीले २ विकेट लिए । नन्दनले ९ ओभरमा १ मेडन राख्दै २७ र सूर्यले १० ओभरमा १ मेडन राख्दै २० रन खर्चे ।

इशान पाण्डे र रित गौतमले १४ ओभरमा ६५ रन जोडेर वाग्मतीलाई राम्रो सुरुआत दिलाए । इशानले ३४ बल खेल्दै ३ चौकासहित ३१ रन बनाए । विकेटकिपर दुर्गेश थापा घाइते भएपछि मधेसको ब्याटिङमा रितले ग्लोभ्स समातेका थिए । तर लेगसाइडमा गएको बल नियन्त्रण गर्दा रित पनि घाइते हुन पुगे । मैदानमा प्राथमिक उपचारपछि अस्पताल पुगेर ओठमा दुई टाँका लगाएर उनी ओपनिङमा ब्याटिङ गर्न आए । उनले ८३ बल खेली ४ चौकासहित ३२ रन बनाए ।

पृथु बाँस्कोटाले वाग्मतीबाट सर्वाधिक ४० रन बनाए । उनले ५२ बलमा २ चौका र १ छक्का प्रहार गरे । विवेक रानामगरले ५१ बलमा २५ रन जोडे । कप्तान ज्ञानेन्द्र मल्ल २, दुर्गेश शून्य, नन्दन ३, प्रतिश ८ रनमा आउट भए । सूर्यले ३२ बल खेली २ चौका र १ छक्कासहित २८ रन बनाए । मधेसका राजेश र प्रदीप पासवानले ३–३ विकेट लिए । राजेशले ६.३ ओभरमा २२ र प्रदीपले ९ ओभरमा ३४ रन खर्चे । रुपेश सिंहले २ र हरिशंकरले १ विकेट लिए ।

सुदूरको पहिलो जित

सुदूरपश्चिमले पहिलो जितका साथ प्रतियोगिता टुंग्याएको छ । मूलपानी क्रिकेट मैदानमा सुदूरले कर्णालीलाई ५ विकेटले पराजित गर्‍यो । कप्तान राजु रिजाल र शेर मल्लले अविजित ५५ रनको साझेदारी गरी सुदूरपश्चिमलाई विजय दिलाए । ३० औं ओभरमा शेरले दीपेन्द्र रावतलाई दुई छक्का र एक चौका प्रहार गरेपछि सुदूरपश्चिमले विजयी रन जोडेको थियो ।

शेर ३३ बलमा समान ३ चौका र छक्का प्रहार गर्दै ३४ तथा राजु २९ बलमा ४ चौका र १ छक्का प्रहार गर्दै २४ रनमा अविजित रहे । गजेन्द्र बोहराले ५१ बलमा ५ चौका र १ छक्कासहित ४१ रन जोडे । वीरेन्द्र नाथ र दीपक टमाटा समान ९ तथा वसन्त खत्री ६ रनमा आउट भए । कर्णालीका कप्तान रवीन्द्र शाहीले १० ओभरमा १ मेडन राख्दै ५९ रन खर्चेर ३ र दीवान पुनले २ विकेट लिए ।

अर्जुन घर्तीले ७० रन बनाए पनि पहिला ब्याटिङ गरेको कर्णाली ३८.१ ओभरमा १ सय ५० रनमा अलआउट भयो । हिमांशु शाहीले १२ र सुवास ऐरले २२ बलमा ५ चौकासहित २४ रन बनाए । नारायण जोशी ४ विकेट लिँदै प्लेयर अफ द म्याच बने । उनले ५.१ ओभरमा १६ रन खर्चे । हेमन्त धामीले ३, गजेन्द्र बोहराले २ र मिलन बोहराले १ विकेट लिए ।

आजका खेल

  • मधेसविरुद्ध पुलिस, कीर्तिपुर
  • आर्मीविरुद्ध कर्णाली, मूलपानी

प्रकाशित : कार्तिक २२, २०७९ ०७:१२
प्रतिक्रिया
पठाउनुहोस्

च्याम्पियन्स लिग ‘ड्र’

लिभरपुललाई रियलसँग बदला लिने अवसर
एएफपी

पेरिस — योर्गन क्लोपको लिभरपुलले गत सिजन फाइनलमा बेहोरेको हारको बदला लिने अवसरका रूपमा युरोपेली च्याम्पियन्स लिगको सोमबार निकालेको अन्तिम १६ को ‘ड्र’ मा रियल म्याड्रिड प्रतिद्वन्द्वी पाएको छ । नकआउट चरणमा एक अर्को रोमाञ्चक खेल पनि तयार भएको छ । त्यसमा पेरिस सेन्ट जर्मेन (पीएसजी) ले बायर्न म्युनिकविरुद्ध खेल्नेछ । यो सन् २०२० को फाइनलको पुनरावृत्ति हुनेछ । त्यसमा जर्मन क्लब विजयी भएको थियो ।

च्याम्पियन्स लिगका एम्बासडर टर्कीका फुटबलर हमित अल्टिनटप 'ड्र' निकाल्दै । तस्बिर : एपी

लिभरपुलले समूह चरणका ६ खेलमध्ये ५ मा जित निकाले पनि शीर्षस्थान हात पार्न सकेको थिएन । इटालीमा भएको खेलमा लिभरपुल ४–१ ले पराजित थियो । एनफिल्ड क्लब सन् २०१८ को फाइनलमा पनि रियलकै हातबाट पराजित भएको हो । रियलले भने आरबी लाइप्जिगसम्मलित समूह जितेको थियो । रियलका पूर्वखेलाडी इमिलो बुट्रागुएनोले लिभरपुलविरुद्धको खेल निकै रोमाञ्चक र प्रतीक्षा गर्नलायक रहेको बताए ।

अहिले कीर्तिमान १४ पल्टको युरोपेली च्याम्पियन संस्थाका निर्देशकमध्य एक रहेका बुट्रागुएनोले भने, ‘यी दुई ऐतिहासिक टिम हुन् ।’ अहिलेको प्रदर्शन मान्ने हो भने रियल नै अर्को चरण प्रवेशलाई बलियो दावेदार छ । कार्लो एन्सेलोट्टीको टिम स्पेनी ला लिगामा अपराजित छ भने इंग्लिस प्रिमियर लिगमा लिभरपुल आठौं स्थानमा छ । लिभरपुलले अघिल्लो दिनको खेलमा टोटेनहमविरुद्ध उसकै घरमा जित भने निकालेको थियो ।

पीएसजी भने आफ्नो समूहको दोस्रो स्थानमा थियो । उक्त समूहमा विपक्षी टिमको मैदानमा बढी गोल गरेको आधारमा बेन्फिका अगाडि थियो । कतारी स्वामित्व रहेको क्लबले यसपल्ट पनि कठिन विपक्षी पाएको छ । कोरोना भाइरस महामारीबीच लिस्वनमा भएको फाइनलमा बायर्नले पीएसजीलाई १–० ले हराएको थियो । पीएसजीले जस्तै म्यानचेस्टर सिटीले पनि अहिलेसम्म उपाधि जितेको छैन । पेप ग्वार्डिओलाको सिटीले लाइप्जिगको सामना गर्नेछ ।

सन् २०२१ को फाइनलमा सिटीलाई हराएको चेल्सीले पनि जर्मन प्रतिद्वन्द्वीका रूपमा बोरुसिया डर्टमन्ड पाएको छ । यी दुई टिम प्रतिस्पर्धात्मक खेलमा पहिलोपल्ट भिड्दै छन् । एन्टोनियो कोन्टेको टोटेनहमले इटालीको च्याम्पियन एसी मिलानविरुद्ध खेल्नेछ । अर्को मिलान क्लब इन्टरले पोर्टो तथा इन्स्ट्राख्ट फ्रान्कफर्टले नेपोलीको सामना गर्नेछ ।समूह जितेको पुरस्कारका रूपमा बेन्फिकाले बेल्जियमको क्लब ब्रुगविरुद्ध खेल्नेछ ।

बार्सिलोनाको प्रतिद्वन्द्वी म्यानचेस्टर

पेरिस– युरोपा लिगको सोमबार नै निकालिएको ‘ड्र’ मा बार्सिलोनाले म्यानचेस्टर युनाइटेडसँग सामना गर्ने अवसर जुरेको छ । बार्सिलोना च्याम्पियन्स लिगको समूह चरणबाट घटुवा भएर युरोपा लिगमा झरेको थियो । उसले यो प्रवृत्ति लगातार दोस्रो सिजन दोहोर्‍याएको थियो । म्यानचेस्टर भने युरोपा लिगको लिग चरणमा आफ्नो समूहको दोस्रो स्थानमा परेको थियो । यी दुई क्लब अन्तिम पटक सन् २०१८–०१९ को च्याम्पियन्स लिग क्वाटरफाइनलमा भिडेका थिए । त्यसमा बार्सिलोना समग्रमा ४–० ले विजयी थियो ।

च्याम्पियन्स लिगबाट झरेको इटालियन क्लब युभेन्ट्सले फ्रान्सको नेन्टेसको सामना गर्नेछ । यो सन् १९९६ को च्याम्पियन्स लिग सेमिफाइनलका पुनरावृत्ति हो । कीर्तिमान छपल्ट युरोपा लिग वा यसको पुरानो संस्करण यूईएफए कप जितेको सेभियाले पीएसजी आइन्डहोभन प्रतिद्वन्द्वी पाएको छ । अयाक्सले युनियन बर्लिन, साख्तर डोनेस्कले रेनेस, बायर लेभरकुजनले मोनाको र रोमाले रेडबुल साल्सबर्गको सामना गर्नेछन् ।

प्रकाशित : कार्तिक २२, २०७९ ०७:०८
पूरा पढ्नुहोस्
प्रतिक्रिया
पठाउनुहोस्
×