‘बजबल’ मा डर मान्दैन दक्षिण अफ्रिका

इंग्ल्यान्डले १७ टेस्टमा एकै जितमात्र निकालेको स्थितिबाट अविश्वसनीय रूपमा उत्कृष्ट प्रदर्शन गर्दै पछिल्ला चार टेस्ट जितेको छ । यसक्रममा इंग्ल्यान्डले विश्व च्याम्पियन न्युजिल्यान्डमाथि तीन टेस्टको शृंखला ३–० ले जितेको थियो । त्यसपछि इंग्ल्यान्डले एजबास्टनमा भएको टेस्टमा भारतलाई ७ विकेटले हराएको थियो ।

यस जितका लागि उसले ३ सय ७८ रनको लक्ष्य सफलतापूर्वक पछ्याएको थियो । ‘बजबल’ ले प्रशिक्षक म्याकलमको उपनामको प्रतिनिधित्व गर्ने गर्छ । उनी आएयता रातो बलबाट खेलिने पाँच दिनको टेस्ट क्रिकेटबारे सोच नै फेरिएको छ । तर इंग्ल्यान्डले तय गरेको अति आक्रामक रणनीति जुनसुकै परिस्थितिमा सफल हुनेछ वा हुने छैन, त्यसबारे भने अझै प्रश्न छ ।

विशेषतः दक्षिण अफ्रिकको पेस आक्रामण निकै बलियो रहेको छ । यस टिमविरुद्ध इंग्ल्यान्डको यो रणनीति परीक्षाबाट गुज्रिने छ । ‘इंग्ल्यान्डले जसरी खेल्न थालेको छ, त्यसमा मलाई पटक्कै पनि रूचि छैन । यो यस्तो शैली हो, कुनै पनि समय जुन कुनै टिमको पक्षमा मोडिन सक्छ । इंग्लिस ब्याटरले कसरी हाम्रा बलरको सामना गर्नेछन्, त्यो हेर्नलायक हुनेछ ।’

टेस्टको पूर्वसन्ध्यामा बोल्दै इंग्लिस बलर जेन्स एन्डरसनले भने आफ्नो रणनीतिको बचाउ गरेका छन् । उनी सकारात्मक सोचले खेल्ने नीतिका समर्थक हुन् । भन्छन्, ‘अहिले हाम्रो रणनीति जुन प्रकारको छ, त्यसमा शंका आवश्यक छैन । हामी कुनै पनि लक्ष्य पछ्याउन सक्षम छौं भने जस्तै परिस्थितिमा विकेट लिन सक्षम नै छौं ।’

दुवै टिम बलिङमा बलियो देखिएको छ । यसको ठीक विपरीत ब्याटिङमा केही कमजोरी छ । विशेषतः प्रारम्भिक ब्याटर जोडीमा दक्षिण अफ्रिका बलियो छ । एल्गर आफैं प्रारम्भिक ब्याटर हुन् । उनको नेतृत्वमा ९ टेस्टमध्ये ७ खेलमा दक्षिण अफ्रिका विजयी छ । इंग्ल्यान्ड भने लयमा रहेका ब्याटर जो रुट र जोनी बेरिस्टोमा निर्भर हुनेछ ।