सिटीलाई राहत, युनाइटेडलाई आहत- खेलकुद - कान्तिपुर समाचार

सिटीलाई राहत, युनाइटेडलाई आहत

द गार्डियन

लन्डन — इंग्लिस प्रिमियर लिग (ईपीएल) को नयाँ सिजन सुरु भइसकेको छ । यस सप्ताहन्त ‘डे–वान’ का खेल सकिएका छन् । टोटेनहम र आर्सनलले ठोस सुरुआत लिनु, चेल्सीको संघर्षपूर्ण जित अनि लिभरपुलको बराबरी । यी यिनै खेलका प्रमुख विशेषता रहे । तर त्योभन्दा ठूलो विशेषता रह्यो, म्यानचेस्टरका दुई क्लबले बेहोरेको फरक परिस्थिति । जहाँ म्यानचेस्टर सिटीले सानदार सुरुआत लिएको छ, त्यहीं म्यानचेस्टर युनाइटेड फेरि खराब सुरुआतको सिकार बनेको छ ।

यो एक प्रकारले सिटीलाई राहत र युनाइटेडलाई आहत जस्तै भयो । ईपीएलमा अहिले कोही एक प्रशिक्षक असाध्यै खुसी छन् भने ती हुन् सिटीका पेप ग्वार्डिओला । उनी मान्छन्, इर्लिङ हल्यान्ड गोल गर्नकै लागि जन्मेका खेलाडी हुन् । उनकै दुई गोल मदतमा सिटीले वेस्ट ह्याममाथि आरामदायी २–० को जित निकाल्यो । लन्डन स्टेडियममा यी नर्वेली खेलाडी ह्याट्रिक गर्नबाट भने चुके । तर उनको खेल नै कस्तो रह्यो भने त्यसले ग्वार्डिओलाको अनुहार नै धपक्क बले जस्तै भयो ।

उनी भन्छन्, ‘हल्यान्डले ५ वर्षको अनुबन्ध गरेका छन् । विश्वास गरौं, त्यो समयभन्दा बढी उनी सिटीमा रहनेछन् । हामी चाहन्छौं, उनी जस्ता नयाँ खेलाडी सिटीमा रहेर खुसी रहोस् । हाम्रो काम भनेको उनीबाट अझ केही बढी प्रदर्शन निकाल्ने नै हो । उनी निकै प्रतिभाशाली खेलाडी हुन् । हामी उनलाई अझ उन्नत खेलाडी बनाउन चाहन्छौं । उनले गोल त गरोस् नै, यो पनि महत्त्वपूर्ण छ । तर हामी उनी वास्तवमै अझ राम्रा खेलाडी होस् भन्ने चाहन्छौं ।’ ग्वार्डिओलाले दोस्रो हाफमा हल्यान्डलाई ‘सब्स्टिच्युट’ गरे । त्यसका लागि माफी माग्न चाहेनन् । लिभरपुलविरुद्ध कम्युनिटी सिल्डमा २२ वर्षीय हल्यान्डको प्रदर्शनलाई लिएर आलोचना सुरु भएको थियो । त्यसतर्फ इंगित गर्दै ग्वार्डिओलाले भने, ‘एक साताअगाडिसम्म उनी ईपीएलमा अभ्यस्त हुन नसक्ने पनि बताइएको थियो । तर अहिले उनको तुलनामा थिएरी हेनरी, एलान सिएरर र क्रिस्टियानो रोनाल्डोसँग हुन थालेको छ ।’ हल्यान्डले पहिलो गोल पेनाल्टीबाट गरेका हुन् ।

पेनाल्टी जित्ने काम पनि उनकै थियो । त्यसपछि दोस्रो गोल थपे । ‘मलाई थाहा थियो, हल्यान्ड सबैखाले आलोचना सहन सक्छन् । अभ्यासका बेला उनमा कुनै प्रकारको दबाब देखिएन । तर जसरी उनले पेनाल्टी प्रहार गर्न उत्सुकता देखाए, त्यसमा म खुसी छु ।’

हल्यान्ड आफैं पनि आफ्नो खेल अझ सुधार होस् भन्ने चाहन्छन् र त्यसको वचन पनि दिन्छन् । इल्केयी गुन्डोगनको क्रसलाई प्रहार गर्न नसकेका उनले आफ्नो आलोचना गर्न पछाडि परेनन् ।

हल्यान्डको प्रशंसा गर्न वेस्ट ह्यामका प्रशिक्षक डेविड मोयसले पनि पटक्कै कन्ज्युस्याइँ गरेनन् । उनले भने, ‘हामी सबैले उनको खेल नजिकबाट हेरिरहेका छौं । उनको प्रदर्शनले उनी कति राम्रा खेलाडी हुन्, त्यो देखाउने गर्छ । सिटी आफैंमा निकै बलियो टिम हो । प्राविधिक रूपमा सिटीले हामीलाई यस खेलमा निकै पछाडि छाडेको देखियो । गत सिजन तुलनामा सिटीको प्रदर्शन फरक रह्यो, उसका दुवै फुलब्याकले मिडफिल्डरको जस्तो भूमिका निभाइरहेका थिए ।’

युनाइटेड भने घरमै ब्राइटनको हातबाट पराजित रह्यो । स्कोर थियो २–१ । ओल्ड ट्राफोर्डमा सामना गर्नुपरेको यो नतिजापछि प्रशिक्षक एरिक टेन हागले माने, यो टिम सम्हाल्नु भनेको निकै गाह्रो रहेछ, अपजस पाइने काम । टेन हागको पहिलो ईपीएल खेलमा भ्रमणकारी ब्राइटन पूर्णतः छाएको थियो । त्यसमा पास्कल ग्रासले ९ मिनेटको अन्तरमा मज्जाले दुई गोल गरे । युनाइटेडले एक गोल त फर्कायो, तर त्यो आत्मघाती रह्यो । एलेक्स म्याक एलिस्टरले आफ्नै पोस्टमा गोल गरेका थिए ।

टेन हागले भने, ‘हामीले अझ धेरै मिहिनेत नगरेर सुखै छैन । हाम्रो काम यो हारको विश्लेषण गर्ने हो र अगाडि बढ्ने हो । यस खेलमा हामीले राम्रो सुरुआत त लियौं, तर हाम्रो खेल विस्तारै खस्कन थाल्यो । हाम्रा खेलाडीले भुलहरू गर्न थाले । फुटबलमा जसले भुल गर्छ, उसले सजाय पनि पाउँछ ।’ युनाइटेडका लागि प्रि–सिजन राम्रै रह्यो, त्यसैले सायद केही हदसम्म लिगको पहिलो खेलमा आफ्ना खेलाडीको खेल खस्केकामा टेन हाग झसङ्ग परेको पनि देखियो ।

उनले भने, ‘यस्तो हुने गर्छ । निचोड हो, हामीले ब्राइटनविरुद्ध जसरी खेल्यौं, त्योभन्दा राम्रो खेल्न सक्नुपर्थ्यो । मलाई के पनि राम्रोसँग थाहा छ भने सुधार रातारात आउने गर्दैन, पक्कै हामीले प्रि–सिजनमा राम्रो प्रदर्शन गर्न सक्यौं । तर ब्राइटनविरुद्ध हाम्रो प्रदर्शन निकै खस्केको देखियो । हामीले यसबाट शिक्षा लिनुपर्छ ।’ यही प्रि–सिजनकै बेला टेन हागले के महसुस गरेका थिए भने खेलाडीको आत्मविश्वास कमजोर छ, त्यसमा छियाछिया परेको छ ।

यसको कारण के थियो भने अघिल्लो सिजनमा युनाइटेडको प्रदर्शन नाजुक थियो । यसले खेलाडीको मानसिक पनि कमजोर बनाएको थियो । यसै विषयमा टेन हागले भने, ‘मलाई पनि यस्तै लाग्छ, तर यो सामान्य हो । हामी टिमका रूपमा अझै विकास हुन बाँकी छ । किनभने हामीले पर्याप्त समय पाएका छैनौं ।’

सर एलेक्स फर्गुसनले छाडेयता युनाइटेड सम्हाल्न आठ व्यवस्थापक आइसके । त्यसमध्ये टेन हाग लिगको पहिलो खेलमै हार बेहोर्ने दोस्रोमात्र रहे ।

त्यसअघि यस्तै नियति लुइस भान गालको रह्यो । युनाइटेडलाई हराउन पाएकोमा ब्राइटन त खुसी हुने नै भयो । ओल्ड ट्राफोर्डमा ब्राइटनको यो १४ औं भ्रमण थियो, तर जित निस्केको भने पहिलोपल्ट । त्यसैले यो धेरै अर्थमा ब्राइटनका लागि ऐतिहासिक रह्यो । ब्राइटनमा नाम चलेका खेलाडी कम छन् । मानौं छैनन् नै । तर, एउटा टिमका रूपमा यो बलियो छ । अचेलमा टिममा महत्त्वाकांक्षा पनि बढेको छ । त्यसैले प्रशिक्षक गाह्रम पोटर भन्छन्, ‘हाम्रो टिम खुबै मजबुत छ ।’

प्रकाशित : श्रावण २४, २०७९ ०७:०४
प्रतिक्रिया
पठाउनुहोस्

मुस्ताङको गल्फ कीर्तिमानतर्फ

कान्तिपुर संवाददाता

काठमाडौँ — गण्डकी प्रदेशका सांसद इन्द्रधारा विष्टको सहयोगमा बनाइएको ‘मुस्ताङ गल्फ कोर्स’ मा भदौ ११ गते ‘टप अफ द वर्ल्ड गल्फ च्यालेन्ज’ हुने भएको छ ।

समुद्री सतहबाट ४,६४५ मिटरको उचाइमा अवस्थित मुस्ताङ गल्फ कोर्समा हुने एक दिने प्रतियोगिताबारे सोमबार आयोजित पत्रकार सम्मेलनमा नेपाल गल्फ संघका महासचिव दीपक आचार्यले भने, ‘यो विश्वकै सबैभन्दा माथिल्लो स्थानमा रहेको गल्फ कोर्स हो, जसको दाबी गर्न हामी प्रतियोगिता गरेपछि प्रमाणको रूपमा तस्बिर पठाउने छौं ।’

उनले थपे, ‘म पनि हालसम्म त्यहाँ पुगेको छैन । फोटो र भिडियोमै गल्फ कोर्स हेरेको हो । त्यहाँ हामीले केही काम गर्न बाँकी छ । नौ होलको कोर्सको लागि जग्गाको कमी भएजस्तो लाग्दैन । हिउँ नभएको समयमा त्यहाँ खेल्न सकिन्छ । यो प्रतियोगितापछि विश्व गल्फमा सन्देश दिनेछौं र प्रतियोगितालाई निरन्तता दिनेछौं ।’

मुस्ताङ गल्फ कोर्सले विगतमा विश्वकै सबैभन्दा उच्च स्थानको गल्फ कोर्सको रूपमा रहेको सिक्किमस्थित याक गल्फ कोर्स (३,९७० मिटर) लाई उछिनेको हो । ‘हाइअल्टिच्युडमा कति खेरसम्म र कति बेरसम्म खेल्न सक्छन्, यो प्रतियोगिता परीक्षणको रुपमा रहनेछ,’ आचार्यले भने, ‘तर यो गल्फ कोर्षले विश्वको ध्यान आकृष्ट गर्नसक्छ ।’ प्रदेश सांसद विष्टले भने, ‘प्रदेश सांसद विकास कोषबाट १० लाख रुपैयाँ निकालेर गल्फ कोर्सको संरचना तयार पारिएको हो । यो अहिले लोमान्थाङ समुदायको हो । सरकार वा जसको जग्गा भए पनि संरचना खेर जाँदैन । पोखराका चार गल्फर लगेर गल्फ कोर्सको परीक्षण गरिसकेका छौं ।’

उनी आफैं पनि सोसल गल्फरको रूपमा सक्रिय छन् । ‘मुस्ताङ गल्फ कोर्सले पर्यटन व्यवसायलाई बलियो बनाउने, विदेशमा भएका नेपालीले लगानी गर्ने अवसर प्राप्त गर्ने र स्थानीयले रोजगारी पाउने विश्वास छ,’ उनले भने । उनले यो गल्फ कोर्ष नेपालकै उत्कृष्ट हुन सक्ने दावी गर्दै पहिलो प्रतियोगिता आयोजना गरेर यो कोर्षलाई चिनाउन लागिएको जनाए । नेपाल गल्फ संघका अध्यक्ष टासी घलेले भने, ‘अन्य पर्यटकको तुलनामा गल्फ पर्यटकले तीन गुणा बढी खर्च गर्छ । त्यसैले मुस्ताङ गल्फ कोर्सको सहयोगमा नेपालमा खर्च गर्ने हैसियतका धेरै गल्फ पर्यटक भित्र्याउने अपेक्षा गरेका छौं । नेपालमा गल्फको सम्भावना छ भनेर सन्देश दिन लोमान्थाङमा प्रतियोगिता आयोजना गर्न जरुरी छ ।’

पर्वतीय खेलकुद महासंघका अध्यक्ष गोविन्द भट्टराईले उच्च स्थानको गल्फ कोर्सले देशको खेल पर्यटनमा ठूलो योगदान गर्ने बताए । संघका महासचिव आचार्यका अनुसार स्टेबलफोर्ड ३/४ ह्यान्डीक्यापका आधारमा भदौ ११ मा हुने एकदिने गल्फ प्रतियोगितामा चार महिलासहित २८ खेलाडी सहभागी हुनेछन् । त्यसमध्ये १०–१२ गल्फर पोखराको हुने उनले बताए ।

प्रकाशित : श्रावण २४, २०७९ ०७:०२
पूरा पढ्नुहोस्
प्रतिक्रिया
पठाउनुहोस्
x
×