‘गोलमेसिन’ हल्यान्ड

तर, उनी नै इंग्लिस प्रिमियर लिग इतिहासमा सुरुआती ५ खेलमा ९ गोल गर्ने पहिलो खेलाडी भएका छन् । अझ अगस्ट महिनामा ९ गोल गर्ने पनि उनी पहिलो खेलाडी भए । त्यतिमात्र होइन, सिटीका नयाँ खेलाडी जुलियन एल्भारेजलाई पनि उनले उत्तिकै सघाए । एल्भारेजले पनि आफ्नो पूर्ण डेब्युमा दुई गोल गरे । पराजित फरेस्टका व्यवस्थापक स्टिभ कुपर पनि भन्छन्, ‘हल्यान्ड निकै राम्रा खेलाडी हुन्, उनमा सबथोक छ ।’

यस्तै पुराना खेलाडी डिओन डब्लिनले खेलको कमेन्ट्रीका क्रममा भनेका छन्, ‘अहिले तत्कालका लागि सिटीसँग हल्यान्डका रूपमा विश्वकै सबैभन्दा राम्रा स्ट्राइकर रहेको छ ।’ प्रिमियर लिग इतिहासमै हल्यान्ड लगातार दुई ह्याट्रिक गर्ने सातौं खेलाडी हुन् । टोटेनहमका ह्यारी केनले भने एकभन्दा बढी अवसरमा यस्तो उपलब्धि छोइसके । केनकै नाममा थियो, यसअघि अगस्टमा सबैभन्दा बढी गोल गरेको कीर्तिमान । उनले ७ गोल गरेका थिए ।

सिटीका लागि हल्यान्डअघि रहिम स्टर्लिङ र कार्लोस टेभेजले एकभन्दा बढी ह्याट्रिक गरेका छन् । अझ सर्जियो अगुइरोले त चार ह्याट्रिक गरेका छन् सिटीको जर्सीमा । सिटी व्यवस्थापक पेप ग्वार्डिओला मान्छन्, ‘हल्यान्डले त्यो ठाउँ लिन सक्ने छैनन्, जुन सिटीका लागि अगुइरोले बनाएका छन् ।’ तर यी स्पेनी फुटबल प्रशिक्षक के पनि मान्छन्, अगुइरोसँग जे जस्तो प्रतिभा थियो, त्यस्तो हल्यान्डसँग पनि छ । उनी के थप्छन् भने व्यक्तिगत उपलब्धि केही ठूलो होइन, यदि टिमले उपाधि जित्न सकेन भने ।

‘सर्जियो त सिटीका लेजेन्डरी खेलाडी हुन्,’ ग्वार्डिओलाले भनेका छन्, ‘कसैले पनि उनलाई छुन सक्दैनन् । उनी सिटीका समर्थकमाझ सबैभन्दा प्रिय छन् । सिटीको आधुनिक इतिहासमा सबैभन्दा निर्णायक र महत्त्वको गोल अगुइरोले नै गरेका छन् । इर्लिङसँग पनि अगुइरोको जत्तिकै क्षमता छ । उनले नर्वे, अस्ट्रिया र जर्मनीमा जे गरे, त्यही यहाँ गर्ने प्रयासमा छन् । मलाई पूरा विश्वास छ, यदि सिटीले उपाधि जितेन भने उनी आफ्नो व्यक्तिगत उपलब्धिमा खुसी हुने खेलाडी होइनन् ।’

वेल्सका पूर्वडिफेन्डर एस्ली विलियम्सले पनि कमेन्ट्रीकै क्रममा भनेका छन्, ‘खेल सुरु हुन पाएको हुन्न, हल्यान्ड विपक्षी टिमका डिफेन्डरका लागि समस्या भइहाल्छ । उनीविरुद्ध खेल्न पनि गाह्रो देखिएको छ । उनी पूर्ण स्ट्राइकर हुन्, उनमा एउटा राम्रो स्ट्राइकरमा चाहिने सबै गुण छ । अहिलेसम्म उनले लिगमा जति गोल गरेका छन्, त्यसले उनी आधिकारिक स्ट्राइकरको परिभाषा पर्छ । उनको गोल गर्ने लोभ छ । उनको खेल हेर्दा म आफैं उत्साहित हुन्छु । उनले धेरैभन्दा धेरै गोल गर्नेछन् ।’

अहिले नै हल्यान्ड यसपल्टको प्रिमियर लिग सिजनमा सर्वाधिक गोलकर्ताका लागि बलियो प्रत्याशी मान्ने क्रम सुरु भइसकेको छ । ग्वार्डिओलाले थपेका छन्, ‘मलाई के विश्वास छ भने हल्यान्डको इच्छा पनि धेरैभन्दा धेरे उपाधि जित्ने हो । यदि उनको व्यक्तिगत प्रदर्शनको कीर्तिमान र उपाधि समानान्तर अगाडि जान्छ भने त यो धेरै राम्रो । पूरा टिमले जति राम्रो खेल्न थाल्छ, उनले धेरैभन्दा धेरै गोल गर्ने सम्भावना बढ्दै जान्छ ।’

सिटीको फराकिलो जित

लन्डन– एर्लिङ हल्यान्डले लगातार दोस्रो खेलमा ह्याट्रिक गरेपछि म्यानचेस्टर सिटीले इंग्लिस प्रिमियर लिगमा बुधबार नटिङ्घम फरेस्टलाई ६–० ले हराएको छ । क्रिस्टल प्यालेसविरुद्धको पछिल्लो खेलमा पनि उनले तीन गोल गरेका थिए । यससँगै २२ वर्षीय नर्वेली खेलाडी प्रिमियर लिगका सुरुआती ५ खेलमा ९ गोल गर्ने पहिलो खेलाडी बनेका छन् ।

आर्सनलले पनि लिगमा आफ्नो शतप्रतिशत जित यात्रा कायम राख्दै एस्टन भिल्लालाई २–१ ले हरायो । लिभरपुलले पनि न्युकासल युनाइटेडलाई २–१ ले पराजित गर्‍यो । आर्सनल ५ खेलबाट १५ अंकसहित शीर्षस्थानमा छ । त्यसपछि डिफेन्डिङ च्याम्पियन सिटी १३ अंकसहित दोस्रो स्थानमा छ ।

टोटेनहम ११ अंकमा तेस्रो स्थानमा छ । टोलीले अर्को खेलमा वेस्ट ह्यामसँग १–१ को बराबरी खेल्यो । बर्नमाउथ र उल्भसबीचको खेल भने निरस गोलरहित बराबरीमा टुंगियो । सिटीको जितमा जुलियन एल्भारेजले दुई गोल गरे भने जाओ कन्सेलोले एक गोल थपे । आर्सनलले सन् २००४–०५ यता पहिलोपल्ट लिगका सुरुआती ५ खेल जितेको छ । टोलीका लागि इमिलिनो मार्टिनेजले निर्णायक गोल गरे । भिल्ला पछिल्ला ५ खेलमध्ये चारमा पराजित छ । यसले व्यवस्थापक स्टेफन जेरार्डमाथि चर्को दबाब सिर्जना भएको छ । लिभरपुलको जितमा अन्तिम समयमा फाबियो कार्भाल्होले विजयी गोल गरेसँगै एनफिल्डमा खुसीयाली छाएको थियो ।

पीएसजी अपराजित

पेरिस– पेरिस सेन्ट जर्मेन (पीएसजी) ले आफ्ना नयाँ प्रशिक्षक क्रिस्टोफ ग्लाटरको नेतृत्वमा फ्रान्सेली लिग वानमा अपराजित यात्रा कायम राख्दा बुधबार टुलोजलाई ३–० ले हराएको छ । नेयमरको गोलमा अग्रता लिएयता केलियन एमबाप्पेले दुई गोल थपे ।