यसपटकको विश्वकप मेरो अन्तिम हुनेछ : मेसी

ईएसपीएनसँग शुक्रबार भएको विशेष अन्तर्वार्तामा उनले भनेका छन्, ‘पक्कै पनि यो मेरो अन्तिम विश्वकप हो ।’ सन् २०१४ को विश्वकपमा उप-विजेतामै चित्त बुझाएका मेसीले सन् २०२१ मा आफ्नै नेतृत्वमा कोपा अमेरिका जितेका थिए । उनको सफल फुटबल खेल जीवनमा भने अहिलेसम्म विश्वकप उपाधि चुम्न सकेका छैनन् ।

मेसीले भनेका छन्, ‘म अहिले विश्वकपको प्रतीक्षामा छु । म केही आँत्तिएको पनि छु र दबाब पनि महसुस गरिरहेको छु । म विश्वकपमा खेल्न चाहन्छु । त्यसमा के हुनेछ, कस्तो हुनेछ, त्यसको पर्खाइमा समेत छु ।’ मेसीले सन् २००५ मा अन्तर्राष्ट्रिय फुटबलमा डेब्यु गरेका थिए र अहिलेसम्म अर्जेन्टिनाका लागि मात्रै १ सय ६४ खेलमा ९० गोल गरेका छन् ।

पाँचौं विश्वकप खेल्ने क्रममा उनले अर्जेन्टिनाका लागि यसअघि डिएगो म्याराडोना र ज्याभिएर मास्कारानोको नाममा रहेको कीर्तिमान उछिन्ने छन् । फिफा वरीयतामा अर्जेन्टिना अहिले पाँचौं स्थानमा छ र अबको विश्वकपमा उसले समूह ‘सी’ मा साउदी अरेबिया, मेक्सिको र पोल्यान्डको सामना गर्नेछ ।

उनले अन्तर्वार्तामा थपेका छन्, ‘विश्वकपमा सबैखाले सम्भावना हुन्छ । सबै खेल उत्तिकै कठिन पनि हुने गर्छन् । जुन टिम उपाधि जित्नका लागि बलियो दाबेदार हुन्छ, उसकै प्रदर्शन खराब हुन सक्छ । हामी बलियो प्रत्याशी हौं अथवा होइनौं, थाहा छैन । तर अर्जेन्टिना जहिले पनि उपाधिको दाबेदार भने हो । मेरो विचारमा हामीभन्दा अन्य केही टिम माथि छन् ।’