अमितलाई आइटेलको प्रायोजन

अमित र आइटेलको तर्फबाट महालक्ष्मी मोबाइलका बिजनेस डेभलपमेन्ट प्रमुख राजेश पौडेलले सम्झौतामा हस्ताक्षर गरेका छन् । सम्झौताअनुसार महालक्ष्मीले अमितलाई क्रिकेटको सम्पूर्ण किट्स उपलब्ध गराउने छ, जसको खर्च १ लाख २० हजारसम्म लाग्ने अनुमान गरिएको छ । अमितले भने राष्ट्रिय तथा अन्तर्राष्ट्रिय प्रतियोगितामा खेल्दा आइटेलको लोगो अंकित ब्याट र क्रिकेट किट्समा लगाएर खेल्नेछन् ।

क्रिकेट लोकप्रिय खेल भएको र अमितलाई आफ्ना कम्पनीले चुन्दा आइटेललाई स्थापित गर्न सहयोग पुग्ने विश्वास लिँदै पौडेलले यो सम्झौता नेपाली क्रिकेटका लागि पनि फलदायी हुने बताए । आइटेलसँगको सहकार्यले आफ्नो खेलजीवन पुनः ब्युँतिने अपेक्षा अमितको छ । ‘मैले क्रिकेट खेल्न थालेको १५ वर्ष भइसकेको छ, मैले आफ्नो खेलजीवनमा पहिलो पटक यस्तो सम्झौता गर्न पाएको छु, यसले मेरो भविष्यको क्रिकेट करियरलाई पनि सहयोग गर्छ,’ उनले भने ।

२९ वर्षे अमितले सन् २०१३ मा नेपालबाट एसीसी यू–१९ कप र एसीसी यू–१९ एसिया कप खेलेका थिए । उनले २०६९ सालको राष्ट्रिय प्रतियोगितामा लगातार दुई शतक बनाएका थिए । बारा कलैयाका उनले वीरगन्ज क्षेत्रबाट खेल्दै पुल्चोक क्याम्पस मैदानमा जनकपुरधामविरुद्ध १ सय १ र त्रिवि क्रिकेट मैदान कीर्तिपुरमा काठमाडौंविरुद्ध १ सय २६ रन बनाएका थिए । अमितले विभिन्न फ्रेन्चाइज लिग पनि खेल्दै आएका छन् ।