म्याथ्युजले विराटनगर र हफिजले पोखराबाट खेल्ने

भारतीय कम्पनी सेभेन थ्री स्पोर्ट्ससँग साझेदार गर्दै सेप्टेम्बर २४ देखि अक्टोबर २२ सम्म आयोजना गर्न लागेको नेपालको प्रमुख ट्वान्टी–२० प्रतियोगितामा हफिजलाई पोखरा एभेन्जर्स र म्याथ्युजलाई विराटनगर सुपर किंग्सले लिएको हो । विदेशी खेलाडीको ‘ए’ समूहमा पर्नेको पारिश्रमिक ४० हजार डलर रहेको छ ।

आइतबारको ड्राफ्टबाट कुल ३३ खेलाडी छनोट भएका छन् । विदेशी खेलाडीको समूह ‘बी’ मा पर्नेले २० हजार र ‘सी’ मा पर्नेले १२ हजार ५ सय डलर पाउने प्रावधान थियो । विदेशी खेलाडीका लागि सबै ६ फ्रेन्चाइज टोलीले १ लाख १० हजार डलरसम्म खर्च गरेका छन् । काठमाडौं गोर्खाजले विदेशी प्रमुख खेलाडीमा श्रीलंकाका थिसारा परेरा, सन्डुन विराकोडी र धनञ्जय विराकोडीलाई लिएको छ ।

नेपालका पूर्वकप्तान ज्ञानेन्द्र मल्ल मार्की खेलाडी रहेको काठमाडौंमा लोकेश बम, अविनाश बोहरा, कमलसिंह ऐरी, बसिर अहमद, सौरभ खनाल, अनिल खरेल, सन्दीप रजाइली, सन्तोष कार्की, सुनाम गौतम र गौतम केसी छन् । त्यस्तै मलेसियाका वीरनदीप सिंहले पनि काठमाडौंबाट खेल्ने छन् ।

पोखरा एभेन्जर्सले शरद भेषावकर, कुशल मल्ल, प्रतिश जीसी, आरिफ शेख, तुलबहादुर थापा, विशालविक्रम केसी, कृष्ण कार्की, विपिन खत्री, सुमित महर्जनलाई लिएको छ । टोलीको मार्की खेलाडीमा आसिफ शेख छन् । रोहित पौडेल मार्की खेलाडी रहेको विराटनगर सुपर किंग्समा अर्जुन साउद, नन्दन यादव, विवेककुमार यादव, साहब आलम अमरसिंह रौटेला, नारायण जोशी, सूर्य तामाङ, प्रदीपसिंह ऐरी, पृथु बाँस्कोटा, रिजन ढकाल रहेका छन् ।

दीपेन्द्रसिंह ऐरी मार्की खेलाडी रहेको दीपेन्द्रसिंह ऐरी मार्की लुम्बिनी अलस्टारमा, अनिलकुमार शाह, कुशल भुर्तेल, गुल्सनकुमार झा, सागर ढकाल, योगेन्द्रसिंह कार्की, किशोर महतो, तिलकराज भण्डारी, सुनिल धमला, आकाश चन्द, इशान पाण्डे छन् ।

ट्वान्टी–२० का हटकेट मोहम्मद आदिल अलाम जनकपुर रोयल्सबाट खेल्ने छन् । सोमपाल कामी मार्की खेलाडी रहेको जनकपुरमा सन्दीप जोरा, दिलिप नाथ, ललित राजवंशी, सुसन भारी, सागर पुन, पवन सर्राफ, जितेन्द्र मुखिया, खडक बोहरा, राजेश पुलामी छनोट भएका छन् ।

फार वेस्टर्न युनाइटेडमा करण केसी (मार्की) , विनोद भण्डारी, भीम सार्की, देव खनाल, रसिद खान, दुर्गेस गुप्ता, हरिशंकर शाह, शेर मल्ल, वसन्त कार्की, प्रकाश जैशी, हसिम अन्सारी छन् ।

नेपाली खेलाडी तर्फ पोखरा बाहेक सबैले ‘ए’ समूहबाट १, ‘बी’ समूहबाट ४ र ‘सी’ बाट ६ खेलाडी लिएका थिए । समूह ‘ए’ मा रहनेले १५, समूह ‘बी’ मा रहनेले १० र समूह ‘सी’ मा रहनेले ५ लाख पाउने छन् । आसिफलाई मार्की खेलाडी बनाएको पोखराले अघिल्लो दिन नै समूह ‘ए’ बाटै शरद भेषावकरलाई उठाएको थियो । रााष्ट्रिय टोलीका विकेटकिपर सुवास खकुरेललाई ड्राफ्टमा कसैले लिएनन् । उनी ड्राफ्टको ‘ए’ समूहमा थिए ।