टेबलटेनिसमा संयोग र नवीता च्याम्पियन- खेलकुद - कान्तिपुर समाचार

टेबलटेनिसमा संयोग र नवीता च्याम्पियन

कान्तिपुर संवाददाता

काठमाडौँ — नेपाल पुलिसका संयोग कपाली र नवीता श्रेष्ठ केकेएम/एनआरटी खुला टेबलटेनिस प्रतियोगिताको सिंगल्समा शनिबार च्याम्पियन बनेका छन् । संयोग पुरुष तथा नवीता महिलामा विजेता भएका हुन् ।

लैनचौरस्थित राष्ट्रिय टेबलटेनिस प्रशिक्षण केन्द्रमा भएको फाइनलमा संयोगले पुलिसकै विनेश खनियाँलाई ११–४, ७–११, ११–९, १५–१३, ११–९ को सेटमा पराजित गरे । आर्मीका कृष्ण थापा मगर र आयोजक केकेएम र एनआरटीका हिमाल विष्ट तेस्रो भए ।

महिलाको फाइनलमा नवीताले एपीएफकी वियन्का राईलाई ८–११, ९–११, १३–११, ११–९, ११–८, ११–९ को सेटमा हराइन् । पुलिसकी एलिना महर्जन र एपीएफकी सिक्का सुवाल श्रेष्ठले कांस्य जिते । दुवै समूहमा शीर्ष तीन स्थान हात पार्नेले क्रमशः ५० हजार, २५ हजार र १०–१० हजार रुपैयाँ पुरस्कार प्राप्त गरे ।

विजेतालाई अखिल नेपाल टेबलटेनिस संघका अध्यक्ष चतुरानन्द राजवैद्य, नेपाल ओलम्पिक कमिटीका महासचिव नीलेन्द्रराज श्रेष्ठ, नेपाल जुडो संघका अध्यक्ष दीपकहर्ष वज्राचार्यलगायतले पुरस्कृत गरे । पाँचदिने प्रतियोगितामा विभिन्न ११ स्पर्धामा प्रतिस्पर्धा भएको थियो ।

प्रकाशित : आश्विन ८, २०७९ २१:४३
प्रतिक्रिया
पठाउनुहोस्

रामेछाप कपको तयारी पूरा

कान्तिपुर संवाददाता

रामेछाप — जिल्लाको सर्वाधिक पुरस्कार राशिको दोस्रो रामेछाप कप खुला पुरुष फुटबल प्रतियोगिताको तयारी पूरा भएको छ । विजया दशमी तथा दीपावलीको अवसरमा मन्थलीको दीपशिखा ब्वाइज युनाइटेड क्लबले आयोजना गर्ने प्रतियोगिताका विजेता टिमले ३ लाख ३ हजार रुपैयाँ पुरस्कार जित्नेछ ।

असोज १० देखि १५ सम्म क्लबको आफ्नै मैदान करमबोटमा हुने स्पर्धामा पुलिस, आर्मी र विभिन्न जिल्लाका गरी १५ टिमको सहभागिता रहने क्लबका अध्यक्ष आशिष कार्कीले बताए ।

नकआउट आधारमा हुने प्रतियोगिताका अधिकांश टिमले विदेशी खेलाडीसमेत समावेश गराएका छन् । दोस्रोले २ लाख २ हजार, तेस्रो हुने टिमले १ लाख १ हजार पुरस्कार पाउनेछन् । प्रतियोगिताका लागि टाइसिट निर्माणलगायतका सम्पूर्ण तयारी पूरा भएको क्लबले शनिबार मन्थलीमा आयोजना गरेको पत्रकार सम्मेलनमा बताइयो । प्रतियोगिता गर्न २७ लाख ५६ हजार खर्च लाग्ने अनुमान आयोजकको छ ।

प्रकाशित : आश्विन ८, २०७९ २१:२३
पूरा पढ्नुहोस्
प्रतिक्रिया
पठाउनुहोस्
×