पोखरा रंगशालामा सुविधासम्पन्न तेक्वान्दो प्रशिक्षण भवन शिलान्यास- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

पोखरा रंगशालामा सुविधासम्पन्न तेक्वान्दो प्रशिक्षण भवन शिलान्यास

रासस

कास्की — एक दशक अघिदेखिको निरन्तरको प्रयासपछि पोखरामा तेक्वान्दो खेलको सुविधासम्पन्न प्रशिक्षण भवन निर्माण हुने भएको छ । पोखरा रंगशलाभित्र बन्ने भवनको शनिबार राष्ट्रिय खेलकुद परिषद् (राखेप) का सदस्यसचिव टंकलाल घिसिङले शिलान्यास गरे । भवन शिलान्याससँगै एक दशकअघिको निर्माणको सपना पूरा हुन लागेको हो ।

प्रशिक्षण भवन निर्माणका लागि तेक्वान्दोसँग सम्बन्धित खेल पदाधिकारी, खेलाडी तथा प्रशिक्षकले लामो समयदेखि प्रयास गर्दै आएको र अहिले सो मेहेनतले सार्थकता प्राप्त गर्न लागेको कास्की जिल्ला तेक्वान्दो संघका संस्थापक अध्यक्ष एवं गण्डकी प्रदेश तेक्वान्दोका अध्यक्ष जगनबहादुर गुरुङले बताए ।

उनका अनुसार विसं २०६७ देखि भवन निर्माणका लागि संघका पदाधिकारी, खेलाडी तथा प्रशिक्षकले मासिक पाँच सय रुपैयाँ सहयोग संकलन अभियान सुरु गरेका हुन् । सहयोग अभियानबाट हालसम्म ५५ लाख रुपैयाँ जम्मा भएको गुरुङले बताए ।

भवन निर्माण समितिका संयोजकसमेत रहेका अध्यक्ष गुरुङले भने, 'भवन निर्माणका लागि हामीले १० वर्षअघिदेखि अभियान सुरु गरेका हौं । स्वदेशमा मात्र नभएर बेलायत, हङकङलगायत नेपालीहरूबाट समेत सहयोग प्राप्त भएको छ । लामो प्रयासपछि यसलाई शिलान्याससम्म आइपुग्दा अत्यन्त खुसी छौं ।'

भवनको दुई करोड रुपैयाँ खर्च लाग्ने लागत अनुमान छ । तेक्वान्दो संघले थप रु ५० लाख जति सहयोग जुटाउने योजनामा छ । भवनका लागि अपुग हुने रकमका लागि राखेपसँग सहयोग मागिएको गुरुङले बताए ।

शिलान्यास कार्यक्रममा सदस्यसचिव घिसिङले भवनलाई पूर्णता दिन राखेपबाट सहयोग उपलब्ध गराइने विश्वास दिलाए । चालु आर्थिक वर्षको बजेट कार्यक्रममा समावेश गर्न नसकिए पनि आगामी वर्ष यसका लागि बजेट विनियोजन गरिने उनले प्रतिबद्धता जनाए ।

नेपाल तेक्वान्दो संघका केन्द्रीय अध्यक्ष प्रकाशशम्शेर राणाले तेक्वान्दो हलभित्र खेल्ने खेल भएकाले भवन अनिवार्य रहेको बताउँदै भवन निर्माणपछि खेलाडीको राम्रो विकास हुने विश्वास व्यक्त गरे । रंगशालाको दुई रोपनी क्षेत्रफल जमिनमा निर्माण हुने अत्याधुनिक हलसहितको भवनमा राष्ट्रिय प्रतियोगिता सञ्चालन गर्न सकिने गरी तयार गरिने कास्की जिल्ला तेक्वान्दो संघका कार्यवाहक अध्यक्ष कुलचन्द्र शर्माले बताए ।

पोखरा रंगशालाभित्र फुटबल, क्रिकेट, टेनिस, ह्याण्डबल, भलिबल, ब्याडमिन्ट, बास्केटबल, भलिबल, आर्चरीलगायत खेलका खेलस्थल रहेका छन् । विशेषगरी दोस्रो जनआन्दोलनपछि पोखरा रंगशालामा खेल पूर्वाधार निर्माणले गति लिएको थियो ।

प्रकाशित : आश्विन ८, २०७९ १८:३६
प्रतिक्रिया
पठाउनुहोस्

सहमतिपछि डा. केसीले अनशन तोड्दै

कान्तिपुर संवाददाता

काठमाडौँ — डा. गोविन्द केसी र सरकारबीच सहमति भएको छ । ७ बुँदे मागसहित अनशनमा बसेका डा. केसीसँग सरकारको वार्ता टोलीका सदस्यहरूले शनिबार साँझ त्रिवि शिक्षण अस्पताल महाराजगन्जमा पुगेर सहमतिपत्रमा हस्ताक्षर गर्नेछन् ।

शनिबार साढे ७ बजे शिक्षण अस्पतालमा पत्रकार सम्मेलन गर्दै डा. केसीले अनशन तोडेको घोषणा गर्ने उनका सहयोगी तथा वार्ता टोलीका सदस्य प्रितम सुवेदीले जानकारी दिए ।

शनिबार दिउँसो पनि डा. केसीको पक्षमा माइतीघरमा पनि प्रदर्शन भएको थियो । पछिल्लो पटक कैलालीबाट अनशन सुरु गरेका डा केसीको स्वास्थ्य अवस्था जटिल बन्दै गएपछि उनलाई असोज ५ गते थप उपचारका लागि काठमाडौं ल्याइएको थियो । उनी अहिले पनि महाराजगन्जस्थित शिक्षण अस्पतालमा उपचाररत छन् ।

केसीका माग सम्बोधन गर्न सरकारले प्रधानमन्त्री तथा मन्त्रिपरिषद्को कार्यालय सचिव रामप्रसाद घिमिरेको संयोजकत्वमा वार्ता टोली गठन गरेको थियो । वार्ता टोलीमा स्वास्थ्य तथा जनसंख्या मन्त्रालय सचिव रोशन पोखरेल र शिक्षा, विज्ञान तथा प्रविधि मन्त्रालयका सचिव रामकृष्ण सुवेदी सदस्य छन् ।

केसी पक्षको वार्ता टोलीमा भने अधिवक्ता ओमप्रकाश अर्याल, डा. लिजन महर्जन र सुवेदी सदस्य छन् । डा. केसीले भदौ २७ गते धनगढीको लक्ष्मीनारायण मन्दिरको धर्मशालामा २० औं सत्याग्रह सुरु गरेपछि सरकारले उनीसँग सहमति गर्न वार्ता टोली बनाएको हो ।

देशभरका सरकारी अस्पतालमा बेडअनुसार दरबन्दी व्यवस्था गर्नुपर्ने, जनसंख्या वृद्धिअनुसार अस्पताल/स्वास्थ्य संस्थाको स्तरवृद्धि गर्नुपर्ने, सरकारी अस्पतालमा टिकट, ल्याब, एक्स-रेलगायत आधारभूत स्वास्थ्य सेवा निःशुल्क हुनुपर्ने, सरकारले तोकेको सूचीअनुसार सबै निःशुल्क औषधिहरु उपलब्ध गराउनुपर्ने, मापदण्डविपरीत खुलेको निजी अस्पताल बन्द गराईपर्ने माग अघि सारेका छन् ।

२०८० सालसम्म सबै प्रदेशमा सरकारी मेडिकल कलेज स्थापना हुनुपर्ने, गेटा मेडिकल कलेज तत्काल संचालन गरिनुपर्ने उनको माग छ । स्वास्थ्य विज्ञान प्रतिष्ठानसम्बन्धी छाता ऐन, विश्वविद्यालय प्रतिष्ठानमा मापदण्ड विपरीतका नियुक्ति खारेजी, मापदण्डविपरीत नर्सिङ कलेजमा लिन लागिएको भर्ना रोक्नुपर्नेलगायत माग सरकारसँग उनले राखेका छन् ।

डा. केसी त्रिवि शिक्षण अस्पतालमा भर्ना

प्रकाशित : आश्विन ८, २०७९ १८:३५
पूरा पढ्नुहोस्
प्रतिक्रिया
पठाउनुहोस्
×