नेपालगन्ज म्याराथन रुटलाई मान्यता

आठौं संस्करणको केही साताअघि एम्सले नेपालगन्ज म्याराथनको रुटलाई मान्यता दिएको थियो । यसपालि नेपालगन्ज म्याराथन मंसिर २४ मा हुनेछ । ‘बिहीबार रातिमात्र एम्सको पत्र र प्रमाणपत्र प्राप्त भयो,’ नेपालगन्ज म्याराथनका संस्थापक अध्यक्ष टीएस ठकुरीले भने, ‘चार विधाको अलग अलग प्रमाणपत्र पाएका छौं ।’

एम्सले पठाएको चार प्रमाणपत्रमा म्याराथन ४२.१९५ किलोमिटर, हाफ म्याराथन २१.०९७ किलोमिटर, १० किलोमिटर र ५ किलोमिटर दौडको रुट प्रमाणीकरण भएको हो । एम्सका कोर्स म्यानेजर आमिर सान्डिवानले भदौ १२ गते सुर्खेत रोडस्थित रुट मापन गरेर रिपोर्ट बुझाएका थिए । अध्यक्ष ठकुरीका अनुसार वर्ल्ड एथलेटिक्सका इन्टरनेसनल मेजरमेन्ट एडमिनिस्ट्रेटर डेभ कुन्डीको हस्ताक्षरित प्रमाणपत्र प्राप्त भएको हो ।

नेपालगन्ज उपमहानगरदेखि सुरु भई जानकी गाउँपालिकाको केही भू–भाग हुँदै कोहलपुरको कार्यालयदेखि करिब ४ किलोमिटर उत्तरतर्फ बानियाभार पुगेर पुनः सोही रुट हुँदै विपी चोकमा पुगेर म्याराथन टुंगिनेछ ।