कमब्याक र ह्याट्रिक हिरो अञ्जन- खेलकुद - कान्तिपुर समाचार

कमब्याक र ह्याट्रिक हिरो अञ्जन

अञ्जन विष्टले ५० औं खेलमा आएर पहिलो ह्याट्रिक गरेपछि नेपालले बंगलादेशलाई ३–१ ले हरायो
राजु घिसिङ, तस्बिर : केशव थापा

काठमाडौँ — जानेर नहुन पनि सक्छ, कुनै बेला के काण्डमा परे, कुनै समय के काण्डमा मुछिए । तर, अञ्जन विष्टले कहिल्यै हार खाएनन् । त्यसैले त उनी फेरि नेपाली राष्ट्रिय फुटबल टोलीमा फर्किंदा ह्याट्रिक हिरो भएका छन् । उनले तीन अवसर पाए, तीनपल्टै गोल गरे । त्यसैमा नेपालले दशरथ रंगशालामा मंगलबार अन्तर्राष्ट्रिय मैत्रीपूर्ण खेलमा बंगलादेशमाथि ३–१ को जित निकाल्यो ।

बन्द प्रशिक्षणमा अव्यवस्थित होस्टेल होइन, होटलमा बस्न पाउनुपर्ने माग गरेका रोहित चन्दलाई साथ दिएको भन्दै कुवेती प्रशिक्षक अब्दुल्लाह अल्मुताइरीले एसियन कप छनोटको तयारीमा राष्ट्रिय टिमबाटै १० खेलाडीलाई निकालेका थिए । त्यसमा खेलाडीप्रति समर्थन जनाएका नियमित कप्तान किरण चेम्जोङ पनि थपिए । विवादास्पद प्रशिक्षक अल्मुताइरी बिदामा रहेको भन्दै अखिल नेपाल संघ (एन्फा) ले बंगलादेशविरुद्ध एक मैत्रीपूर्ण खेलका लागि अमेरिकाबाट झिकाएर प्रदीप हुमागाईंलाई कार्यवाहक मुख्य प्रशिक्षक बनायो । उनले अल्मुताइरीबाट निष्कासित ११ खेलाडीलाई टिममा फिर्ता बोलाए ।

जम्मा एक खेलमा टिम सम्हाल्न आइपुगेका प्रशिक्षक हुमागाईंको २३ सदस्यीय टिममा चार गोलकिपर राख्ने र अल्मुताइरीविरुद्ध उत्रिएका ११ सिनियर खेलाडीलाई फिर्ता बोलाउने निर्णय कतै बदलाको भावनाबाट प्रेरित त थिएन ? प्रश्नहरू बढिरहेका थिए, अनुत्तरित नै थिए । तर, त्यो काण्ड र छनोटबारे हुमागाईंले चित्तबुझ्दो जवाफ दिन सकेका थिएनन् । अल्मुताइरीले बनाएको युवा टिमले जेठमा भएको एसियन कप छनोटमा खराब नतिजा नै बेहोरेको भए पनि सामाजिक सन्जालमा फुटबलप्रेमी र अल्मुताइरीका समर्थकहरू सिनियर खेलाडीविरुद्ध खनिएका थिए । त्यसैले सिनियर खेलाडीका लागि पनि मैत्रीपूर्ण खेल एक किसिमले प्रतिष्ठाको लडाइँ नै थियो । त्यसमा उनीहरू र हुमागाईं सफल रहे ।

निकालिएका ११ मध्ये ९ खेलाडीलाई प्रशिक्षक हुमागाईंले आठ हजार बढी दर्शकसामु पहिलो रोजाइमा मैदानमा उतारे । त्यसैले हुन सक्छ, २४ वर्षीय अञ्जनले अन्तर्राष्ट्रिय करिअरमा पहिलो ह्याट्रिकसँगै नेपाली टिममा गरेको पुनरागमनबारे सोधिएको प्रश्नको जवाफ दिए, ‘यो (ह्याट्रिक र पुनरागमन) त म शब्दमा बयान गर्न सक्दिनँ । कत्तिपछि खेल्न पाएँ, विगतमा के भयो, त्यो सम्झिन चाहँदिनँ । त्यस्तै कुराहरूले रहेछ झन् बलियो बनाउने । मैले गरेको महसुसलाई शब्दमा बयान गर्न सक्दिनँ । एकदम धेरै नै खुसी छु । मेरो फिलिंग्स सबैसामु सेयर गर्न पाएको छु । म अझै खेल्छु । म नेपालका लागि योग्य छु भन्ने लाग्छ ।’

६ वर्षयता पहिलो ह्याट्रिक

संयोग वा मिहिनेत । अञ्जनले नेपाली टिमबाट ५० औं खेलमा आएर पहिलो ह्याट्रिक गरेका हुन् । तीनै गोल पहिलो हाफमा गरे । उनले विमल घर्तीमगरको फ्रिकिकमा हेडद्वारा गोल गर्दै १८ औं मिनेटमा खाता खोलेका थिए । विशाल राईको पासमा अञ्जनले पेनाल्टी क्षेत्रमा मिलाइदिएको बललाई तेज तामाङले प्रहार गरे, जसमा पाहुना टिमका गोलकिपर अनिसुर रहमानले राम्रो बचाउ गरे । तर, बल पेनाल्टी क्षेत्रमै रहेका अञ्जन नजिक पुग्यो, जसलाई सहजै पोस्टको दिशा दिँदै अञ्जनले २७ औं मिनेटमा दोस्रो गोल गरे । उनले विशालको फ्रिकिकमा ३८ औं मिनेटमा हेडर गोल गर्दै ६ वर्षयता ह्याट्रिक गर्ने पहिलो नेपाली खेलाडी बने ।

उनी एउटै खेलमा तीन गोल गर्ने नेपालका छैटौं खेलाडी हुन् । यसअघि यो उपलब्धि गणेश थापा (सन् १९८७), नरेश जोशी (१९९९), नीराजन रायमाझी (२००१), भरत खवास (२०१३) र नवयुग श्रेष्ठ (२०१६) ले ह्यािट्रक गरेका थिए । उनी दशरथ रंगशालामा घरेलु टिमका लागि दोस्रो ह्याट्रिककर्ता हुन् भने ९ वर्षयताको पहिलो ।

परम्परागत प्रतिद्वन्द्वीविरुद्धको ह्याट्रिकसँगै दसौं गोल पूरा गरेपछि अञ्जनले पूर्वकप्तान अनिल गुरुङ र भरतसँग गोलसंख्या बराबरी गरेका छन् । अब उनी कीर्तिमानी गोलकर्ता नीराजन र हरि खड्का (समान १३ गोल) को नजिक पुगेका छन् । जुमनु राईले ११ गोल गरेका छन् । विमल ९ गोलको अवस्थामा छन् ।

‘जित सबैभन्दा महत्त्वपूर्ण’

दोहामा फिलिपिन्सविरुद्ध ३–० ले हारेको (अक्टोबर २०१४/मैत्रीपूर्ण खेल) प्रतिस्पर्धामा सब्स्टिच्युटको रूपमा दोस्रो हाफमा मैदानमा प्रवेश गर्दै अन्तर्राष्ट्रिय फुटबलमा डेब्यु गरेका अञ्जनले गोल र जितबारे भने, ‘मैले साफ च्याम्पियनसिपका बेला पनि भनेको थिएँ, गोल यति गर्छु भन्दा पनि टिमले जितोस् भन्ने चाहन्छु । आज पनि ३ गोल गरिसकेपछि अझै चढेर खेल्न सक्थ्यौं तर सुरक्षित भएर खेल्दा पनि हुन्छ नि । म गोलभन्दा पनि आफ्नो टिमको जितका लागि खेल्छु । आउने दिनहरूमा पनि । पक्कै पनि जित्दाखेरि एक न एक जनाले गोल गरिहाल्छ, त्यसमा म पनि पर्न सक्छु, कहिले मेरा साथीहरू पनि पर्न सक्छन् । सबैभन्दा महत्त्वपूर्ण कुरा भनेको जित हो । सधैंभरि जितका लागि खेल्छु ।’

खेलपछि पत्रकार सम्मेलनमा अञ्जन अलि भावुक देखिए । भने, ‘मलाई के लाग्छ भने जीवन भनेकै उतारचढाव हो । मेरो पनि सायद त्यो ‘डाउन फेज’ थियो होला । त्यसलाई एउटा पाठका रूपमा सिक्ने मौका पाएको छु । नेपालका लागि जस्तो परिस्थितिमा पनि म फुटबलचाहिँ खेल्छु । यदि नेपालले चाहन्छ भने म सधैं उपलब्ध हुनेछु ।’

उनले थपे, ‘धेरै कुराहरू त भन्न चाहँदिनँ त्यस्तो खासै केही कुरा त छैन । यो एउटा गेम मात्रै थिएन, धेरै पछि फेरि राष्ट्रको झण्डा छातीमा लाएर खेल्न पायो, त्यसैमा खुसी छु । जबदेखि फुटबल करिअर सुरु गरें, त्यो क्षणबाट कहिले खेल्दिनँ पनि भनिनँ । मलाई यस्तो गरेन, दिएन, सरकारले केही गरेन भनेर आफ्नो स्वार्थका लागि कहिल्यै खेलिनँ । आज पनि त्यही जोसले खेलेको थिएँ, पहिला पनि त्यही जोसले खेल्थें र अब आउने दिनमा पनि यही जोसले खेल्नेछु । देशका लागि कहिले पछि हट्ने छैन । यो गोल अनि यो जित सम्पूर्ण नेपाली फुटबल समर्थक र जनताप्रति महान चाड दसैंको शुभकामनासहित समर्पण गर्न चाहन्छु ।’

आशिष र ऋतिकको डेब्यु

अल्मुताइरीबाट निकालिएका खेलाडीको पुनरागमनमात्रै होइन, नयाँ फरवार्डहरू आशिष चौधरी र ऋतिक खड्काको डेब्यु बन्यो बंगलादेशविरुद्धको खेल । उनीहरू दुवै ८४ औं मिनेटमा मैदानमा प्रवेश गरेका थिए । ऋतिकले सेसेहाङ आङदेम्बेको स्थान लिए भने आशिषले विमललाई विस्थापित गर्दै पहिलो ‘क्याप’ जिते ।

खेलमा अग्रता लिने अवसर भने बंगलादेशले पाएको थियो । उसका कप्तान जमल भुयानले १८ यार्ड लाइनबाट प्रहार गरेको फ्रिकिकमा बल क्रसबार चुम्दै बाहिरियो । त्यसपछि नेपालले लय समात्यो र पहिलो हाफमै ३–० को अग्रता लियो । दोस्रो हाफमा बंगलादेशले केही राम्रा मुभ बनाए । रकिब हुसेनले रोहित चन्दलाई उछिन्दै गरेको क्रसमा सज्जाद हुसेनले ५६ औं मिनेटमा गोल गरेर अन्तर छोट्याए । सज्जादले ७१ औं मिनेटमा पाएको सहज अवसर बाहिर हाने । दोस्रो हाफमा नेपालले पनि दुई अवसर उपयोग गर्न सकेन । तैपनि बंगलादेशविरुद्ध अपराजित यात्रा ५ खेल पुर्‍याउँदै फेब्रुअरी २०२२ यता पहिलो जित निकाल्यो ।

प्रकाशित : आश्विन १२, २०७९ ०७:१८
प्रतिक्रिया
पठाउनुहोस्

नेपाल-भारत सीमा बैठक : दक्षिणी नाकामा हेल्प डेस्क

अन्तर्राष्ट्रिय सीमानाकामा नेपाल–भारतबाट डेस्क सञ्चालन गरी सुरक्षित आउजाउको प्रबन्ध मिलाइने
मातृका दाहाल

काठमाडौँ — दक्षिणी सीमा क्षेत्रमा सर्वसाधारणमाथि हुने लुटपाट र दुर्व्यवहारजन्य घटना रोक्न नेपाल–भारतका सुरक्षा अधिकारी यात्रु सहायता कक्ष (हेल्प डेस्क) सञ्चालनमा ल्याउन सहमत भएका छन् । त्यसका लागि अन्तर्राष्ट्रिय प्रवेश/प्रस्थान बिन्दुमै नेपालको सशस्त्र प्रहरी बल (एपीएफ) र भारतीय सशस्त्र सीमा बल (एसएसबी) ले आवश्यकताअनुसार कतै एकल र कतै संयुक्त प्रतिनिधि रहने हेल्प डेस्क सञ्चालन गर्ने भएका हुन् । 

‘सीमा सुरक्षा, व्यवस्थापन र समन्वय’ सम्बन्धी मंगलबार काठमाडौंमा सुरु छैटौं बैठकमा यस्तो समझदारी बनेको हो । सशस्त्र प्रहरी महानिरीक्षक राजु अर्याल र भारतीय सशस्त्र सीमा बलका प्रमुख सुजोय लाल थाउसेन तथा दुवै देशका गृह र परराष्ट्र मन्त्रालयका प्रतिनिधि बैठकमा सहभागी छन् । पूर्वनिर्धारित एजेन्डाअनुसार नै अन्तर्राष्ट्रिय सीमा नाकामा दुवै देशका तर्फबाट हेल्प डेस्क सञ्चालन गरी सुरक्षित रूपमा आउजाउ गर्ने प्रबन्ध मिलाइने बैठकमा समझदारी बनेको हो ।

सशस्त्र प्रहरीका एक अधिकारीले दसैं, तिहार र आगामी प्रतिनिधिसभा र प्रदेशसभा निर्वाचनलाई समेत मध्यनजर गरेर सीमाबाट हुने आउजाउलाई व्यवस्थित र सुरक्षित बनाउन दुवै देशका सीमा सुरक्षार्थ तैनाथ निकायले हेल्प डेस्क सञ्चालन गर्ने बताए । त्यसलाई बोर्डर आउट पोस्ट (बीओपी) तहबाट कार्यान्वयनमा लगिने उनको भनाइ छ । पहिलो दिन अन्तर्राष्ट्रिय नाकाबाट हुने आवतजावत व्यवस्थापन, सीमापार अपराध रोकथाम, आतंकवाद नियन्त्रण, दशगजामा संयुक्त सुरक्षा गस्ती, तेस्रो देशका नागरिकबाट हुन सक्ने गैरकानुनी घुसपैठ नियन्त्रणसहित विषयमा छलफल भएको छ ।

रोजगारी तथा भारतीय बजारमा किनमेल गरेर फर्किएका कतिपय नेपालीमाथि नाकामै लुटपाट हुने गरेको छ । तर, त्यस्ता घटना नियन्त्रण गर्न भारतीय सुरक्षाकर्मीले आलटाल गर्ने र मजदुर/किसानसँग भएका धनमाल सुरक्षित रूपमा गन्तव्यमा पुर्‍याउन सशस्त्र प्रहरीले समन्वय नगर्ने गरेका आरोप पनि लाग्दै आएको छ । सीमा बैठकमा सशस्त्र प्रहरीको बीओपी र भारतीय काउन्टरपार्ट्स एसएसबीका संयन्त्रबाटै यस्ता अपराध रोकथाम तथा नियन्त्रणमा प्रभावकारी रूपमा काम गर्ने दुवै पक्षले प्रतिबद्धता जनाएका छन् । सशस्त्र प्रहरी प्रधान कार्यालयले पनि केही दिनअघि भारततर्फ सीमा क्षेत्रमा तैनाथ बीओपीलाई परिपत्र गरेर हेल्प डेस्क सञ्चालन गर्न निर्देशन दिएको छ ।

भारतसँग करिब १ हजार ८ सय ८० किमि लम्बाइको सीमा क्षेत्र रहेकामा सशस्त्र प्रहरीका २ सय २० बीओपी सीमा क्षेत्रमा तैनाथ छन् । तर, नेपालतर्फ भारतले ५ सय ३० भन्दा बढी ठाउँमा एसएसबीका युनिट खडा गरेर नेपाल आउजाउको निगरानी गर्छ । कतिपय ठाउँमा एसएसबी खटिएकै क्षेत्रमा नेपाली नागरिक लुटपाटमा पर्दासमेत दुवै देशका सुरक्षाकर्मी बेखबर जस्तै देखिने गरेका छन् । त्यस्ता घटना दोहोरिन नदिन नै द्विपक्षीय बैठककै एजेन्डामा यो विषय समेटिएको गृह मन्त्रालयका एक अधिकारीले बताए ।

इलामको पशुपतिनगर, झापाको काँकडभिट्टा, मोरङको रानी, सिरहाको माडर, पर्साको वीरगन्ज, रूपन्देहीको बेलहिया, बाँकेको जमुनाह, कपिलवस्तुको कृष्णनगर, कैलालीको गौरीफन्टा र मोहना, दार्चुलाको पुलाघाट, बैतडीको झुलाघाट, कञ्चनपुरको गड्डाचौकी भारतसँग जोडिएका प्रमुख नाका हुन् । यसबाहेक खजुरगाछी (झापा), भन्टाबारी (सुनसरी), कुनौली (सप्तरी), जटही र इनर्वा (धनुषा), भिट्टामोड (महोत्तरी), मलंगवा (सर्लाही), बंकुल (रौतहट), मटिअर्वा र सिम्रौनगढ (बारा), त्रिवेणी (पूर्वी नवलपरासी), महेशपुर (पश्चिम नवलपरासी), तौलिहवा (कपिलवस्तु), कोइलाबास (दाङ), सुरजपुर (बर्दिया) लगायत नाकाबाट पनि भारत हुँदै नेपाली आउने गर्छन् ।

प्रकाशित : आश्विन १२, २०७९ ०७:०१
पूरा पढ्नुहोस्
प्रतिक्रिया
पठाउनुहोस्
×